2 Timoté

2 é sé bagay-la man di’w la, é anlo témwen konfirmé yo, di yo ba nonm ki fidèl, é yo menm, lè yo ké kalifié, yo ké ansénié lézòt. 10 Mi sé pou sa man ka kontinié andiré tout bagay pou sé moun-lan yo chwézi-a, pou yo osi yo sové gras a Kris Jézi, épi pou yo trapé laglwa étèrnèl. 14 Kontinié fè yo sonjé sé bagay-tala ; douvan Bondié ba yo lòd pa pèd tan-yo ka diskité asou mo, pas sa pa ka sèvi ayen, okontrè sa ka fè moun ki ka kouté ditò. 15 Fè tousa ou pé pou prézanté kòw douvan Bondié kon an nonm ki ni favè’y, an ouvriyé ki pa ni piès rézon pou i wont, ki ka èsplitjé pawòl vérité-a bienkonmifo. 16 Men mété asou koté pawòl initil ki ka sali sa ki sen, pas pli sa ké alé é pli yo ké dérèspèkté Bondié, 17 é pawòl sé moun-tala kèy simayé kon lagangrenn. Andidan yo i ni Iméné épi Filèt. 18 Sè nonm-tala ladjé lavérité, pas yo ka di larézirèksion ja fèt, é sa ka malmennen lafwa yonn-dé moun. 19 Magré sa, fondasion solid Bondié mété-a pa ka brennen. I ni an mak anlè’y ki matjé : « Jéova konnèt moun ki ta’y » épi « Tout nonm ki ka pòté non Jéova, ni pou sispann fè sa ki mové ». 22 Kidonk viré do ba lanvi lajénès, men fè mannèv pou trapé lajistis, lafwa, lanmou, lapé, épi moun ki ka mété konfians-yo adan Bondié ki ni an tjè ki pwòp. 23 Anplis, mété asou koté déba ki sòt épi initil, pas sé sa ki ka mennen kankan. 24 Pas an èsklav Senyè-a pa ni pou goumen ; okontrè, fòk i dous épi tout moun, fòk i sa ansénié, fòk i sa tjenbé kòy lè yo ka fè’y ditò, 25 fòk i sa enstwi épi dousè moun ki pa adan an bon dispozision. Pétèt Bondié ké endé yo ripanti, konsa yo kèy pé ni lakonésans ègzak asou lavérité, 26 épi yo ké pé viré-vini adan bon sans yo é sòti adan zatrap Djab-la, ki té trapé yo vivan pou yo fè volonté’y.