Asafoŋ Onukpai, Te Nyɛnaa Mɛi Atsɔsemɔ Nyɛhãa Tɛŋŋ?

1, 2. Mɛni kpokpaa nɔkwɛlɔi eyɔse yɛ asafoi babaoo amli?

KPOKPAA nɔkwɛlɔ ko yasara asafo ko, ni ekɛ asafoŋ onukpai lɛ kpe. Nyɛmimɛi nɛɛ ateŋ mɛi komɛi kɛ etsɛ baafee tipɛŋ. Eyɛ mli akɛ ebasumɔ nyɛmimɛi ni tsuɔ nii waa nɛɛ asane moŋ, shi sane ko ni he hiaa waa yɛ ni miihao lɛ. Be ni eshwɛ fioo ni ekɛ amɛ baagbe kpee lɛ naa lɛ, ekwɛ amɛhiɛ kɛkpe ni ebi amɛ akɛ, “Nyɛmimɛi, ani nyɛnyɛ nyɛtsɔse mɛi krokomɛi yɛ asafo lɛ mli koni anyɛ atu sɔ̃i awo amɛdɛŋ?” Nyɛmimɛi lɛ kai akɛ, nyɛsɛɛ be ni kpokpaa nɔkwɛlɔ lɛ basara amɛ lɛ, ewo amɛ hewalɛ ni amɛhe be babaoo kɛtsɔse mɛi krokomɛi. Jɛmɛ jɔ diŋŋ. Naagbee lɛ, asafoŋ onukpai lɛ ateŋ mɔ kome hã hetoo akɛ, “Wɔnyɛko wɔtsu he nii.” Asafoŋ onukpai krokomɛi lɛ fɛɛ kɛ lɛ kpã gbee.

² Akɛ asafoŋ onukpa lɛ, eji abi bo nakai sane lɛ kulɛ, ekolɛ nakai nɔŋŋ obaahã hetoo. Kpokpaa nɔkwɛlɔi eyɔse akɛ, ehe miihia ni asafoŋ onukpai babaoo ahe be kɛtsɔse nyɛmimɛi oblahii kɛ mɛi ni edara lɛ, koni amɛnyɛ amɛye amɛbua kɛkwɛ asafo lɛ. Kɛ̃lɛ, bei komɛi lɛ nakai feemɔ wa. Mɛni hewɔ?

3. (a) Mɛɛ ŋmalɛi tsɔɔ akɛ ehe miihia ni atsɔse mɛi krokomɛi? Ni mɛni hewɔ esa akɛ enɛ he ahia wɔ fɛɛ lɛ? (Kwɛmɔ shishigbɛ niŋmaa lɛ.) (b) Mɛni hewɔ bei komɛi lɛ, ewa kɛhã asafoŋ onukpai komɛi akɛ amɛbaatsɔse mɛi krokomɛi?

³ Akɛ asafoŋ onukpa lɛ, ole akɛ ehe miihia ni ahe be kɛtsɔse nyɛmimɛi hii.a (Kwɛmɔ shishigbɛ niŋmaa lɛ.) Ole akɛ ehe miihia ni aná nyɛmimɛi hii babaoo ni baaye abua asafoi ni yɔɔ bianɛ lɛ koni amɛhe awa yɛ mumɔŋ, ní agbɛnɛ hu amɛye amɛbua asafoi hei ni abaatotoo wɔsɛɛ lɛ. (Kanemɔ Yesaia 60:22.) Biblia lɛ kɛɔ akɛ esa akɛ ‘otsɔɔ mɛi krokomɛi nii.’ (Kanemɔ 2 Timoteo 2:2.) Shi ekolɛ nakai feemɔ wa kɛhã bo. Esa akɛ otsu oweku lɛ hiamɔ nii srɔtoi lɛ ahe nii, ni oya nitsumɔ hu. Agbɛnɛ hu, esa akɛ otsu asafoŋ sɔ̃i kɛ nibii krokomɛi ni he hiaa lɛ ahe nii. Akɛni dekã bɛ kwraa hewɔ lɛ, hã wɔkwɛ nɔ hewɔ ni ehe miihia ni ohe be kɛtsɔse mɛi krokomɛi.

AMRƆ NƐƐ JI BE NI ESA AKƐ ATSƆSE NYƐMIMƐI HII

4. Mɛni hewɔ bei komɛi lɛ, asafoŋ onukpai komɛi tsiɔ nyɛmimɛi hii atsɔsemɔ amɛtoɔ lɛ?

⁴ Mɛni hewɔ ebaanyɛ ewa kɛhã asafoŋ onukpai komɛi akɛ amɛaahe be kɛtsɔse nyɛmimɛi hii yɛ asafo lɛ mli lɛ? Ekolɛ amɛteŋ mɛi komɛi baasusu akɛ, asafoŋ sɔ̃i krokomɛi ní he miihia yɛ ní esa akɛ amɛtsu he nii amrɔ nɔŋŋ, ni akɛ kɛ́ amɛtsɔseee mɛi bianɛ lɛ, esaŋ asafo lɛ he. Shi ani eji anɔkwale? Eyɛ mli akɛ saji krokomɛi yɛ ni esa akɛ atsu he nii amrɔ nɔŋŋ moŋ, shi kɛ́ atsi nyɛmimɛi hii atsɔsemɔ ato lɛ, ebaanyɛ eye asafo lɛ awui.

5, 6. (a) Gbaa nɔkwɛmɔnɔ ni kɔɔ tsɔnekudɔlɔ lɛ he lɛ. (b) Mɛɛ gbɛ nɔ wɔbaanyɛ wɔkɛ nɔkwɛmɔnɔ nɛɛ ato nyɛmimɛi hii atsɔsemɔ he?

⁵ Susumɔ nɔkwɛmɔnɔ nɛɛ he okwɛ. Tsɔnekudɔlɔi le akɛ, esa akɛ amɛtsake mu ni yɔɔ amɛtsɔne lɛ mli lɛ kpitiokpitio, bɔ ni afee ni tsɔne lɛ akafite. Shi ekolɛ, tsɔnekudɔlɔ ko baanu he akɛ, mu lɛ ni ebaatsake lɛ he ehiaaa tamɔ pɛtro ni ebaahe ewo tsɔne lɛ mli. Ejaakɛ kɛ́ pɛtro lɛ yatã yɛ gbɛ lɛ nɔ lɛ, eka, shi kɛ́ enáaa dekã ni ekɛtsake mu lɛ po lɛ, tsɔne lɛ baanyiɛ. Shi susumɔ ni tamɔ nɛkɛ lɛ yɛ oshara. Kɛ́ tsɔnekudɔlɔ lɛ tsakeee mu lɛ yɛ be naa lɛ, etsɛŋ ni tsɔne lɛ baafite. Naagbee lɛ, ebaafite be kɛ shika babaoo ni ekɛsaa tsɔne lɛ. Mɛni wɔkaseɔ yɛ nɔkwɛmɔnɔ nɛɛ mli?

⁶ Ehe miihia ni asafoŋ onukpai atsu saji ni he hiaa lɛ ahe nii oya, koni ekaye asafo lɛ awui. Tamɔ bɔ ni esa akɛ tsɔnekudɔlɔ lɛ kɛ pɛtro awo etsɔne lɛ mli be fɛɛ be lɛ, esa akɛ asafoŋ onukpai akwɛ ni amɛtsu “nibii ni he hiaa waa lɛ” ahe nii. (Filipibii 1:10) Shi asafoŋ onukpai komɛi hãa saji ni he hiaa lɛ heɔ amɛbe fɛɛ, aahu akɛ, amɛnáaa be ni amɛkɛtsɔse mɛi krokomɛi. Kɛ́ eba lɛ nakai lɛ, ebaafee tamɔ nɔ ni amɛtsakeee mu ni yɔɔ amɛtsɔne lɛ mli lɛ. Kɛ́ asafoŋ onukpai tsi nyɛmimɛi hii atsɔsemɔ amɛto lɛ, be ko baashɛ ni anaŋ nyɛmimɛi hii ni fa bɔ ni sa ni baatsu sɔ̃i ni yɔɔ asafo lɛ mli lɛ ahe nii.

7. Te esa akɛ wɔna asafoŋ onukpai ni heɔ be kɛtsɔseɔ nyɛmimɛi hii lɛ tɛŋŋ?

⁷ No hewɔ lɛ, kaasusu kɔkɔɔkɔ akɛ nyɛmimɛi hii atsɔsemɔ baanyɛ amɛ dã. Asafoŋ onukpai ni le nii lɛ susuɔ bɔ ni amɛsafoi lɛ baafee wɔsɛɛ lɛ he, ni amɛheɔ be kɛtsɔseɔ mɛi krokomɛi. Nɔkwɛlɔi ni tamɔ nɛkɛ lɛ ajara wa hã amɛnyɛmimɛi lɛ. (Kanemɔ 1 Petro 4:10.) Mɛɛ gbɛ nɔ asafo lɛ náa he sɛɛ?

NYƐKƐ NYƐBE ATSUA NII JOGBAŊŊ

8. (a) Mɛni hewɔ esa akɛ asafoŋ onukpai atsɔse mɛi krokomɛi? (b) Mɛɛ sɔ̃ ni he hiaa waa kã asafoŋ onukpai ni sɔmɔɔ yɛ hei ni hiamɔ lɛ da yɛ lɛ anɔ? (Kwɛmɔ akrabatsa ni yitso ji “Kaatsi Oto!”)

⁸ Esa akɛ asafoŋ onukpai ni yɔɔ niiashikpamɔ waa lɛ po akpɛlɛ nɔ ni amɛnu shishi akɛ, be ni amɛ afii lɛ yaa hiɛ lɛ, amɛnyɛŋ amɛtsu nibii ahe nii jogbaŋŋ tamɔ bɔ ni amɛfeɔ amrɔ nɛɛ. (Mika 6:8) Agbɛnɛ hu, esa akɛ asafoŋ onukpai ahã ehi amɛjwɛŋmɔŋ akɛ, oshara ko baanyɛ ‘abanina amɛ trukaa,’ ní baahã ewa kɛhã amɛ akɛ amɛaatsu amɛsɔ̃i ahe nii. (Jajelɔ 9:12; Yakobo 4:13, 14) No hewɔ lɛ, akɛni asafoŋ onukpai sumɔɔ Yehowa webii lɛ, ni amɛsusuɔ amɛhe hewɔ lɛ, amɛbɔɔ mɔdɛŋ amɛtsɔɔ nyɛmimɛi oblahii ni baa lɛ nibii ni amɛkɛ afii babaoo ekase lɛ.​—Kanemɔ Lala 71:17, 18.

9. Mɛɛ shihilɛ ni baaba wɔsɛɛ hewɔ tsɔsemɔ he hiaa lɛ?

⁹ Asafoŋ onukpai ni tsɔseɔ mɛi krokomɛi lɛ wajeɔ amɛsafoi lɛ, ni amɛjara wa hã amɛnyɛmimɛi lɛ yɛ enɛ hu hewɔ. Tsɔsemɔ nɛɛ saa nyɛmimɛi hii babaoo ni amɛnyɛɔ amɛyeɔ amɛbuaa asafo lɛ. Enɛ hãa nyɛmimɛi ni yɔɔ asafo lɛ mli lɛ yaa nɔ amɛyeɔ Nyɔŋmɔ anɔkwa, ni amɛfeɔ ekome. Sui nɛɛ ahe miihia yɛ naagbee gbii ni wɔyɔɔ mli nɛɛ amli, ni ehe baahia waa yɛ amanehulu kpeteŋkpele ni baa lɛ mli. (Ezekiel 38:10-12; Mika 5:4, 5) No hewɔ lɛ, nyɛmimɛi asafoŋ onukpai ni asumɔɔ, nyɛhea be kɛtsɔsea mɛi krokomɛi, ni nyɛjea shishi ŋmɛnɛ.

10. Mɛni ekolɛ ehe baahia ni asafoŋ onukpa ko afee koni ená be kɛtsɔse mɛi krokomɛi?

¹⁰ Wɔle akɛ nyɛbɛ dekã kwraa, ejaakɛ nyɛtsuɔ sɔ̃i krokomɛi ni he hiaa waa ni kɔɔ asafo lɛ he lɛ ahe nii. No hewɔ lɛ, ehe baahia ni nyɛhe be ni nyɛkɛtsuɔ sɔ̃i nɛɛ ahe nii lɛ eko, ni nyɛkɛtsɔse mɛi krokomɛi. (Jajelɔ 3:1) Kɛ́ nyɛfee nakai lɛ, no tsɔɔ akɛ nyɛkɛ nyɛbe miitsu nii jogbaŋŋ, ni asafo lɛ baaná he sɛɛ wɔsɛɛ.

SAAMƆ NIKASELƆ LƐ TSUI

11. (a) Mɛni sa kadimɔ yɛ nibii ni asafoŋ onukpai ni jɛ maji srɔtoi anɔ lɛ wie yɛ nyɛmimɛi hii atsɔsemɔ he lɛ he? (b) Yɛ nɔ ni aŋma yɛ Abɛi 15:22 lɛ naa lɛ, mɛni hewɔ ehe miihia ni wɔsusu nibii ni asafoŋ onukpai nɛɛ wie lɛ ahe lɛ?

¹¹ Nyɛsɛɛ nɛɛ, abi asafoŋ onukpai komɛi ni nyɛ amɛtsɔse nyɛmimɛi hii koni amɛya amɛhiɛ yɛ asafo lɛ mli lɛ gbɛ ni amɛtsɔ nɔ amɛfee nakai.b (Kwɛmɔ shishigbɛ niŋmaa lɛ.) Eyɛ mli akɛ asafoŋ onukpai nɛɛ jɛ hei srɔtoi moŋ, shi nibii ni amɛwie lɛ je amɛhe. Mɛni no tsɔɔ wɔ? No tsɔɔ wɔ akɛ, kɛ́ ajɛ Biblia lɛ mli atsɔse mɛi lɛ, amɛnáa he sɛɛ, ekɔɔɔ he eko “he” ni amɛyɔɔ loo “asafo” mli ni amɛyɔɔ. (1 Korintobii 4:17) No hewɔ lɛ, yɛ nikasemɔ nɛɛ kɛ nɔ ni nyiɛ sɛɛ lɛ mli lɛ, wɔbaasusu nibii ni asafoŋ onukpai nɛɛ wie lɛ ekomɛi ahe. (Abɛi 15:22) Yɛ nikasemɔi nɛɛ amli lɛ, wɔbaatsɛ mɛi ni kɛ tsɔsemɔ lɛ hãa lɛ akɛ tsɔɔlɔi, ni wɔbaatsɛ mɛi ni atsɔseɔ amɛ lɛ, nikaselɔi.

12. Mɛni esa akɛ tsɔɔlɔ ko afee dani etsɔse mɔ ko? Ni mɛni hewɔ enɛ he hiaa?

¹² Klɛŋklɛŋ kwraa lɛ, esa akɛ tsɔɔlɔ lɛ asaa nikaselɔ lɛ tsui. Mɛni hewɔ enɛ he hiaa lɛ? Dani okwaafonyo baadũ dumɔwui lɛ, esa akɛ esaa sũ lɛ dã. Nakai nɔŋŋ esa akɛ tsɔɔlɔ lɛ hu asaa nikaselɔ lɛ tsui dani etsɔɔ lɛ nii. No hewɔ lɛ, te tsɔɔlɔ lɛ baafee tɛŋŋ esaa nikaselɔ lɛ tsui kɛhã tsɔsemɔ? Ebaanyɛ ekase tsɔɔlɔ ko ni he esa waa ni hi shi yɛ blema lɛ. Lɛ ji gbalɔ Samuel.

13-15. (a) Mɛni Yehowa kɛɛ Samuel ni efee? (b) Te Samuel fee tɛŋŋ esaa Saul tsui kɛhã nitsumɔ ni ebaatsu lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (d) Mɛni hewɔ Biblia mli sane nɛɛ he yɔɔ sɛɛnamɔ kɛhã asafoŋ onukpai ni yɔɔ ŋmɛnɛ lɛ?

¹³ Nɔ ni fe afii 3,000 ni eho nɛ, be ni gbalɔ Samuel eda yɛ afii amli lɛ, Yehowa kɛɛ lɛ akɛ: “Wɔ aaafee benɛ yinɔ lɛ mibatsu nuu ko ní jɛ Benyamin shikpɔŋ lɛ nɔ kɛba oŋɔɔ, ni ofɔ lɛ mu owo mimaŋ Israel lɛ nɔ lumɔ.” (1 Samuel 9:15, 16) Samuel na faŋŋ akɛ jeee lɛ ebaanyiɛ Israelbii lɛ ahiɛ dɔŋŋ; Yehowa miisumɔ ni efɔ mɔ kroko mu koni nakai mɔ lɛ anyiɛ maŋ lɛ hiɛ. No hewɔ lɛ, eto gbɛjianɔ koni etsɔse mɔ nɛɛ kɛhã nitsumɔ lɛ.

¹⁴ Enɔ jetsɛremɔ be ni Samuel kɛ Saul kpe lɛ, Yehowa kɛɛ Samuel akɛ: “Naa nuu lɛ.” Amrɔ nɔŋŋ ni Samuel kɛ egbɛjianɔtoo lɛ bɔi nitsumɔ. Samuel fɔ̃ Saul kɛ etsulɔ lɛ nine kɛtee he ko ní amɛyaye nii. Be ni amɛyashɛ lɛ, ehã amɛta he ni hi fe fɛɛ yɛ okpɔlɔ lɛ he, ni ehã amɛ loo ni hi fe fɛɛ lɛ. Samuel kɛɛ Saul akɛ: “Nɔ ni aŋɔto ahão nɛ; ŋɔɔ ma ohiɛ ni oye; ejaakɛ bo akɛto ahã.” Be ni amɛye nii amɛgbe naa lɛ, amɛshi kɛtee Samuel shĩa lɛ. Be ni amɛnyiɛ gbɛ lɛ nɔ kɛyaa lɛ, amɛgba sane kɛ miishɛɛ. Be ni amɛyashɛ shĩa lɛ, Samuel kɛ Saul tee tsũ lɛ yiteŋ, ni ekɛ lɛ “wie yɛ tsũ lɛ yiteŋ” kɛyashi amɛtee amɛyawɔ. Enɔ jetsɛremɔ lɛ, Samuel fɔ Saul mu, eshwɔ enaa, ni ehã lɛ gbɛtsɔɔmɔi. No sɛɛ lɛ, Saul shi kɛtee shĩa. No hewɔ lɛ, Samuel saa Saul jogbaŋŋ kɛhã nitsumɔ lɛ.​—1 Samuel 9:17-27; 10:1.

¹⁵ Samuel fɔ Saul mu akɛ maŋ hiɛnyiɛlɔ. Ni eyɛ faŋŋ akɛ, esoro no kwraa yɛ tsɔsemɔ ni abaatsɔse nyɛmi nuu ko ni ebatsɔ asafoŋ onukpa loo asafoŋ sɔɔlɔ lɛ he. Kɛ̃lɛ, nibii ni he hiaa babaoo yɛ ni asafoŋ onukpai baanyɛ akase yɛ bɔ ni Samuel fee esaa Saul tsui lɛ mli. Nyɛhãa wɔsusua emli enyɔ komɛi ahe wɔkwɛa.

JƐƐ OSUƆMƆ MLI OYE OBUA NIKASELƆ LƐ, NI OKƐ LƐ ABƆ NAANYO

16. (a) Be ni Israelbii lɛ bi ni ahã amɛ maŋtsɛ lɛ, te Samuel nu he tɛŋŋ? (b) Be ni Yehowa kɛɛ Samuel ni efɔ Saul mu lɛ, te efee enii tɛŋŋ?

¹⁶ Jɛɛ osuɔmɔ mli oye obua nikaselɔ lɛ, kaashashao shi. Be klɛŋklɛŋ ni Samuel nu akɛ Israelbii lɛ miitao adesa aye amɛnɔ maŋtsɛ lɛ, edɔ lɛ waa; enu he akɛ amɛkpoo lɛ. (1 Samuel 8:4-8) Enɛ hewɔ lɛ, kulɛ Samuel sumɔɔɔ ni ewoɔ maŋtsɛ ehãa Israelbii lɛ. Shi Yehowa kɛɛ lɛ shii etɛ sɔŋŋ akɛ ebo amɛ toi. (1 Samuel 8:7, 9, 22) Eyɛ mli akɛ Samuel náaa nɔ ni Israelbii lɛ wie lɛ he miishɛɛ moŋ, shi eyeee mɔ ni baaye esɛɛ akɛ amɛhiɛnyiɛlɔ lɛ he awuŋa, ni emli fuuu lɛ hu. Be ni Yehowa kɛɛ lɛ ni efɔ Saul mu lɛ, eshashaooo shi kwraa. Ejɛ esuɔmɔ mli ebo Yehowa toi, ejaakɛ esumɔɔ Yehowa.

17. Mɛɛ gbɛ nɔ asafoŋ onukpai ni yɔɔ ŋmɛnɛ lɛ kaseɔ Samuel? Ni mɛɛ gbɛ nɔ enɛ hãa amɛnáa miishɛɛ?

¹⁷ Ŋmɛnɛ lɛ, asafoŋ onukpai babaoo ni yɔɔ niiashikpamɔ lɛ ekase Samuel. Amɛjɛ amɛsuɔmɔ mli amɛtsɔse mɛi krokomɛi. (1 Petro 5:2) Asafoŋ onukpai ni mli hi nɛɛ miisumɔ ni amɛtsɔɔ mɛi krokomɛi nii, ni egbaaa amɛnaa akɛ abaaŋɔ amɛsɔɔmɔ hegbɛi lɛ ekomɛi ahã nikaselɔi lɛ. Moŋ lɛ, amɛnaa nikaselɔi lɛ akɛ ‘amɛnanemɛi nitsulɔi’ ni jara wa, ní baaye abua amɛ kɛtsu asafo lɛ hiamɔ nii ahe nii. (2 Korintobii 1:24; Hebribii 13:16) Asafoŋ onukpai nɛɛ fooo amɛ pɛ amɛnɔ mli, ni amɛnáa miishɛɛ kɛ́ amɛna ni nikaselɔi lɛ kɛ amɛnyɛmɔi miiwa Yehowa webii lɛ.​—Bɔfoi 20:35.

18, 19. Mɛni asafoŋ onukpa ko baanyɛ afee kɛsaa nikaselɔ ko tsui kɛhã tsɔsemɔ? Ni mɛni hewɔ enɛ he hiaa lɛ?

¹⁸ Okɛ nikaselɔ lɛ abɔ naanyo. Be ni Samuel kɛ Saul kpe lɛ, kulɛ ebaanyɛ ewo mu lɛ ni etsɔ̃ eshwie eyiteŋ oyayaayai, ni ewo lɛ gbɛ. Eji efee nakai kulɛ, efɔ Saul mu akɛ maŋtsɛ moŋ nɛ, shi esako lɛ kɛhako nitsumɔ ni ebaatsu akɛ Nyɔŋmɔ webii lɛ ahiɛnyiɛlɔ lɛ. No hewɔ lɛ, yɛ nɔ najiaŋ ni Samuel baafee nakai lɛ, ehe be kɛsaa Saul tsui kɛhã nitsumɔ lɛ. Dani ebaafɔ lɛ mu lɛ, ekɛ lɛ ye nii, amɛyashara shi, amɛgba sane be kpalaŋŋ, ni amɛjɔɔ amɛhe po. No hewɔ lɛ, wɔnaa akɛ Samuel mɛ kɛyashi be ni sa dani efɔ Saul mu akɛ maŋtsɛ.

¹⁹ Nakai nɔŋŋ eji ŋmɛnɛ. Dani asafoŋ onukpa ko baabɔi nyɛmi nuu ko tsɔsemɔ lɛ, esa akɛ ekɛ lɛ abɔ naanyo dã. Esoro nɔ ni asafoŋ onukpai ni yɔɔ maŋ kome nɔ lɛ baafee koni nikaselɔi abatsɔmɔ amɛnanemɛi lɛ, yɛ nɔ ni asafoŋ onukpai ni yɔɔ maŋ kroko nɔ lɛ baafee lɛ he. Kɛ̃lɛ, yɛ maŋ fɛɛ maŋ nɔ lɛ, kɛ́ yɛ dekã ni asafoŋ onukpai lɛ bɛ lɛ fɛɛ sɛɛ lɛ amɛná be amɛhã nikaselɔi lɛ, nikaselɔi lɛ baana akɛ amɛsane kã amɛtsui nɔ. (Kanemɔ Romabii 12:10.) Bɔ fɛɛ bɔ ni fee lɛ, nikaselɔi lɛ ahiɛ baasɔ asafoŋ onukpai lɛ waa yɛ suɔmɔ ni amɛjieɔ lɛ kpo amɛtsɔɔ amɛ lɛ, kɛ dekã ni amɛnáa amɛhãa amɛ lɛ hewɔ.

20, 21. (a) Kɛ́ tsɔɔlɔ ko baaye omanye lɛ, mɛni esa akɛ efee? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

²⁰ Kɛ́ tsɔɔlɔ ko baaye omanye lɛ, esa akɛ esumɔ nitsɔɔmɔ. Shi jeee no pɛ. Esa akɛ esumɔ mɛi ni etsɔɔ amɛ nii lɛ hu. (Okɛto Yohane 5:20 lɛ he.) Mɛni hewɔ? Ejaakɛ, kɛ́ esumɔɔ mɛi ni etsɔɔ amɛ nii lɛ, amɛbaana akɛ esusuɔ amɛhe, ni amɛbaaná he miishɛɛ akɛ amɛaabo nɔ ni etsɔɔ amɛ lɛ toi ni amɛkɛtsu nii. No hewɔ lɛ, asafoŋ onukpai, nyɛbɔa mɔdɛŋ ni nyɛkɛ mɛi ni nyɛtsɔɔ amɛ nii lɛ abɔa naanyo.​—Abɛi 17:17; Yohane 15:15.

²¹ Kɛ́ asafoŋ onukpa ko saa nikaselɔ ko tsui egbe naa lɛ, ebaanyɛ ebɔi lɛ tsɔsemɔ. Shi mɛɛ gbɛi anɔ ebaanyɛ etsɔ etsɔse lɛ? Wɔbaasusu sane nɛɛ he yɛ nikasemɔ ni nyiɛ sɛɛ lɛ mli.