Izayi

40 « Konsolé, konsolé pèp-mwen, sé sa Bondié-zòt ka di. 3 Vwa an moun ka rélé adan dézè-a : « Paré chimen-an ba Jéova ! Fè an gran wout ki dwèt an mitan dézè-a ba Bondié-nou. 5 Laglwa Jéova ké parèt aklè, é tout moun ké wè’y, pas sé an bouch Jéova sa sòti. » 8 Zèb-la ka vini sèk, é flè-a ka fennen, men pawòl Bondié-nou ka rété pou toujou. » 11 Toukon an bèrjé, i ké choyé twoupo’y. I ké sanblé sé ti mouton-an épi bwa’y, i ké mété yo anlè lèstonmak-li. Épi dousè, i ké mennen sé brèbi-a ki ka ba piti-yo tété. 22 Bondié ka rété pa anwo boul latè, é moun ki asou latè kon sotrèl. I ka sispann sièl-la kon an vwèl fin, èk i ka ouvè’y kon an tant pou moun rété anba’y. 26 Lévé zié-zòt an sièl-la épi gadé. Ki moun ki kréyé tout sé bagay-tala ? Sé Moun-lan ki ka fè yo maché kon an lawmé, ka konté yo yonn pa yonn ; i ka kriyé yo tout épi non-yo. Pas i ni an bidim lénèrji épi an gran lafòs, pa ni yonn ki mantjé. 28 Ou pa sav sa ? Sé tann ou pa tann ? Jéova, Kréyatè tout latè-a, sé li ki Bondié pou toujou. Janmen i pa ka fatidjé, janmen i pa ka las. Lentèlijans-li san fon. 29 I ka ba lafòs moun-lan ki las, é sé moun-lan ki pa ni lafòs, i ka rann yo vidjò. 30 Sé ti bolonm-lan ké las é yo ké pèd fòs, sé jenn-jan an ké trilbiché é yo ké tonbé, 31 men moun ki ka mété lèspwa-yo adan Jéova ké viré pran fòs. Yo ké volé wo nan sièl-la konsidiré yo té ni zèl kon lèg. Yo ké kouri san yo las ; yo ké maché san yo fatidjé. »