1 Wa

10 Répitasion Salomon té ka ba Jéova anpil lonnè, é rèn Saba-a té tann palé di’y. Kidonk i vini wè’y pou pozé’y kèsion ki rèd. 2 I rivé Jérizalèm épi an foul-moun, épi chamo ki té ka pòté luil a bòm, an patjé lò épi bèl piè ka kouté chè. I prézanté kòy douvan Salomon épi i palé ba’y asou tousa i té ni an tjè’y. 3 Salomon réponn tout sé kèsion’y lan. Ayen pa té two rèd ba wa-a, i té kapab èsplitjé’y tousa i té mandé. 4 Rèn Saba-a wè tout sajès Salomon-an, kay-la i té konstwi a, 5 manjé-a i té ka manjé, manniè sé fonksionnè-a té asiz bò tab-la, manniè sé sèvitè-a té ka sèvi épi rad-la yo té ni, sé moun-lan ki té ka sèvi diven-an, épi sé sakrifis-la i té ka ofè an tanp Jéova-a. Lè i wè tousa, i rété èstébékwé ! 6 Kidonk i di wa-a : « Sa man té tann adan péyi-mwen anlè tousa ou fè é anlè sajès-ou, tousa té vré alò ! 7 Man pa té ka kwè tousa yo té ka di mwen anlè’w, jiktan man vini épi man wè sa adan dé zié-mwen. Pou vré, yo pa té di mwen lanmwatié tout sajès-ou épi richès-ou. Yo pli wo pasé tousa yo té di mwen. 8 Mi bonè pou nonm ki épi’w, mi bonè pou sèvitè’w ki la tout lè épi’w, épi ki ka tann pawòl-ou ki plen sajès ! 9 Louwanj pou Jéova Bondié’w, li ki mété’w wa asou Izrayèl pas i té enmen’w anpil. Sé pas Jéova enmen Izrayèl pou tout tan i mété’w wa pou tout moun rèspèkté lajistis épi lalwa. » 10 Apré sa i ba wa-a 120 talan lò, anlo luil a bòm épi bèl piè ka kouté chè. Yo pa janmen mennen an bondans luil a bòm konsa ankò, kon rèn Saba-a té ba wa Salomon.