1 Korentjen

6 Kidonk frè-mwen, Apolòs épi mwen menm, nou fè sé bagay-tala pou fè zòt dibien, pou épi ègzanp-nou zòt aprann règ-tala : « Pa alé pli lwen ki sa ki matjé », é pou zòt pa mété an moun pli wo pasé an lòt pou bat lèstonmak-zòt. 7 Pas ki moun ki ka fè ou diféran di an lòt moun ? Wi, kisa ou ni, si sé pa risivwè ou risivwè’y ? É si sé risivwè ou risivwè’y, poutji ou ka vanté kòw konsidiré ou pa té risivwè’y ? 9 I ka sanm mwen Bondié prézanté nou ki apòt an dènié, kon moun ki kondané a lanmò, pas nou vini an èspèktak ba lèmonn, lé zanj épi lézòm. 10 Nou sòt akòz di Kris, men zòt, zòt saj gras a Kris. Nou fèb men zòt fò, yo ka onoré zòt men yo ka méprizé nou. 11 Jik atjèlman, nou ka kontinié fen épi swèf, nou près tou-ni, yo ka bat nou, nou pa ni kay 12 é nou ka tjwé kònou pou travay épi lanmen-nou. Lè yo ka ensilté nou, nou ka béni ; lè yo ka pèsékité nou, nou ka andiré épi pasians ; 13 lè yo ka manti anlè nou pou fè nou mal, nou ka réponn épi dousè. É jik alè yo ka pran nou pou zòdi monn-tala, sa sosiété-a ka jété.