2 Korentjen

6 Menmsi man pa fò adan palé-a, asiré sé pa konésans man mantjé ; dayè nou pa mantjé montré zòt li diféran manniè é an tout bagay. 23 Ès yo minis Kris ? Kon an boug fou, man ka réponn man minis Kris plis ki yo ankò : man travay plis ki yo, yo jété mwen lajòl pli souvan ki yo, yo ba mwen tèlman kou ki man pé pa konté yo, é souvantman, man mantjé mò. 24 Senk fwa sé Juif-la ba mwen 40 kou mwens yonn, 25 twa fwa yo ba mwen kout badjèt, an fwa yo lapidé mwen, twa fwa bato-a koulé épi mwen, man rété an lannuit épi an jou an gran lanmè ; 26 man vwayajé souvan, man té an danjé akòz sé flèv-la, man té an danjé akòz sé volè-a, man té an danjé akòz di pwòp pèp-mwen, man té an danjé akòz sé nasion-an, man té an danjé adan vil-la, man té an danjé an dézè-a, man té an danjé an lanmè-a, man té an danjé an mitan fo frè ; 27 man konnèt travay rèd é man fè anlo éfò, man pasé anlo lannuit san dòmi, man rété san manjé é san brè, man sav sa sa lé di rété souvan san manjé, lè frèdi ka bat ou épi lè’w pa ni rad. 28 Anplis di tout sé bagay-tala, i ni an bagay ki ka trakasé lèspri-mwen chak jou : mwen entjèt pou tout sé lasanblé-a.