Jan

2 Épi twazièm jou-a, té ni an gran fèsten mariyaj Kana, Lagalilé, é manman Jézi té la. 2 Jézi épi sé disip-li a, yo osi, yo té envité adan fèsten mariyaj-la. 3 Diven-an té près fini, é manman Jézi di’y : « Yo pa rété diven ankò. » 4 Men Jézi réponn li : « Fanm, an ki sans sa ka gadé nou, wou épi mwen ? Lè-mwen poko rivé. » 5 Manman’y di sé moun-lan ki té ka sèvi : « Fè tousa i ké di zòt. » 6 É la i té ni sis ja fèt an wòch ki té pozé la, kon lalwa sé Juif-la té ka mandé pou yo nétwayé kòyo. Adan yo chak la, yo té pé mété dé ouben twa mizi . 7 Jézi di yo : « Plen sé ja-a épi dlo. » Kidonk, yo plen sé ja-a orabò. 8 Apré sa i di yo : « Atjèlman, pran tibren adan épi pòté’y ba rèsponsab fèsten-an. » Alò yo pòté’y ba’y. 9 Rèsponsab fèsten-an gouté dlo-a ki té fini tounen diven. I pa té sav koté diven-tala té sòti, men, sé sèvitè-a ki té pran dlo-a té sav koté. Kidonk rèsponsab fèsten-an kriyé nonm-lan ki té ka mayé 10 épi i di’y : « Tout moun ka sèvi bon diven-an avan, épi lè moun koumansé boulé, yo ka sèvi diven-an ki pa djè bon apré. Wou, ou atann jikalè pou sèvi bon diven-an. » 11 Sa fèt lè i té Kana, an Galilé. Sé té prèmié mirak Jézi, é sé konsa i montré laglwa’y, épi sé disip-li a koumansé kwè an li. 12 Apré sa, i désann Kafarnawòm épi manman’y, sé frè’y-la èk sé disip-li a. Men yo rété la yonn-dé jou sèlman. 13 Kon fèt Lapak sé Juif-la té toupré rivé, Jézi monté Jérizalèm. 14 Adan Tanp-lan, i touvé vandè ki té ka vann bèf, mouton épi kolonb, épi moun ki té ka chanjé lajan asiz asou chèz-yo. 15 Alò i fè an fwèt épi kòd, é i mété yo déwò épi mouton-yo èk bèf-yo. I fè yo sòti an Tanp-lan, épi i jété atè piès lanmonné sé moun-lan ki té ka chanjé lajan, épi i maté tab-yo. 16 Épi i di sé moun-lan ki té ka vann kolonb : « Tiré sé bagay-tala isiya ! Arété pran kay Papa-mwen pou an gran maché ! » 17 Sa fè sé disip-li a sonjé sa ki matjé : « Lanmou man ni ba kay-ou ké brilé andidan mwen. » 18 Alò sé Juif-la di’y : « Ki mirak ou pé montré nou pou ou pèwmèt kòw fè sé bagay-tala ? » 19 Jézi réponn yo : « Krazé tanp-tala, é an 3 jou man ké rilévé’y. » 20 Alò sé Juif-la di : « Yo pran 46 lanné pou bati tanp-tala, é wou, ou kéy viré lévé’y an 3 jou ? » 21 Men tanp-lan i té ka palé a, sé té kò’y. 22 Alò lè yo wè Jézi té résisité, sé disip-la sonjé i té ka di yo sa souvan. É yo kwè Lézékriti épi sa Jézi té ka di. 23 Men, pandan i té Jérizalèm pou fèt Lapak-la, anlo moun ki wè sé mirak-la i té ka fè, koumansé ni lafwa an non’y. 24 Men Jézi pa té ka fè yo konfians, pas i té konnèt yo tout 25 é i pa té bizwen pèsonn èsplitjé’y ayen anlè lézòm, pas i té sav sa ki té andidan tjè an nonm.