1 Wa
4 Men kantapou Éli, i antré adan dézè-a. I maché pandan tout jounen-an épi i fini pa asiz anba lonbraj an piébwa. Alò, i mandé lanmò’y. I di : « Man pé pa ankò. Tjwé mwen Jéova, pas man pa pli bon pasé ayèl-mwen ! 9 La, i antré adan an kavenn pou i pasé lannuit. Pandan lannuit-la, Jéova mandé’y : « Sa’w ka fè la, Éli ? » 10 Éli réponn : « Man aji épi anpil difé ba’w, Jéova Bondié Chèf lawmé. Men sé Izrayélit-la, yo ladjé lalians-ou, yo krazé lotèl ki té ta’w, é yo tjwé pwofèt-ou épi lépé. Sé mwen yonn ki rété. É atjèlman sé tjwé yo lé tjwé mwen ! » 11 Men Bondié di’y : « Sòti, épi mété kòw asou montann-lan douvan Jéova. » Épi Jéova té ka pasé douvan Éli, é an gran van ki té fò menm, té ka fann sé montann-lan épi krazé sé woché-a douvan Jéova, men Jéova pa té adan van-an. Apré van-an, an tranmanntè fèt, men Jéova pa té adan tranmanntè-a. 12 Apré tranmanntè-a, té ni an difé, men Jéova pa té adan difé-a. Apré difé-a, té ni an vwa kalm ki té tou dous. 13 Dépi Éli tann vwa-a, i vlopé fidji’y épi rad-li, i sòti déwò épi i té douvan lantré kavenn-lan. Alò vwa-a mandé’y : « Sa’w ka fè la Éli ? » 14 Éli réponn : « Man travay épi anpil balan ba’w, Jéova Bondié-a ki Chèf sé lawmé-a. Men sé Izrayélit-la ladjé lalians-ou, yo krazé sé lotèl-ou a é yo tjwé sé pwofèt-ou a épi lépé. Sé mwen yonn ki rété. É atjèlman yo lé tjwé mwen ! » 15 Alò Jéova di’y : « Viré pa chimen-an ou vini an épi alé adan dézè Damas-la. Lè’w ké rivé la, ou ké chwazi Azayèl pou i vini wa Siri. 16 Jéyi ti-yich Nimchi, ou ké chwazi’y pou i vini wa Izrayèl. É Élizé yich Chafat, ki ka rété Abèl-Méola, ou ké chwazi’y pou i vini pwofèt apré’w. 17 Moun-lan ki ké chapé anba lépé Azayèl, sé Jéyi ki ké tjwé’y. É moun-lan ki ké chapé anba lépé Jéyi, sé Élizé ki ké tjwé’y. 18 I ni ankò 7 000 nonm an péyi Izrayèl ki pa ajounou douvan Baal pou adoré’y, é ki pa bo sé èstati’y la. » 19 Kidonk Éli pati. I jwenn Élizé yich Chafat ki té la ka labouré latè épi 12 pè toro douvan’y, li menm té ka tjenbé 12ièm pè-a. Alò Éli vini bò’y épi i jété rad pwofèt-li anlè’y. 20 Lamenm Élizé ladjé sé toro-a, i kouri apré Éli épi i di’y : « Souplé, kité mwen alé bo papa-mwen épi manman-mwen. Apré man ké alé épi’w. » Éli réponn li : « Alé, antré lakay-ou, man pa ka anpéché’w fè sa. »