Danièl

3 Apré sa, wa-a mandé Achpénaz, chèf fonksionnè lakou wa-a, mennen-vini yonn-dé Izrayélit, kontèl sa ki sòti adan fanmi an wa oben adan an fanmi woplasé. 4 Falé yo té jenn épi an kò san défo, bèl, plen sajès, plen konésans épi bon jijman, épi falé yo té sa sèvi wa-a adan palé-a. Achpénaz té ké aprann yo ékri épi palé lang sé Kaldéyen-an. 5 Anplis di sa, wa-a té lé yo ba yo, chak jou, an pa adan sé manjé-a ki té pli méyè a épi diven-an yo té ka sèvi anlè tab wa-a. Yo té ké risivwè an fòwmasion pandan twa zan, épi lè twa zan-an fini, yo té ké koumansé sèvi wa-a. 6 Pami yo, té ni ki té sòti adan tribi Jida-a : Danièl, Anania, Michaèl épi Azarias. 7 Kidonk chèf fonksionnè lakou wa-a ba yo non : pou Danièl, i kriyé’y Bèlchatza, Anania, i kriyé’y Chadrak, Michaèl, i kriyé’y Méchak, épi Azarias, i kriyé’y Abèd-Négo. 8 Men, Danièl désidé an tjè’y pa sali kòy épi sé manjé-a ki té pli méyè a épi diven-an yo té ka sèvi anlè tab wa-a. Kidonk i mandé chèf fonksionnè lakou wa-a pou i pa manjé sé manjé-tala ki té ké sali’y.