Ègzòd

3 Moyiz vini bèrjé : i té ka gadé zannimo bo-pè’y, Jétwo, prèt Madian. Lè i té ka mennen twoupo-a pa koté lwès dézè-a, i fini pa rivé montann vré Bondié-a, Orèb. 2 Zanj Jéova parèt douvan’y adan an flanm difé an mitan an touf zépin. Lè i gadé, Moyiz wè touf zépin-lan té ka pri difé, men i pa té ka brilé. 3 A lè-tala i di : « Man ké alé titak pli pré pou gadé bagay-tala ki pa nòwmal épi pou wè poutji touf zépin-lan pa ka brilé. » 4 Lè Jéova wè i té ka vansé pou gadé, i kriyé’y dépi an mitan touf zépin-lan : « Moyiz ! Moyiz ! » I réponn : « Mi mwen. » 5 Alò i di : « Pa vini pli pré. Tiré sandal-ou, pas koté-a ou doubout la, sé an tè sakré ki la. » 6 Apré i di : « Mwen sé Bondié papa’w, Bondié Abraam, Bondié Izaak épi Bondié Jakòb. » Lamenm Moyiz kouvè fidji’y, pas i té pè gadé vré Bondié-a. 7 Jéova di’y ankò :« Vréman, man wè soufwans pèp-mwen Léjip, é man tann yo kriyé anmwé palakòz travay fòsan yo ka mété anlè do-yo. Man bien konnèt doulè-yo. 8 Man ké désann pou sové yo anba lanmen sé Éjipsien-an, pou fè yo sòti adan péyi-tala épi mennen yo adan an péyi ki bèl, ki gran, an péyi éti lèt épi mièl ka koulé kon dlo, téritwè Kananéyen, Itit, Amorit, Périzit, Ivit épi Jébizéyen. 9 Sa vré, tout kriyé-anmwé pèp Izrayèl-la rivé jik obò mwen, é man wè osi sé Éjipsien-an fè yo wè mizè. 10 Kidonk kouté ! Man ké vréyé’w douvan Farawon, é ou ké fè pèp-mwen, sé Izrayélit-la, sòti Léjip. » 14 Alò Bondié di Moyiz : « “Man ké divini sa man désidé divini”. » É i di : « Mi sa ou kèy di sé Izrayélit-la : “‘Man ké divini’ vréyé mwen bò zòt.” » 15 Apré, Bondié di Moyiz ankò : « Mi sa ou ké di sé Izrayélit-la : “Jéova, Bondié zansèt-zòt, Bondié Abraam, Bondié Izaak, é Bondié Jakòb, sé li ki vréyé mwen bò zòt.” Sé non-mwen ki la pou toujou, é sé épi non-tala yo pou sonjé mwen, jénérasion apré jénérasion.