1 Jan

4 Biennenmen, fòk pa zòt kwè tout pawòl enspiré, men fòk zòt analizé sé pawòl enspiré-a pou wè si yo ka sòti di Bondié, pas anlo fo pwofèt sòti adan monn-lan. 7 Zòt mwen si enmen, annou kontinié ni lanmou yonn pou lòt, pas lanmou ka vini di Bondié, é tout moun ki enmen ka vini di Bondié é konnèt Bondié. 8 An moun ki pa ni lanmou, pa aprann konnèt Bondié, pas Bondié sé lanmou. 9 Mi sé konsa lanmou Bondié vini klè parapòt a nou : Bondié vréyé sèl Yich-li adan monn-lan, pou nou pé sa trapé lavi gras a li. 10 Adan ka-tala, mi sé sa ki lanmou : sé pa nou ki montré lanmou pou Bondié, men sé li ki montré lanmou pou nou lè’y vréyé Yich-li kon sakrifis pou kouvè péché-nou é ki ka rékonsilié nou épi’y. 11 Zòt man enmen, si sé konsa Bondié enmen nou, nou osi nou oblijé ni lanmou yonn pou lòt. 12 Pèsonn pa janmen wè Bondié. Si nou ka kontinié ni lanmou yonn ba lòt, Bondié ka rété andidan nou, é lanmou’y ka vini pawfé andidan nou. 16 É nou aprann konnèt lanmou-a Bondié ni ba nou, épi kwè adan lanmou-tala. Bondié sé lanmou, é moun-lan ki ka rété adan lanmou ka rété lianné épi Bondié, é Bondié ka rété lianné épi’y.