Jénèz

39 Sé Ismaélit-la mennen Jozèf Léjip. Yo vann li ba an Éjipsien yo té ka kriyé Potifa, an fonksionnè lakou Farawon, chèf lagad wa-a. 2 Men Jéova té épi Jozèf. Sé pou sa Jozèf té ka réyisi tousa i té ka fè, é mèt-li, Éjipsien-an, mété’y rèsponsab anlè kay-li. 3 É mèt-li wè Jéova té épi’y é ki Jéova té ka fè’y réyisi tousa i té ka fè. 4 Mèt Jozèf-la té kontan’y é i chwazi’y pou i sèvi’y. Potifa ba’y lanmen anlè tout kay-li épi i mété’y rèsponsab pou i véyé anlè tousa ki té ta’y. 5 Dépi jou-a Potifa ba Jozèf lanmen anlè kay-li épi mété’y rèsponsab véyé anlè tousa ki té ta’y, Jéova pa sispann béni kay Éjipsien-an parapòt a Jozèf. Jéova simen bénédision anlè tousa ki té ta’y, ki andidan kay-li, ki anlè chan’y. 6 Anfinaldikont, Potifa kité Jozèf jéré tousa ki té ta’y. I pa té ka otjipé ayen ankò tout tan i té ni manjé pou manjé. Anplis, Jozèf té vini fò épi bèl gason. 7 Madanm Pitifa koumansé lonviyé Jozèf épi i té ka di’y : « Kouché épi mwen ! » 8 Men li i té ka rifizé é i té ka di madanm mèt-li : « Kouté, mèt-mwen ba mwen lanmen anlè tousa ki ta’y épi i pa ka otjipé ayen ankò an kay-la. 9 Pa ni pèsonn ki ni plis lotorité pasé mwen adan kay-tala, é pa ni ayen i rifizé mwen, sòf wou, pas ou sé madanm-li. Ki manniè man sé pé fè an bagay mové konsa, épi péché kont Bondié ? » 10 Jou apré jou i té ka chofé zorèy Jozèf, men jenmen i pa asèpté ni kouché épi’y ni rété épi’y. 11 An jou i antré an kay-la pou fè travay-li, é pa té ni piès dòt sèvitè ki té la. 12 Kidonk madanm-lan tjenbé’y pa rad-li, épi i di’y : « Kouché épi mwen ! » Men i anni kité rad-li an lanmen’y épi i pran kouri déwò.