Èstè

9 Atak viré épi i transmèt Èstè sa Mardoché té di. 10 Kidonk Èstè vréyé Atak ba Mardoché répons-tala : 11 « Tout sé fonksionnè wa-a é moun ki ka rété adan téritwè wa-a sav, si an nonm oben an fanm, ka vini adan lakou-a ki andidan palé-a san wa-a envité’y, sé an sèl lwa ki ni pou’y : yo pou tjwé’y. Sèl manniè pou i kontinié viv, sé si wa-a ka lonjé ba’y baton an lò-a. É sa ka fè 30 jou wa-a poko kriyé mwen pou parèt douvan’y. » 12 Lè Mardoché tann sa Èstè di, 13 i fè’y sav : « Fòk pa ou konprann, pas ou adan fanmi wa-a, ou ni mwens chans pasé lézòt Juif-la pou yo tjwé’w. 14 Pas si ou pa ka palé aprézan, sé Juif-la ké touvé an pal an lòt koté é yo ké sové. Men wou épi lafanmi papa’w, zòt ké mò. É ès sé pa pou lapéti an sitiyasion konsa ou vini rèn ? » 15 Alò Èstè réponn Mardoché : 16 « Alé, sanblé tout sé Juif-la ki ka rété Siz, épi fè an jenn ba mwen. Pa manjé ni bwè pandan twa jou, lajounen kon lannuit. Mwen épi sèrvant-mwen, nou ké fè an jenn osi. Man ké parèt douvan wa-a, menm si lalwa ka kondané sa. É si man pou mò, man ké mò. » 17 Alò, Mardoché pati é i fè tousa Èstè té mandé’y.