Ébré

11 Lafwa sé lè ou asiré sèten ki tousa ou ka èspéré ké rivé, sé an prèv klè ka montré ki réyalité nou pa ka wè ka ègzisté. 4 Épi lafwa, Abèl ofè Bondié an sakrifis ki té ni plis valè ki ta Kayen, é gras a lafwa-tala, i risivrè témwayaj-la kè i té an nonm jis, pas Bondié asèpté sé don-an i fè a ; é menmsi i ja mò, gras a lafwa’y i ka palé toujou. 6 Dayè, si nou pa ni lafwa, sa pa posib fè Bondié plézi, pas moun-lan ki lé vini bò Bondié pou kwè i ka ègzisté é i ka divini Bondié-a ki sa rékonpansé moun ki ka chèché’y épi tout tjè-yo. 8 Épi lafwa Abraam té ni, i obéyi lè Bondié kriyé’y, i pati kité kay-li pou alé an koté ki té pou vini éritaj-li ; i pati san sav koté i té ka alé. 9 Épi lafwa i té ni, i rété kon an étranjé adan péyi pwonmès-la konsidiré sé té an téritwè étranjé. É sé anba tant i rété épi Izaak èk Jakòb, ki té éritié menm pwonmès-la épi’y. 10 Pas i té ka atann vil-la ki ni vré fondasion, vil-la éti sé Bondié ki konsivwè’y épi konstwi’y. 11 Épi lafwa tou, Sara risivwè pouvwa fè an yich magré i pa té ni laj ankò pou fè timanmay, pas i té asiré Moun-lan ki té fè’y pwonmès-la té fidèl. 15 Poutan, si yo té ka yenki sonjé koté-a yo té sòti, yo té ké touvé an lokazion pou viré la. 20 Épi lafwa osi, Izaak béni Jakòb épi Ézayi parapòt a bagay ki té pou vini. 24 Épi lafwa, lè Moyiz vini gran, i pa té lé yo kriyé’y yich ti-fi Farawon 25 é i chwazi pran fè épi pèp Bondié, olié i pwofité plézi péché-a pou an ti moman, 26 Pas ba’y, wont-lan ki té pou tonbé anlè Kris-la, sé té an richès pli gran ki trézò Léjip ; pas sé yenki rékonpans-lan i té ka gadé. 27 Épi lafwa, i kité Léjip, é i pa té pè wa-a ki té an kolè. I rété solid konsi i té ka wè Moun-lan ki envizib. 28 Épi lafwa, i fété Lapak épi i simen san-an asou montan sé lapòt-la , pou moun-lan ki ka détwi pa tjwé prèmié yich-yo.