Mɛni Hewɔ Atsĩii Biblia Mli Gbɔmɛi Komɛi Agbɛ́i Atã Lɛ?

Yɛ Biblia wolo ni ji Rut lɛ mli lɛ, atsɛ nuu ko ni kpoo akɛ ebaatsu sɔ̃ ni kã enɔ yɛ Mose Mla lɛ naa lɛ he nii lɛ akɛ ashimashi. (Rut 4:1-12) Ani esa akɛ wɔmu sane naa akɛ, mɛi fɛɛ ni awie amɛhe yɛ Biblia lɛ mli, shi atsĩii amɛgbɛ́i atã lɛ ji gbɔmɛi gbohii loo amɛhe ehiaaa?

Dabi. Susumɔ nɔkwɛmɔnɔ kroko nɛɛ hu he okwɛ. Bɔni afee ni Yesu ato enaagbee Hehoo lɛ he gbɛjianɔ lɛ, ekɛɛ ekaselɔi lɛ akɛ, “nyɛyaa maŋ lɛŋ ni nyɛyakɛa ashimashi [“nuu ko,” The New English Bible]” koni efee nibii klalo yɛ eshĩa. (Mateo 26:18) Aso esa akɛ wɔmu sane naa akɛ nuu ni atsɛ lɛ yɛ ŋmalɛ nɛɛ mli akɛ “ashimashi” lɛ, eji gbɔmɔ gbonyo loo ehe ehiaaa hewɔ atsĩii egbɛ́i tã lɛ? Jeee nakai kwraa ji sane lɛ; ŋwanejee ko bɛ he akɛ nuu lɛ, ni ji ashimashi, ni atsĩ etã yɛ biɛ nɛɛ ji Yesu kaselɔi lɛ ateŋ mɔ ko. Akɛni egbɛ́i he ehiaaa tsɔ yɛ amaniɛbɔɔ lɛ mli lɛ hewɔ ni atsĩii tã lɛ.

Kɛfata he lɛ, Biblia lɛ tsĩ aŋkroaŋkroi ni ji efɔŋfeelɔi komɛi agbɛ́i atã; nakai nɔŋŋ ewie anɔkwafoi komɛi ahe, shi etsĩii amɛgbɛ́i atã. Ákɛ nɔkwɛmɔnɔ lɛ, ale klɛŋklɛŋ yoo lɛ gbɛ́i ni ji Hawa lɛ, waa diɛŋtsɛ. Kɛlɛ, epɛsɛmkunya kɛ etoigbele lɛ gbe yi ni Adam fee esha, ni no kɛ wɔ fɛɛ ewo amanehulu kple mli nɛɛ. (Romabii 5:12) Nɔ ni tamɔɔɔ nakai lɛ, atsĩii Noa ŋa lɛ gbɛ́i tã yɛ Ŋmalɛi lɛ amli, shi wɔnáa ehe ni ekɛha kwraa kɛ bɔ ni efee toi kɛfi ewu sɛɛ kɛtsu nitsumɔ ni he hiaa waa lɛ he sɛɛ. Belɛ, eyɛ faŋŋ akɛ egbɛ́i tã ni atsĩii lɛ etsɔɔɔ akɛ ehe ehiaaa loo enáaa Yehowa hiɛ duromɔ.

Mɛi komɛi hu yɛ ni amɛtsu nibii ni he hiaa waa yɛ Yehowa yiŋtoo mli, ni awie amɛhe yɛ Biblia lɛ mli, shi atsĩii amɛgbɛi atã. Susumɔ Israelnyo gbekɛyoo fioo ni eji nyɔŋ yɛ Naeman, Siria asafoiatsɛ nukpa lɛ shĩa lɛ he okwɛ. Efee ekãa ni ekɛ enuŋtsɔ Naeman ŋa wie Yehowa gbalɔ ni yɔɔ Israel lɛ he. Enɛ ha afee naakpɛɛnii wulu ko. (2 Maŋtsɛmɛi 5:1-14) Israelnyo kojolɔ ko ni atsɛɔ lɛ Yefta lɛ hu biyoo fee hemɔkɛyeli he nɔkwɛmɔnɔ ko ni sa kadimɔ waa. Ejɛ esuɔmɔ mli ekpoo gbalashihilɛ kɛ bifɔmɔ bɔni afee ni eye shi ko ni etsɛ wo lɛ nɔ. (Kojolɔi 11:30-40) Nakai nɔŋŋ lalafolɔi 40 kɛ sɛɛ, kɛ gbalɔi ni kɛ anɔkwayeli tsu nitsumɔi wuji komɛi hu yɛ ni awie amɛhe yɛ Biblia lɛ mli, shi atsĩii amɛgbɛ́i atã.​—1 Maŋtsɛmɛi 20:37-43.

Ekolɛ, nɔkwɛmɔnii ni sa kadimɔ waa fe enɛɛmɛi po ji ŋwɛi bɔfoi anɔkwafoi lɛ. Ŋwɛi bɔfoi akpekpei ohai abɔ yɔɔ, kɛlɛ amɛteŋ enyɔ too pɛ atsĩ amɛgbɛ́i atã yɛ Biblia lɛ mli​—Gabriel kɛ Mikael. (Daniel 7:10; Luka 1:19; Yuda 9) Bɔfoi krokomɛi ni eshwɛ lɛ fɛɛ, atsĩii amɛgbɛ́i atã yɛ Biblia amaniɛbɔi lɛ amli. Ákɛ nɔkwɛmɔnɔ lɛ, Samson papa, Manoa bi ŋwɛibɔfo ko akɛ: “Te ogbɛiŋ? koni kɛ́ owiemɔi lɛ ná ba mli lɛ, ní wɔjie oyi.” Te ŋwɛibɔfo lɛ to he eha tɛŋŋ? “Mɛɛba obiɔ migbɛi?” Akɛni nakai bɔfo lɛ baa ehe shi hewɔ lɛ, ekpoo akɛ ebaaŋɔ yijiemɔ ni Yehowa pɛ esa akɛ akɛha lɛ eha ehe.​—Kojolɔi 13:17, 18.

Jeee shihilɛ lɛ eko fɛɛ eko mli Biblia lɛ haa anaa nɔ hewɔ ni atsĩ aŋkroaŋkroi komɛi agbɛ́i atã kɛ nɔ hewɔ ni atsĩii mɛi krokomɛi agbɛ́i atã lɛ. Kɛlɛ nibii babaoo yɛ ni wɔbaanyɛ wɔkase kɛjɛ aŋkroaŋkroi anɔkwafoi ni sɔmɔ Nyɔŋmɔ shi jeee yɛ hiɛnyam loo gbɛ́ihemɔ hewɔ lɛ adɛŋ.