1 Tésalonisien

2 Zòt bien sav sa, frè, lè nou pasé lakay-zòt sa pòté bon rézilta. 2 Magré nou té koumansé pa soufè épi yo té trété nou épi ensolans lè nou té Filip, kon zòt sav, Bondié-nou an ba nou kouraj pou anonsé zòt bon nouvèl Bondié, magré goumen nou té ni pou goumen. 7 Okontrè, nou vini dous an mitan zòt, kon an manman ka ba timanmay-li tété épi ka pran swen di yo épi tandrès. 8 Konsa, pas nou ni anpil tandrès ba zòt, nou té bien désidé di zòt bon nouvèl Bondié, é plis ankò jis lavi-nou nou té paré pou ba zòt, balan nou té enmen zòt. 10 Zòt pé témwayé é Bondié tou, ki nou toujou rété fidèl, jis épi san ripwòch parapòt a zòt sé kwayan-an. 13 Mi sé pou sa nou ka di Bondié mèsi toulong, pas, lè zòt risivwè pawòl Bondié nou ba zòt la, zòt té dakò épi’y, pa konsidiré sé té pawòl nonm, men pou sa i yé toulbon : pawòl Bondié, ki ka aji anlè zòt, sé kwayan-an. 17 Frè, lè yo vini séparé nou pou an titak tan (an manniè fizik men pa adan tjè-nou), nou fè tousa nou té pé pou viré-wè zòt, afòs nou té anvi. 18 Kidonk nou té lé vini kay-zòt, wi mwen menm, Pòl, man éséyé an fwa, menm dé fwa, men Satan koubaré chimen-nou.