1 Korentjen

8 Aprézan, parapòt a nouriti moun ka ofè sé zidòl-la : Nou tout la sav nou ni an konésans anlè sa. Men, lakonésans ka anflé an moun épi lòwgèy, alòs ki lanmou ka rann pli solid. 4 Pou zafè manjé-a yo ka ofè sé zidòl-la, nou sav an zidòl pa ayen, é sé an sèl Bondié ki ni. 5 Sa vré, i ni sa yo ka kriyé « bondié », ki nan sièl, ki asou latè — é poutoutbon, i ni an patjé « bondié » é an patjé « senyè » —, 6 men pou nou, i ni an sèl Bondié, Papa-a. Tout bagay ka vini di’y, é sé ba’y nou ka viv. I ni an sèl Senyè, Jézikri, sé li Bondié sèvi pou fè tout bagay, é sé li Bondié sèvi pou nou èkzisté. 7 Men, tout moun pa ni konésans-tala. Lè sé moun-lan ki té ka adoré zidòl avan, ka manjé sé manjé-tala, sé konsidiré sé té an sakrifis pou zidòl, é konsians-yo ki fèb, ka bat yo. 8 Men, sé kalté manjé-tala pa ka fè nou vini pli pré Bondié ; lè nou pa ka manjé yo, nou pa ka pèd ayen, é lè nou ka manjé yo, nou pa ka genyen ayen. 9 Men fòk zòt toujou fè atansion pou dwa-a zòt ni di désidé, pa fè moun ki fèb trilbiché. 10 Pas si wou ki ni lakonésans, ou ka manjé adan tanp an zidòl, épi an moun ki ni an konsians fèb ka wè’w, ès konsians-li pé ké fè’y manjé sa yo ofè sé zidòl-la ? 11 Kidonk, pas ou ni lakonésans, ou pé fè an nonm ki fèb pèd chimen’y, pwòp frè’w éti Kris mò ba’y.