Akt

17 Apré sa, yo travèsé Anfipolis é Apolonia épi yo rivé Tésalonik, éti sé Juif-la té ni an sinagòg. 2 Kon i té ni labitid fè, Pòl antré adan sinagòg-la, é pandan twa saba i rézonnen épi yo silon Lékriti-a. 3 Toupandan i té ka ba yo dé pasaj Lékriti, i té ka èsplitjé èk ba yo laprèv ki fòk Kris-la té soufè épi résisité di lanmò, èk i té ka di : « Sé Jézi-a man ka palé’w la, sé li menm ki Kris-la. » 4 Kifè, yonn-dé adan yo vini kwayan épi yo vini jwenn Pòl épi Silas ; i ni anlo Grèk ki té ka adoré Bondié épi anlo madanm enpòwtan ki fè menm bagay-la. 11 Sé Juif Béré-a té ni pli méyè santiman pasé sé Juif Tésalonik-la, pas yo risivwè pawòl-la épi anpil lanprèsman, èk yo pran tan dékatiyé Lékriti-a touléjou, pou gadé-wè si sa yo té ka di yo, té vré poubon. 16 Pandan Pòl té ka atann yo Atèn, sa mété’y an kolè lè i wè vil-la té plen zidòl. 17 I koumansé rézonnen adan sinagòg-la épi sé Juif-la é lézòt moun-lan ki té ka adoré Bondié, é i fè sa touléjou, anlè plas maché-a osi, épi moun ki té la. 22 Pòl doubout an mitan Laréyopaj-la épi i di : « Moun Atèn, dapré sa man wè, i ka sanm zòt ni plis ki dòt lakrent ba bondié-zòt. 23 Kontèl, pandan man té ka pasé adan vil-la épi man pran tan gadé bagay zòt ka sèvi pou ladorasion, man jis touvé an lotèl ki té matjé asou’y : “Ba an Bondié nou pa konnèt.” Sa zòt ka adoré san konnèt, sé sa man ka anonsé zòt. 25 Sé pa lanmen nonm ki pé fè ayen ba’y non pli, konsidiré i sé pé ni bizwen an bagay, pas sé li ki ka ba tout moun lavi-a, é souf-la, é tout bagay. 26 É i koumansé épi an sèl nonm pou fè tout sé nasion-an pou yo abité asou tout latè. I fiksé tan osi épi i mété limit koté pou moun rété, 27 pou yo chèché Bondié, menm si yo tatonnen, épi touvé’y vréman, pas pou vré i pa lwen nou chak la. 28 Pas sé li ki fè si nou ni lavi, si nou pé boujé é si nou ka ègzisté. Yonn-dé powèt-zòt jik di : “Pas nou sé yich-li tou.” 30 Sa vré, té ni an tan, Bondié fèmen zié asou moun ki pa té sav, men atjèlman i ka anonsé ba tout moun épi toupatou yo pou ripanti kòyo, 31 pas i mété an jou éti i ké sèvi an nonm i chwézi pou jijé latè épi jistis. É i ba tout limanité an garanti lè i résisité moun-tala. » 33 Kidonk Pòl pati-kité yo, 34 men yonn-dé alé épi’y é yo vini kwayan. Adan yo té ni Dèni, ki té jij tribinal Laéwopaj, an fanm yo té ka kriyé Damaris, épi dòt moun ankò.