2 Korentjen

6 Pas nou ka travay ansanm épi Bondié, nou ka sipliyé zòt pa asèpté favè Bondié nou pa mérité, épi apré pou mantjé lòbjèktif-li. 2 Pas i di : « Adan an tan oti man té ka ba favè-mwen, man tann ou, é adan an jou libérasion, man sové’w. » Gadé ! Sé atjèlman bon moman-an. Gadé ! Sé atjèlman jou délivrans-lan. 3 An piès manniè, nou pa ka ba pèsonn lokazion trilbiché, pou yo pa kritiké ministè-nou ; 4 men an tout sans, nou ka montré nou menm nou sé minis Bondié, épi landirans nou ni adan anpil léprèv, adan malè, adan moman lapenn, adan difikilté, 5 épi kou nou risivwè, lajòl nou fè, gawoulé, travay rèd, lannuit san dòmi, rété san manjé, 6 épi pwòpté, konésans, pasians, bonté, épi lèspri sen, épi an lanmou ki pa ipokrit, 7 épi pawòl ki vré, épi puisans Bondié, épi zam lajistis, ta lanmen dwèt la épi ta lanmen gòch la, 8 ki adan laglwa ki adan mépri, ki nou ni an mové ki nou ni an bon répitasion. Yo ka pran nou pou dé kouyonnè magré nou ka di lavérité, 9 kon moun pèsonn pa konnèt magré moun sav ki moun nou yé, kon moun ki près mò magré nou bien vivan, kon moun yo pini men nou pa kondané a mò, 10 kon moun ki dan lapenn men nou toujou ni tjè-kontan, kon moun ki pòv men ki ka rann anlo moun rich, kon moun ki pa ni ayen magré nou ni tout bagay. 11 Korentjen, nou pa séré pou palé ba zòt, é nou ouvè tjè-nou ba zòt tou gran. 12 Nou pa ka mété bariè douvan lanmou nou ni pou zòt, men zòt, zòt ka mété bariè douvan lanmou zòt ni pou nou. 13 Kidonk, pas nou nou enmen zòt — man ka palé ba zòt kon timanmay-mwen — zòt tou, ouvè tjè-zòt tou gran. 14 Pa fè piès sanblaj malpapay épi moun ki pa kwayan. Pas ki liannaj ki pé ni ant sa ki jis é sa lalwa ka kondané ? Oben ès yo pé migannen limiè épi fè-nwè ? 15 Oben ki liannaj ki pé ni ant Kris épi Bélial ? Oben ankò ki lasosiyasion ki pé ni ant an kwayan épi an moun ki pa ka kwè ? 16 Épi kisa tanp Bondié ni a wè épi sé zidòl-la ? Pas nou sé tanp an Bondié ki vivan ; kon Bondié ja di : « Mwen kèy rété épi yo, mwen kèy maché an mitan yo, mwen kèy Bondié-yo, épi yo kèy pèp-mwen. » 17 « Sé poutji, sòti an mitan yo, èk pran ran-zòt, sé sa Jéova di, épi sispann menyen sa ki pa sen » ; « épi mwen kèy risivwè zòt. » 18 « É mwen kay divini an papa ba zòt, épi zòt kay vini gason épi fi ba mwen, sé sa Jéova di, li ki Tou-Puisan. »