Révélasion

14 Apré man wè, épi gadé ! Ti Mouton-an doubout anlè montann Sion-an, té ni épi’y 144 000 moun ki té ni non’y épi non Papa’y matjé anlè fwon-yo. 2 Man tann an bwi ki sòti an sièl-la, konsidiré sé an gwo dlo ki té ka désann, konsidiré sé an gwo kout tonnè ; é bwi-a man tann lan, sé té kon bwi chantè ki té ka jwé awp pandan yo té ka chanté. 3 É yo ka chanté sa ki ka sanm an chanté tou nèf douvan twòn-lan é douvan sé kat kréyati vivan-an épi sé ansien-an ; é pèsonn pa té kapab aprann chanté-tala kòmifo, men sèlman sé 144 000-la Bondié achté anlè latè. 4 Sé sé moun-tala ki pa sali kòyo épi fanm ; yo vièj. Sé yo menm ki ka kontinié suiv Ti Mouton-an kisiswa koté-a i ka alé. Yo achté yo adan limanité kon prèmié fwi, pou Bondié é pou Ti Mouton-an, 5 yo pa jen sèvi bouch-yo pou kouyonnen pèsonn ; yo pa ni piès tach anlè yo. 6 Épi man wè an lòt zanj ki té ka volé an mitan sièl-la, é i té ni an bon nouvèl étèrnèl pou anonsé ba tout moun ka rété asou latè, tout nasion, tout tribi, tout lang, tout pèp. 7 I té ka di bien fò : « Fòk zòt krenn Bondié épi gloriyé’y, pas lè-a rivé pou i jijé. Wi, adoré’y Li ki fè sièl-la épi latè-a, lanmè-a épi sous dlo. »