Jɔɔmɔi Ni Mɛi Ni Boɔ Nyɔŋmɔ Toi Lɛ Náa

Gbalɔ Mose wie akɛ, kɛ́ wɔye Nyɔŋmɔ kitãi lɛ anɔ lɛ, Nyɔŋmɔ baajɔɔ wɔ. (5 Mose 10:13; 11:27) Jeee gbeyei ni wɔsheɔ akɛ Nyɔŋmɔ baagbala wɔtoi lɛ hewɔ wɔboɔ lɛ toi lɛ. Nyɔŋmɔ sui ni nɔ bɛ lɛ tsirɛɔ wɔ ni wɔboɔ lɛ toi, ejaakɛ wɔsumɔɔ lɛ, ni wɔsumɔɔɔ ni wɔfeɔ nɔ ko ni baahã ewerɛ aho ehe. “Enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ.”​—1 Yohane 5:3.

Shi mɛɛ gbɛ nɔ Nyɔŋmɔ toi ni wɔboɔ lɛ hãa ejɔɔ wɔ? Hã wɔsusu gbɛi enyɔ komɛi ahe.

1. KƐ́ WƆBO NYƆŊMƆ TOI LƐ WƆBAATSƆMƆ HIƐSHIKALƆI

“Mi Yehowa, miji o-Nyɔŋmɔ lɛ, mɔ ni tsɔɔ bo nii koni oná he sɛɛ lɛ, mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ.”​—YESAIA 48:17.

Yehowa Nyɔŋmɔ, wɔ-Bɔlɔ lɛ, le wɔ jogbaŋŋ, ni ekɛ gbɛtsɔɔmɔi ni he hiaa wɔ lɛ hãa wɔ. Kɛ́ wɔmiisumɔ ni etsɔɔmɔi lɛ awa wɔ ni wɔkpɛ yiŋ kpakpai lɛ, no lɛ, esa akɛ wɔkase nɔ ni esumɔɔ ni wɔfee lɛ yɛ Ŋmalɛ Krɔŋkrɔŋ lɛ mli, ni wɔkɛtsu nii.

2. KƐ́ WƆBO NYƆŊMƆ TOI LƐ WƆBAANÁ MIISHƐƐ

“Mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!”​—LUKA 11:28.

Ŋmɛnɛ lɛ, mɛi akpekpei abɔ yɛ anɔkwa miishɛɛ ejaakɛ amɛyeɔ Nyɔŋmɔ Wiemɔ lɛ nɔ. Nuu ko ni yɔɔ Spain lɛ sane maa enɛ nɔ mi. Be ko ni eho lɛ, etsui shaa lɛ waa, ni ekɛ mɛi​—ni eŋa hu fata he lɛ​—yeee jogbaŋŋ. Gbi ko lɛ, ekane Yakob binuu Yosef he sane yɛ gbalɔ Mose niŋmai lɛ amli, ni ena akɛ Yosef he jɔ waa. Ahɔ̃ɔ Yosef akɛ nyɔŋ, ni awo lɛ tsuŋ yɛ nɔ ko ni efeko he; fɛɛ sɛɛ lɛ, emli ejooo, etiu toiŋjɔlɛ sɛɛ, ni ekɛ mɛi ni tɔ̃ enɔ lɛ ahe ke amɛ. (1 Mose, yitso 37-45) Nuu ni yɔɔ Spain lɛ wie akɛ: “Yosef sane lɛ ni mijwɛŋ nɔ lɛ hã mina akɛ, esa akɛ mafee kpoo, mimli ahi, ni maye mihe nɔ. Enɛ hewɔ lɛ, amrɔ nɛɛ miyɛ miishɛɛ waa.”

Ŋmalɛ Krɔŋkrɔŋ lɛ kɛ gbɛtsɔɔmɔi krokomɛi hãa yɛ bɔ ni esa akɛ wɔkɛ mɛi aye ahã lɛ he. Wɔbaasusu gbɛtsɔɔmɔi nɛɛ ahe fitsofitso yɛ sane ni nyiɛ sɛɛ lɛ mli.