Lik

4 Jézi, plen épi lèspri sen, kité Jouden-an, é lèspri-a mennen’y pasi-pala adan dézè-a 2 pandan 40 jou. A moman-tala, Djab-la tanté’y. Lè périòd-tala bout, davwè i pa té manjé ayen, i té fen. 3 Alò Djab-la di’y : « Si ou sé an yich Bondié, di sé wòch-tala tounen pen. » 4 Men Jézi réponn li : « Mi sa ki matjé : “Sé pa pen sèlman an nonm bizwen pou viv.” » 5 Djab-la mennen’y an koté ki wo épi adan an bat zié i montré’y tout wayòm ki anlè latè. 6 Épi i di’y : « Man ké ba’w tout pouvwa-tala, épi laglwa sé wayòm-tala, pas sé mwen yo ba pouvwa-tala. É sé mwen ki ka désidé ki moun man ka ba pouvwa-tala. 7 Si ou ka ajounou douvan mwen épi adoré mwen, tousa kèy ta’w. » 8 Jézi réponn li : « Mi sa ki matjé : “Sé Jéova Bondié’w ou pou adoré, é sé li yonn ou pou ba an sèvis sakré.” » 9 É i mennen’y Jérizalèm, i mété’y anlè gran masonn Tanp-lan é i di’y : « Si ou sé an yich Bondié, jété kòw pa anba. 10 Pas mi sa ki matjé : “I ké ba zanj-li an lòd pou pwotéjé’w” 11 é “Yo ké pòté’w anlè lanmen-yo pou pié’w pa bité anlè piès wòch.” » 12 Jézi réponn li : « Mi sa ki matjé : “Ou pa pou mété Jéova Bondié’w a léprèv.” » 13 Apré, lè Djab-la fini tanté’y, i pati é i té ka atann an lòt bon lokazion. 16 Apré sa i alé Nazarèt, koté-a yo élivé’y, épi jou saba-a i rantré adan sinagòg-la kon i té ni labitid fè. Lè i lévé pou li, 17 yo ba’y woulo pwofèt Izayi-a. I ouvè woulo-a, épi i touvé koté-a ki té matjé : 18 « Lèspri Jéova vini anlè mwen, pas i chwézi mwen pou anonsé bon nouvèl ba moun ki maléré. I vréyé mwen pou di moun ki lajòl yo ké libéré yo, épi pou di sé avèg-la zié-yo ké viré wè, pou libéré moun ki krazé, 19 pou préché lanné-a Jéova ka montré favè’y. » 20 Apré i woulé woulo-a, i viré ba sèvitè-a woulo-a épi i asiz. É zié tout moun, adan sinagòg-la, té fiksé anlè’y. 21 Kidonk i koumansé di yo : « Jòdi-a, pasaj Lékriti-tala zòt fini tann akonpli. » 22 Tout moun té ka di bon bagay anlè’y. Yo té èstébékwé parapòt a bèl pawòl i té ka di, é yo té ka di : « Kouman ! Sé pa yich Jozèf ki la ? » 23 Alò i di yo : « Asiré, zòt ké vréyé ti pawòl-tala ba mwen : “Dòktè, djéri kòw wou menm.” É zòt ké di mwen : “Nou tann palé di sa ki fèt Kafarnawòm. Fè menm bagay-la isiya osi, adan pwòp vil-ou.” » 24 I di osi : « Pou vré man ka di zòt, yo pa ka asèpté piès pwofèt bò kay-li. 25 An vérité man ka di zòt : Antan Éli, té ni an patjé vèv pa koté Izrayèl, lè lapli-a pa tonbé pandan twa lanné épi sis mwa, é moun té ka mò fen adan tout péyi-a. 26 Magré sa, Bondié pa vréyé Éli obò sé madanm-tala, men sèlman bò vèv Sarèpta-a, pa koté réjion Sidon. 27 Antan pwofèt Élizé, té ni osi anpil moun ki té ni lalèp. Poutan pa ni yonn adan yo ki trapé djérizon, sòf Naamàn Sirien-an. » 28 Lè yo tann sé pawòl-tala, tousa ki té adan sinagòg-la lévé faché. 29 Yo doubout épi yo trennen’y an déwò vil-la. Yo mennen’y an tèt montann-lan éti vil-la té konstwi pou maté’y pa tèt. 30 Men i pasé an mitan yo épi i fè chimen’y. 43 Men i di yo : « Man pou anonsé bon nouvèl wayòm Bondié-a adan sé lézòt vil-la tou, pas sé pou sa Bondié vréyé mwen. »