Matié

7 « Sispann jijé, é yo pé ké jijé zòt. 2 Pas sé manniè zòt ka jijé, yo ké jijé zòt, é sé menm manniè zòt ka miziré, yo ké miziré ba zòt. 7 « Pa sispann mandé, é yo ké ba’w. Pa sispann chèché, é ou ké touvé. Pa sispann konyen lapòt, é yo ké wouvè ba’w. 11 Kidonk, si zòt ki mové, zòt sa ba timanmay-zòt bon bagay, jijé-wè Papa-a ki an sièl-la ké sa ba moun ki ka mandé’y, bon bagay ! 12 « Kidonk, tousa zòt lé moun fè ba zòt, zòt pou fè’y ba yo tou ; avrédi, sé sa Lalwa èk sé Pwofèt-la ka aprann nou. 13 « Antré pa lapòt-la ki étwèt. Pas lapòt-la ki ka mennen a lanmò laj, é lawout-tala gran, é an patjé moun ka antré pa lapòt-tala, 14 men lapòt-la ki ka mennen a lavi étwèt, é chimen-tala piti, é pa ni anlo moun ki ka touvé’y. 15 Prangad sé fo pwofèt-la, ki ka vini bò zòt dégizé an mouton, men an réyalité sé dé lou voras ki la. 16 Sé silon fwi yo ka pòté zòt kèy rikonnèt yo. Yo pa ka rékòlté rézen oben fig asou piébwa ki ni pitjan, pa vré ? 17 Sé menm manniè-a, tout bèl piébwa ka pòté bèl fwi, men tout piébwa ki pouri ka pòté mové fwi. 18 An bèl piébwa pé pa pòté mové fwi, é an piébwa ki pouri pé pa pòté bèl fwi. 19 Tout piébwa ki pa ka pòté bèl fwi, yo ka koupé’y é jété’y an difé. 20 Menm manniè-a, sé silon fwi yo ka pòté zòt kèy rikonnèt sé moun-tala. 21 « Sé pa tout moun ki ka di mwen : “Senyè, Senyè”, ki ké antré adan wayòm-lan ki an sièl-la, men sé moun-lan sèlman ki ka fè volonté Papa-mwen ki an sièl-la. 24 « Moun-lan ki ka tann sé pawòl-la man fini di é ki ka aplitjé yo, ké kon an nonm plen sajès ki konstwi kay-li anlè wòch. 25 Lapli-a tonbé fò, dlo monté, van souflé fò, men kay-la pa krazé, pas fondas-li pozé anlè wòch. 28 Lè Jézi fini diskou’y la, foul-moun lan rété ababa douvan manniè i té ka ansénié, 29 pas sé kon an moun ki ni lotorité i té ka ansénié, pa kon sé èspésialis Lalwa-a.