Matié

7 Lè disip Jan pati, Jézi koumansé palé ba foul-la parapòt a Jan é i di yo : « Kisa zòt alé wè adan dézè-a ? An rozo van-an ka soukwé ? 8 Donk, kisa zòt alé wè ? An nonm abiyé épi rad bien ganmé ? Pou vré, sé moun-lan ki ka pòté rad bien ganmé sé kay sé wa-a sé moun-tala ka rété ! 9 Alò, kisa zòt alé wè ? An pwofèt ? Wi, man ka di zòt, é moun-tala sé pa an pwofèt sèlman ki la. 10 Sé parapòt a moun-tala i matjé : “Mi mésajé-mwen man ka vréyé douvan’w ; i kèy préparé chimen-an douvan’w.” 11 Vréman mwen ka di zòt sa, pami tout sé nonm-lan, pa ni yonn ki té pli gran ki Jan Lèbatis. Men an piti adan wayòm-lan ki an sièl-la, pli gran ki’y. 12 Dépi Jan Lèbatis vini jik aprézan, wayòm-lan ki an sièl-la, sé dèyè’y anlo moun ka kouri pou trapé’y, é sé moun ki ka fè gwo éfò ka rivé trapé’y. 13 Pas tout, sé Pwofèt-la é Lalwa-a, pwofétizé jiktan Jan rivé. 14 Ki ou dakò ki ou pa dakò, sé li “Éli ki pou rivé”. 25 A moman-tala, Jézi di : « Papa, Senyè sièl-la épi latè-a, mwen ka gloriyé’w douvan tout moun, pas ou séré sé bagay-tala ba moun ki saj épi ki gran-grèk, men ou fè sé timanmay-la konnèt sé bagay-tala. 28 Vini bò mwen, zòt tout ki bien las, é ki ka pòté chaj ki lou, épi man kay dousi tjè-zòt. 29 Pran jouk-mwen anlè zépòl-zòt é suiv lègzanp-mwen, pas mwen, man dous èk plen limilité, épi zòt kèy trapé konsolasion. 30 Pas jouk-mwen fasil pou pòté é chaj-mwen pa lou. »