Matié

2 Apré Jézi nèt Bètléyèm Lajidé, an tan wa Éwòd, i té ni astwològ ki té sòti Lès ki rivé Jérizalèm. 2 Yo di : « Ki koté timanmay-la ki fèt é ki pou vini wa sé Juif-la yé ? Nou wè zétwèl-li lè nou té Lès é nou vini koubé tèt nou douvan’y. » 3 Lè wa Éwòd aprann sa, i té twoublé, é tout moun ki té ka abité Jérizalèm té twoublé tou. 4 I sanblé tout sé chèf sé prèt-la épi sé èspésialis Lalwa-a, é i mandé yo ki koté Kris-la té pou wè jou. 5 Yo réponn li : « Bètléyèm ki an Jidé, pas sé sa pwofèt-la ékri : 6 “Kantapou wou, o Bètléyèm ki an péyi Jida, asiré ou pa vil-la ki ni mwens valè douvan sé dirijan Jida-a. Pas sé di’w an moun ké sòti pou dirijé, moun-tala ké an bèrjé ba pèp-mwen Izrayèl.” » 7 Alò Éwòd fè yo kriyé sé astwològ-la an sikré é i mandé yo ki tan èkzaktiman zétwèl-la té parèt. 8 Apré sa i vréyé yo Bètléyèm é i di yo : « Alé laba-a épi bien chèché timanmay-la. Lè zòt kéy twouvé’y, vini di mwen’y, pou mwen osi man pé sa alé koubé tèt-mwen douvan’y. » 9 Apré yo fini risivrè enstriksion wa-a, yo pati. É zétwèl-la yo té wè, lè yo té a Lès, pati douvan yo jiktan i rivé anlè kay-la, la éti timanmay-la té yé, é zétwèl-la rété doubout la. 10 Lè yo wè zétwèl-la, yo réjwi kòyo anlo. 11 Lè yo antré adan kay-la, yo wè timanmay-la épi manman’y, Mari, é yo tonbé ajounou toupandan yo koubé tèt-yo douvan’y. Yo ouvè osi sé trézò-a yo té pòté épi yo ofè’y kado : lò, oliban épi mir. 12 Men, pas adan an rèv Bondié té avèti yo pa ritounen kay Éwòd, yo ripati an péyi-yo pa an lòt chimen. 13 Apré yo pati, zanj Jéova-a parèt douvan Jozèf adan an rèv épi i di’y : « Lévé, chapé-kouri Léjip épi timanmay-la èk manman’y, é rété la jistan mwen di’w ritounen. Pas Éwòd kèy chèché timanmay-la pou tjwé’y. » 14 Kidonk pandan lannuit, Jozèf lévé, i pran timanmay-la épi manman’y, é i pati Léjip. 15 I rété laba-a jistan Éwòd mò. Sé konsa tou sa Jéova di gras a pwofèt-li akonpli : « Mwen kriyé gason-mwen pou’y sòti Léjip. » 16 Lè Éwòd wè sé astwològ-la té kouyonnen’y, i lévé mouch-wouj. I ba lòd tjwé tout ti gason ki té ni dé zan ouben ki té pli piti, ki té ka rété Bètléyèm épi oliwon’y. I té ka tjenn kont di moman-an sé astwològ-la té ba’y la. 17 Sé konsa, pawòl pwofèt Jérémi akonpli. I té di : 18 « Yo tann an vwa an vil Rama ki ka pléré épi ki ka kriyé anmwé. Sé Rachèl ki ka pléré timanmay-li, é i pa dakò pou yo konsolé’y, pas yo pa la ankò. » 19 Apré lanmò Éwòd, zanj Jéova-a parèt adan an rèv Jozèf fè, lè i té Léjip. 20 I di’y : « Lévé, pran timanmay-la épi manman’y, épi ritounen an Izrayèl, pas sé moun-lan ki té lé tjwé timanmay-la mò. » 21 Kidonk, i lévé épi i ritounen an Izrayèl épi timanmay-la èk manman’y. 22 Men lè i aprann sé Arkélayis ki té ka gouvèné Lajidé alaplas papa’y, Éwòd, i té pè alé. Anplis di sa, pas Bondié té avèti’y adan an rèv, i pati Lagalilé. 23 Alò i enstalé kòy adan an vil, yo ka kriyé Nazarèt, pou pawòl sé pwofèt-la akonpli. Yo té anonsé : « Yo kéy kriyé’y Nazaréyen. »