Akt

9 Men pas Sòl té vréman anrajé kont disip Senyè-a, i té lé tjwé yo. Alò, i alé kay gran prèt-la 2 é i mandé’y lèt pou pòté ba sé sinagòg Damas-la, pou maré épi mennen Jérizalèm tout sé moun-lan i té ké jwenn ki adan Chimen-an, ki nonm ki fanm. 3 Toupandan i té ka maché, lè i té près rivé Damas, an limiè anni sòti an sièl-la épi koumansé kléré tout alantou’y. 4 I tonbé atè-a épi i tann an vwa ki té ka di’y : « Sòl, Sòl, poutji ou ka pèsékité mwen ? » 5 I mandé’y : « Ki moun ou yé, Senyè ? » Vwa-a réponn li : « Man sé Jézi ou ka pèsékité a. 6 Mété kòw doubout épi antré adan vil-la. Lè ou ké rivé, yo kèy di’w sa’w pou fè. » 7 Sé nonm-lan ki té ka vwayajé épi’y rété èstébékwé. Sa vré yo té ka tann an vwa, men yo pa té ka wè pèsonn. 8 Sòl mété kòy doubout é, menmsi zié’y té gran ouvè, i pa té ka wè ayen. Kidonk yo tjenbé lanmen’y épi yo mennen’y Damas. 9 É pandan twa jou, i pa té ka wè ayen, é i rété san manjé épi i pa bwè ayen. 10 I té ni an disip ki té ka rété Damas, non’y sé té Ananias. Adan an vizion Senyè-a di’y : « Ananias ! » I réponn : « Mi mwen, Senyè. » 11 Senyè-a di’y konsa : « Lévé, alé adan lari-a yo ka kriyé Dwèt, kay Jida, épi mandé ba Sòl, an nonm Taws. Pas i la ka pridié, 12 é adan an vizion, i wè an nonm yo ka kriyé Ananias antré épi mété lanmen anlè’y pou’y pé sa viré wè. » 13 Men Ananias réponn : « Senyè, man ja tann anlo moun palé di nonm-tala, é man tann manniè i fè sé moun-lan ou chwazi Jérizalèm soufè. 14 É sé chèf sé prèt-la ba’y dwa arété tout sé moun-lan ki ka mété konfians-yo an non’w. » 15 Men Senyè-a di’y konsa : « Alé ! Pas nonm-tala sé zouti-a man chwézi pou pòté non-mwen ba sé nasion-an, ba sé wa-a, é ba yich Izrayèl. 16 Man kéy montré’y aklè tousa i kèy ni pou sipòté pou non-mwen. » 17 Kidonk, Ananias pati, épi lè i rantré andidan kay-la, i pozé lanmen’y anlè’y épi i di : « Sòl, frè-mwen, Senyè-a Jézi, ki parèt douvan’w asou chimen-an pandan ou té ka vini, vréyé mwen koté’w pou’w pé sa viré-wè klè é pou’w pé sa plen épi lèspri sen. » 18 É lamenm sé konsi zékay sòti an zié’y, é i viré wè klè. Kidonk i lévé épi i pran batizé ; 19 apré, i manjé épi i ripran fòs. I rété yonn-dé jou épi sé disip-la ki té Damas, 20 épi lamenm, i koumansé préché asou Jézi adan sé sinagòg-la, pou anonsé i sé Yich Bondié. 21 Tout sé moun-lan ki té ka tann li té ka rété ababa é yo té ka di : « Atann ! Sé pa misié ki té ka maltrété moun Jérizalèm ki té ni konfians adan non-tala ? Sé pa misié ki vini isiya pou tjenbé yo épi mennen yo ba sé chèf sé prèt-la ? » 31 Alò, toupatou Lajidé, Lagalilé épi Lasamari, lasanblé-a antré adan an tan lapé é i té ka vini pli solid. Kantité sé disip-la té ka kontinié vini pli gran, pas lasanblé-a té ka maché adan lakrent Jéova, épi adan konsolasion lèspri sen. 42 Jopé tout antiè aprann nouvèl-tala, é anpil moun koumansé kwè adan Senyè-a. 43 Lè i té Jopé, Piè rété lontan kay an tanè yo ka kriyé Simon.