Sanebimɔi Ni Jɛ Kanelɔi Adɛŋ

Be ni Satan kɛɛ Hawa akɛ kɛ́ eye ekpakpa kɛ efɔŋ lee tso lɛ nɔ yibii lɛ eko lɛ egboŋ lɛ, ani no mli lɛ eetao Hawa ahe aye akɛ nɔ ko yɛ emli ni gbooo, tamɔ bɔ ni mɛi pii heɔ amɛyeɔ ŋmɛnɛ lɛ?

Etamɔ nɔ ni wɔnyɛŋ wɔkɛɛ nakai. Abonsam ekɛɛɛ Hawa akɛ kɛ́ eye tso ni Nyɔŋmɔ kɛɛ amɛkata he lɛ nɔ yibii lɛ eko lɛ, ebaagbo moŋ, shi nɔ ko ni akɛ hiŋmɛi enaaa baafã kɛjɛ emli (nɔ ni ŋmɛnɛ lɛ mɛi komɛi kɛɛ no ji susuma lɛ) ni eyahi he kroko. Moŋ lɛ, etsɔ onufu lɛ nɔ ekɛɛ lɛ akɛ, kɛ́ eye tso lɛ nɔ yibii lɛ eko lɛ, ‘egboŋ kɔkɔɔkɔ.’ Ni tsɔɔ akɛ, Hawa baaya nɔ ahi wala mli, ni ebaaná miishɛɛ waa, ejaakɛ jeee Nyɔŋmɔ ni baatsɔɔ lɛ nɔ ni efee kɛ nɔ ni ekafee.​—1 Mo. 2:17; 3:3-5.

Kɛ́ onufu lɛ ekɛɛɛ Hawa yɛ Eden abɔɔ lɛ mli akɛ, kɛ́ egbo lɛ, nɔ ko ni akɛ hiŋmɛi enaaa baafã kɛjɛ emli ni eyahi he kroko lɛ, belɛ te fee tɛŋŋ ni ŋmɛnɛ lɛ mɛi kɛɔ nakai lɛ? Wɔnyɛŋ wɔtsɔɔ. Shi nɔ kome ni wɔle ji akɛ, mɛi fɛɛ ni heɔ amale tsɔɔmɔi amɛyeɔ lɛ ahiɛ kpãtã yɛ Noa Nu Afua lɛ mli. Noa kɛ eweku lɛ pɛ yi ná wala, ni amɛ fɛɛ amɛjáa Yehowa.

No hewɔ lɛ, eeenyɛ efee akɛ, Nu Afua lɛ sɛɛ ni mɛi bɔi kɛɛmɔ akɛ nɔ ko yɛ gbɔmɔ mli ni fãa eyahiɔ he ko yɛ egbele sɛɛ, tamɔ bɔ ni mɛi kɛɔ ŋmɛnɛ lɛ. Be ni Nyɔŋmɔ futu mɛi ni yabua amɛhe naa yɛ Babel lɛ awiemɔ, ni ‘amɛgbɛ amɛshwã kɛjɛ jɛmɛ kɛtee shikpɔŋ muu lɛ fɛɛ nɔ’ lɛ, ekã shi faŋŋ akɛ, amɛkɛ susumɔ ni ejaaa nɛɛ tee hei ni amɛtee lɛ. (1 Mo. 11:8, 9) Ekɔɔɔ he eko mɔ ni kɛ amale tsɔɔmɔ nɛɛ ba kɛ bɔ ni fee ni egbɛ eshwã lɛ, wɔle akɛ Satan Abonsam, ni ji “malemɔ tsɛ” lɛ ni hɔ sɛɛ, ni ená he miishɛɛ waa.​—Yoh. 8:44.