Akt

2 Étjèn réponn : « Nonm, frè épi papa, kouté. Bondié-a ki plen laglwa parèt douvan zansèt-nou Abraam pandan i té Lamézopotami, avan i vini rété Aràn, 3 épi i di’y : “Kité péyi’w èk lafanmi’w, épi alé adan péyi-a man ké montré’w la.” 9 É chèf sé fanmi-an vini jalou Jozèf ; yo vann li an péyi Léjip. Men Bondié té épi’y, 10 é i délivré’y anba tout léprèv-li ; i ba’y lasajès é i pèwmèt li trapé favè Farawon, wa Léjip. Épi, Farawon mété’y gouvènè Léjip épi tout kay-li. 23 « Lè i té ni 40 lanné, i désidé alé wè sé frè’y la, sé yich Izrayèl-la. 24 Lè i wè yo té ka maltrété yonn adan yo, i défann-li é i tjwé Éjipsien-an ki té ka maltrété’y, pou vanjé’y. 25 I té ka pansé sé frè’y la té ké konprann Bondié té ka sové yo gras a li, men yo pa konprann sa. 26 Landèmen-an, i vini toupandan dé adan yo té ka goumen, é i éséyé mété yo dakò épi mété lapé. I di : “Nonm, zòt frè. Poutji zòt ka fè yonn a lòt ditò ?” 27 Men moun-lan ki té ka maltrété lòt-la ripousé Moyiz, épi i di’y : “Ki moun ki mété’w chèf épi jij anlè nou ? 28 Ou pa lé tjwé mwen kon ou tjwé Éjipsien-an yè, pa vré ?” 29 Lè Moyiz tann sa, i chapé-kouri alé Madian. La, i viv kon an étranjé é i trapé dé gason. 52 Ki pwofèt zansèt-zòt pa pèsékité ? Pou vré, yo tjwé sé pwofèt-la ki té ka anonsé alavans ki Moun-lan ki jis té ka vini, é sé zòt ki trayi’y épi tjwé’y, 53 sé zòt ki risivwè Lalwa sé zanj-lan ba, men zòt pa rèspèkté’y. » 55 Men Étjèn ki té plen lèspri sen, gadé sièl-la é i wè laglwa Bondié épi Jézi doubout adwèt Bondié, 56 é i di : « Gadé ! Mwen ka wè sièl-la gran wouvè épi Yich nonm-lan doubout adwèt Bondié. » 57 Alò yo kriyé épi tout fòs vwa-yo, yo bouché zorèy-yo épi lanmen-yo, é yo tout tonbé anlé’y. 58 Apré yo jété Étjèn andéwò vil-la, yo lapidé’y. Sé moun-lan ki té témwayé kont li, mété rad-yo an pié an jenn boug yo té ka kriyé Sòl. 59 Toupandan yo té ka vréyé wòch anlè’y, Étjèn sipliyé konsa : « Senyè Jézi, risivwè lèspri-mwen. » 60 Apré sa, i tonbé ajounou, épi i kriyé bien fò : « Jéova, pa konté yo sa kon péché. » É apré i di sa, i pran sonmèy adan lanmò.