Jòb

2 Apré sa, jou-a rivé éti sé yich vré Bondié-a antré pou doubout douvan Jéova, é Satan tou antré épi yo pou doubout douvan Jéova. 2 É Jéova di Satan : « Koté ou sòti ? » Satan réponn Jéova : « Man té la ka pwonmnen anlè latè épi man té ka gadé sa ka fèt. » 3 Apré, Jéova di Satan : « Ès ou pran tan gadé sèvitè-mwen Jòb ? Pa ni pa an moun kon’y anlè latè. Sé an nonm fidèl épi dwèt, ki ni lakrent Bondié é ki ka chapé-kouri douvan sa ki mal. É i ka kontinié rété fidèl menm si’w ka éséyé pousé mwen détwi’y san rézon. » 4 Men Satan réponn Jéova : « Sé viv ki konté ! An nonm kapab ba tousa i ni pou sové lavi’y. 5 Pou chanjé titak, lonjé lanmen’w, épi menyen ki zo’y ki lachè’y, é asiré, i ké gadé’w an mitan zié pou modi’w. » 6 Alò Jéova di Satan : « Gadé ! Sé an lanmen’w i yé ! Sèl bagay, pa tjwé’y ! » 7 Satan sòti douvan Jéova épi i fè anlo gwo bouton ka fè mal lévé anlè Jòb, dépi plat-pié’y jik an tèt-li. 8 Kidonk, Jòb asiz adan sann, épi i pran an mòso pòt pou graté kòy. 9 Anplis, madanm-li di’y : « Ès ou ka kontinié rété fidèl ? Anni modi Bondié épi mò ! » 10 Men i réponn li : « Ou ka palé kon an moun ki pèd tèt-li ! Ès fòk nou asèpté sèlman bon bagay vré Bondié-a ka ba nou ? Ès fòk pa nou asèpté mové bagay tou ? » Magré tout fè i pran, Jòb pa péché adan pawòl-li.