Éfézien

6 Timanmay, kouté lé paran-zòt an akò épi Senyè-a, pas sé an bagay ki jis. 2 « Ba papa’w épi manman’w lonnè-yo » sé prèmié koumandman ki ni an pwonmès dèyè’y. Mi pwonmès-la : 3 « Pou tout bagay bien maché ba’w é pou’w rété lontan asou latè. » 4 É zòt ki papa, pa pran tèt timanmay-zòt, men kontinié édiké yo épi prensip èk avètisman Jéova. 10 Pou fini, kontinié anmasé puisans adan Sényè-a épi adan lafòs-li ki puisan. 11 Abiyé kòzòt épi rad konba Bondié ba zòt pou zòt pa pri adan zatrap Djab-la ; 12 pas nou ni pou goumen, pa kont san-an épi lachè-a, men kont sé gouvènman-an, kont sé lotorité-a, kont sé chèf monn-tala ki an fè-nwè, kont sé lèspri méchan an ki an sièl-la. 14 Kidonk tjenbé rèd, maré ren-zòt séré épi senti lavérité, pwotéjé lèstonmak-zòt épi rad lajistis, 15 é mété pié-zòt adan soulié ka ba balan pou anonsé bon nouvèl lapé-a. 16 Anplis di tousa, pran gran boukliyé lafwa-a, pou zòt pé sa étenn tout flèch difé méchan-an ka vréyé. 19 Prédié ba mwen tou, pou man pé sa touvé sé mo-a lè man ka ouvè bouch-mwen, pou man pé sa palé épi kouraj, lè man ka aprann yo sikré bon nouvèl-la ki sakré.