Jòb

1 I té ni adan péyi Ouz-la an nonm yo té ka kriyé Jòb. I té fidèl épi dwèt ; i té ni lakrent Bondié é i té ka chapé kouri douvan sa ki mal. 6 Men, jou-a rivé éti sé yich vré Bondié-a antré pou doubout douvan Jéova, é Satan tou antré épi yo. 7 É Jéova di Satan : « Koté ou sòti ? » Satan réponn Jéova : « Man té la ka pwonmnen anlè latè épi man té ka gadé sa ka fèt. » 8 Apré, Jéova di Satan : « Ès ou pran tan gadé sèvitè-mwen Jòb ? Pa ni pa an moun kon’y anlè latè. Sé an nonm fidèl épi dwèt, ki ni lakrent Bondié é ki ka chapé-kouri douvan sa ki mal. » 9 Men Satan réponn Jéova : « Ès sé pou ayen Jòb ka krenn Bondié ? 10 Ès sé pa wou ki drésé an bariè tout alantou’y, alantou kay-li é alantou tousa ki ta’y, pou pwotéjé’y ? Ou béni tousa i fè épi lanmen’y, é bèt ki ta’y simayé kon kann adan péyi-a. 11 Pou chanjé titak, lonjé lanmen’w épi tiré tousa i ni, épi asiré, i ké gadé’w an mitan zié pou modi’w. » 12 Alò Jéova di Satan : « Gadé ! Tousa ki ta’y adan lanmen’w. Sèl bagay, pa lévé lanmen anlè’y ! » Kidonk Satan sòti douvan Jéova. 13 An jou, gason épi tifi Jòb té ka manjé épi bwè diven lakay pli gran frè-yo. 14 An mésajé vini di Jòb : « Sé bèf-la té ka labouré tè épi sé fimèl bourik-la té ka manjé zèb bò yo, 15 lè sé Sabéyen-an anni tonbé anlè yo épi pati épi yo, é yo tjwé sé sèvitè-a épi lépé. Sé mwen sèlman ki rivé chapé pou man vini di’w sa. » 16 I té ka palé toujou lè an lòt rivé épi i di : « Difé Bondié anni sòti nan sièl, i pri anlè sé mouton-an épi sé sèvitè-a, épi i brilé yo an sann ! Sé mwen sèlman ki rivé chapé pou man vini di’w sa. » 17 I té ka palé toujou lè an lòt rivé épi i di : « Sé Kaldéyen-an fè twa bann, épi yo soté anlè sé chamo-a ; yo pati épi yo épi yo tjwé sé sèvitè-a épi lépé. Sé mwen sèlman ki rivé chapé pou man vini di’w sa. » 18 I té ka palé toujou lè an lòt rivé épi i di : « Gason’w épi tifi’w té ka manjé épi bwè diven lakay pli gran frè-yo. 19 An sèl kou, an gran van ki sòti adan dézè-a anni tonbé anlè kat kwen kay-la, kifè kay-la tonbé anlè sé jenn-jan an, épi yo mò. Sé mwen sèlman ki rivé chapé pou man vini di’w sa. » 20 Alò Jòb lévé-doubout, i déchiré rad-li épi i koupé chivé’y. Apré i tonbé atè, i bésé tèt-li jik atè 21 épi i di : « Mwen té tou-ni lè mwen sòti an vant manman-mwen, é sé tou-ni mwen kay viré an tè. Jéova ba é Jéova ripran. Fèt ki non Jéova kontinié gloriyé. » 22 Magré tousa, Jòb pa péché é i pa janmen di ki Bondié fè an bagay ki mové.