2 Timoté

3 Men fòk ou sav sa : adan sé dènié jou-a, kèy ni tan rèd pou sipòté. 2 Pas lé moun-lan ké égoyis, yo ké enmen lajan, yo ké vanta, yo ké ni lògèy, yo ké ensilté Bondié é lézòm, yo pé ké obéyi lé paran-yo, yo ké engra, yo pé ké fidèl, 3 yo pé ké ni lanmou ba pwòp fanmi-yo, yo pé ké antann kòyo, yo ké manti pou fè moun ditò, yo pé ké kontwolé kòyo, yo ké enmen fè moun méchansté, yo pé ké enmen sa ki bien, 4 yo ké trèt, yo ké antété, yo ké plen lògèy, yo ké enmen plézi pasé Bondié, 5 yo ké fè jan yo enmen Bondié, mé sé pa pou sa lanmou-yo kèy pousé yo aji. Viré do ba sé moun-tala. 10 Men wou, épi anpil latansion, ou kouté lansèyman-mwen, ou gadé manniè man ka viv, ki lòbjèktif man ni, lafwa-mwen, pasians-mwen, lanmou-mwen, landirans-mwen, 11 épi osi pèsékision épi soufwans man sibi Antiòch, Ikoniòm épi Lis. Man sipòté sé pèsékision-tala, é Senyè-a sové mwen anba yo tout. 12 Avrédi, tout moun ki lé viv adan liannaj épi Bondié èk adan linité épi Kris Jézi, yo tou, yo ké pèsékité yo. 13 Men sé méchan-an épi moun ki ka fè kòyo pasé pou sa yo pa yé, ké vini plizanpli mové. Yo ké kouyonnen moun é moun ké kouyonnen yo. 14 Men ou menm, rété kolé anlè sa ou aprann, sa yo konvenk ou di kwè, pas ou sav ki moun ki aprann ou sé bagay-tala, 15 pas ou sav dépi ou toupiti ou konnèt sa ki matjé adan liv ki sakré, ki pé fè’w vini saj pou ou pé sa sové gras a lafwa adan Kris Jézi. 16 Tout Lékriti-a sé Bondié ki enspiré’y, é i itil pou ansénié, pou korijé, pou rimété tout bagay an bon larèl-la, pou aprann maché dwèt, 17 pou moun-lan ki ka sèvi Bondié pé ni tout kalité ki fo, tousa i ni bizwen pou fè sa ki bien.