Jak

1 Mwen menm Jak, èsklav Bondié èk Senyè Jézikri, man ka ékri ba sé 12 tribi-a ki simayé toupatou : Salitasion ! 2 Konsidéré sé an vré lajwa, frè-mwen, lè zòt ka jwenn divès léprèv, 3 pas zòt sav, lè lafwa-zòt tèsté konsa, sé landirans i ka pòté. 4 Men kité landirans-lan fè travay-li, pou zòt ni tousa ki fo, pou zòt san défo an tout sans, pou zòt pa mantjé ayen. 5 Donk, si yonn di zòt mantjé sajès, fòk i mandé Bondié tout lè, pas Bondié donan épi tout moun épi i pa ka fè ripwòch, é i ké ba’y li. 13 Pèsonn pa pou di anba léprèv : « Sé Bondié ka tèsté mwen. » Pas pèsonn pé pa tèsté Bondié épi mové bagay, é li menm pa ka mété pèsonn anba léprèv épi bagay konsa. 14 Men chak moun ka jwenn léprèv lè i ka kité pwòp lanvi’y mennen’y épi pran lèspri’y. 17 Tout bèl don é tout kado pawfé ka sòti di anwo ; yo ka désann di Papa sé limiè-a ki an sièl-la, li ki pa ka ni boujé ni chanjé, pa kon sé lonbraj-la ki ka déplasé kòyo. 19 Mi sa pou zòt sav, frè-mwen man enmen : fòk an moun toujou paré pou kouté, pa cho palé é pa cho lévé-faché, 20 pas lè an nonm an kòlè, sé pa sa ki jis an zié Bondié i ka fè. 22 Men, sé pa kouté sèlman fòk zòt kouté, pou pa kouyonnen pwòp kòzòt épi rézònman ki pa bon, men fòk zòt vini dé moun ki ka aplitjé pawòl-la. 23 Pas si an moun ka kouté pawòl-la épi pa ka aplitjé’y, i kon an moun ka gadé fidji’y adan an miwè. 24 I ka gadé kòy, i ka pati, épi i ka bliyé lamenm ki kalté moun i yé. 25 Men moun-lan ki ka plonjé zié’y adan lwa pawfé-a, lwa lalibèté, é ki ka kontinié fè’y, pa ka vini an moun ki ka kouté épi oubliyé lamenm, men an moun ki ka aplitjé pawòl-la. É i ké ni tjè-kontan adan sa i ka fè. 26 Si an moun ka pansé i sé an adoratè Bondié, men i pa sa tjenbé lang-li, sé pwòp tjè’y i ka badinen, é ladorasion’y pa ni valè. 27 Mi sé sa an ladorasion ki pwòp, san piès malpwòpté an zié Bondié-nou èk Papa-nou : pran swen timanmay ki pa ni paran-yo ankò, épi pran swen sé vèv-la adan léprèv-yo, é rété véyatif pou pa kité monn-lan sali nou.