Matié

10 Prangad pou pa ni mépri ba yonn di sé toupiti-tala, pas man ka di zòt, yo ni zanj-yo nan sièl ki toujou douvan fidji Papa-mwen ki nan sièl. 12 « Sa zòt ka pansé ? Si an nonm ni 100 brèbi épi i ni yonn adan ki pèdi, ès i pé ké kité sé 99-la adan montann-lan pou pati chèché tala ki pèdi a ? 13 É si i touvé’y, asiré man ka di zòt i ké pli kontan ba tala pasé lé 99-la ki pa té pèdi. 14 Menm manniè-a, Papa-mwen ki an sièl-la pa lé an sèl adan sé piti-tala mò. 15 « Si frè’w péché kont ou, pran’y apa pou èsplitjé’y fòt-la i fè a. Si’y ka kouté’w, ou genyen frè’w. 16 Men si’y pa ka kouté’w, pran épi’w yonn oben dé moun, pou tout bagay réglé dapré pawòl dé ou twa témwen. 17 Si’y pa ka kouté yo, palé ba lasanblé-a. Si’y pa ka kouté lasanblé-a nonpli, fè épi’y konsidiré sé an nonm sé nasion-an ouben an moun ka ranmasé lajan lenpo-a. 23 « Sé pou sa, yo pé konparé wayòm sièl-la épi an wa ki té lé réglé kont-li épi sèvitè’y. 24 Lè i koumansé fè sa, yo mennen ba’y an nonm ki té dwé’y 10 000 talan. 25 Men nonm-tala pa té ni doukwé ranbousé lajan-tala. Alò mèt-li, pou trapé lajan’y, ba lòd pou yo vann, ki li, ki madanm-li, ki yich-li, épi tousa ki té ta’y. 26 Kidonk, sèvitè-a tonbé ajounou, koubé tèt-li douvan’y épi i di’y : “Pran pasians épi mwen. Man ké ranbousé’w tout.” 27 Mèt-la santi konpasion pou’y. I kité’y pati é i tiré dèt-li. 28 Men, sèvitè-tala alé dèyè an lòt sèvitè ki té dwé’y 100 dènié. I tjenbé’y pa gòj épi i di’y : “Ranbousé mwen sa ou dwé mwen.” 29 Lòt sèvitè-a tonbé ajounou épi i koumansé sipliyé’y : “Pran pasians épi mwen. Man ké ranbousé’w.” 30 Men i pa té lé. I fè yo jété’y lajòl, tout tan i pa ranbousé’y sa i té dwé’y. 31 Lè sé lézòt sèvitè-a wè sa ki té pasé, yo vini tris menm é yo alé rakonté mèt-la tousa ki té fèt. 32 Alò mèt-la fè kriyé sèvitè-a épi i di’y : “Mové boug, man tiré tout dèt-ou lè ou sipliyé mwen. 33 Ès wou aprézan, ou pa té pou ni konpasion pou kanmarad-ou, menm manniè man té ni konpasion ba’w ?” 34 Kidonk mèt-la, lévé faché épi ladjé’y anba lanmen sé gad lajòl-la, jiktan i ranbousé tousa i té dwé’y. 35 Sé konsa Papa-mwen ki an sièl-la ké fè épi zòt chak la si zòt pa padonnen frè-zòt épi tout tjè-zòt. »