Ye Anɔkwa Yɛ Nɔ Fɛɛ Nɔ Mli

Mɔ fɛɛ mɔ sumɔɔ ni ekɛ mɛi ni yeɔ anɔkwa abɔ naanyo. Yehowa hu sumɔɔ ni enanemɛi aye anɔkwa. Shi ŋmɛnɛ lɛ, mɛi pii yeee anɔkwa, hewɔ lɛ, ewa akɛ mɔ ko baaye anɔkwa. Kɛ́ wɔye anɔkwa yɛ nɔ fɛɛ nɔ mli lɛ, mɛɛ sɛɛ wɔnáa?

1. Mɛɛ yiŋtoo titri hewɔ esa akɛ wɔye anɔkwa?

Kɛ́ wɔye mɛi anɔkwa lɛ, wɔhãa Yehowa naa akɛ wɔsumɔɔ lɛ ni wɔbuɔ lɛ. Naa anɔkwa sane ko: Yehowa le wɔsusumɔi ni enaa wɔnifeemɔi fɛɛ. (Hebribii 4:​13) Kɛ́ wɔhala akɛ wɔbaaye anɔkwa lɛ enaa, ni emii shɛɔ ehe. E-Wiemɔ lɛ kɛɔ akɛ: “Ejaakɛ Yehowa miihi mɔ ni lakaa mɛi, shi mɔ ni ja lɛ, lɛ ekɛbɔɔ naanyo.”​—Abɛi 3:32.

2. Mɛɛ shihilɛi komɛi amli wɔyeɔ anɔkwa yɛ?

Yehowa sumɔɔ ni ‘wɔkɛ wɔhe awie anɔkwale.’ (Zakaria 8:​16, 17) Mɛni enɛ tsɔɔ? Kɛ́ wɔkɛ mɛi miiwie lɛ, wɔmaleee amɛ ni wɔwieee saji ni ejaaa hu​—wɔwekumɛi jio, mɛi ni wɔkɛtsuɔ nii jio, wɔnyɛmimɛi Kristofoi jio, amralofoi jio. Mɛi ni yeɔ anɔkwa lɛ ejuuu, ni amɛtswaaa mɛi ojo hu. (Kanemɔ Abɛi 24:​28 kɛ Efesobii 4:​28.) Ni amɛwoɔ too fɛɛ too ni esa akɛ amɛwo lɛ. (Romabii 13:​5-7) Wɔtsɔɔ gbɛi nɛɛ kɛ ekrokomɛi anɔ ‘wɔyeɔ anɔkwa yɛ nibii fɛɛ ni wɔfeɔ lɛ amli.’​—Hebribii 13:18.

3. Kɛ́ wɔye anɔkwa lɛ, mɛɛ sɛɛ wɔnáa?

Kɛ́ mɛi le wɔ akɛ mɛi ni yeɔ anɔkwa lɛ, amɛheɔ wɔ amɛyeɔ. Wɔhãa mɔ fɛɛ mɔ nuɔ he akɛ eyɛ shweshweeshwe yɛ asafo lɛ mli, tamɔ eji yɛ weku ni suɔmɔ yɔɔ mli lɛ mli lɛ. Wɔnáa henilee ni he tse. Agbɛnɛ hu, anɔkwa ni wɔyeɔ lɛ baanyɛ ‘awula Nyɔŋmɔ, wɔ-Yiwalaherelɔ lɛ tsɔɔmɔ lɛ,’ ní egbala mɛi kɛba Yehowa asafo lɛ mli.​—Tito 2:​10.

KASEMƆ PII OFATA HE

4. Kɛ́ wɔye anɔkwa lɛ, Yehowa náa miishɛɛ

Nyɛkanea Lala 44:​21 kɛ Maleaki 3:​16 lɛ, ni nyɛsusua sanebimɔi nɛɛ ahe:

• Kɛ́ okwɛ lɛ, mɛni hewɔ jwɛŋmɔ bɛ mli akɛ wɔbaamale lɛ?

• Kɛ́ wɔbɔ mɔdɛŋ wɔwie anɔkwale be ni nakai feemɔ wa kɛhá wɔ po lɛ, kɛ́ okwɛ lɛ, te Yehowa baanu he ehã tɛŋŋ?

5. Ye anɔkwa be fɛɛ be

VIDIO: Mɛni Baahã Oná Miishɛɛ?​—Henilee Ni He Tse (2:32)

Nyɛkanea Hebribii 13:​18 lɛ, ni nyɛsusua bɔ ni wɔbaafee wɔye anɔkwa yɛ shihilɛi nɛɛ amli lɛ he. Yɛ . . .

• wɔweku lɛ mli.

• nitsumɔhe loo skul.

• shihilɛi krokomɛi amli.

6. Sɛɛnamɔ yɛ anɔkwayeli he

Anɔkwayeli baanyɛ ahã wɔná naagbai komɛi. Shi naagbee mli aahu lɛ, obaana akɛ no ji nɔ ni hi fe fɛɛ ni esa akɛ ofee. Nyɛkanea Lala 34:​12-16 lɛ, ni nyɛsusua sanebimɔ nɛɛ he:

• Mɛɛ gbɛ nɔ anɔkwa ni obaaye lɛ baahã oná shihilɛ kpakpa?

1. A. Wu kɛ ŋa ni yeɔ amɛhe anɔkwa lɛ agbãla sɔɔ

2. B. Nitsulɔi ni yeɔ anɔkwa lɛ anitsumɔtsɛmɛi heɔ amɛ amɛyeɔ

3. D. Maŋbii ni yeɔ anɔkwa lɛ náa gbɛ́i kpakpa yɛ amralofoi ahiɛ

EMLI OTI

Yehowa sumɔɔ ni enanemɛi aye anɔkwa yɛ amɛwiemɔi kɛ amɛnifeemɔi fɛɛ amli.

Mɛni Okase?

• Mɛɛ shihilɛi komɛi amli wɔyeɔ anɔkwa yɛ?

• Mɛni hewɔ jwɛŋmɔ bɛ mli akɛ wɔbaamale lɛ?

• Ani obaasumɔ ni oye anɔkwa be fɛɛ be? Mɛni hewɔ?

EHE SAJI KROKOMƐI

Te fɔlɔi baafee tɛŋŋ amɛtsɔɔ amɛbii ni amɛye anɔkwa lɛ?

Wiemɔ Anɔkwale (1:44)

Kɛ́ wɔyeɔ wɔshiwoi anɔ lɛ, mɛɛ sɛɛ wɔnáa?

Ye Oshiwoi Anɔ Koni Oná Jɔɔmɔi (9:09)

Obaana kɛji esa akɛ wɔwo too, kɛ́ akɛfeɔ nibii ni esaaa po.

“Too​—Ani Esa Akɛ Owo?” (Buu-Mɔɔ, October 1, 2011)

Mɛni hã nuu ko ni tswaa ojo tsake ni ekpa ojotswaa?

“Mibakase akɛ Yehowa Naa Mɔbɔ ni Ekɛ Eshai Faa” (Buu-Mɔɔ, May 1, 2015)