Matié

4 Apré, lèspri Bondié mennen Jézi adan dézè-a pou Djab-la tanté’y. 2 Apré i rété san manjé pandan 40 jou épi 40 lannuit, i té fen. 3 Djab-la vini pou tanté’y, épi i di’y : « Si ou sé an yich Bondié, di sé wòch-tala tounen pen. » 4 Men i réponn : « Mi sa ki matjé : “Sé pa pen sèlman an nonm bizwen pou viv, men i bizwen tout pawòl ka sòti an bouch Jéova.” » 5 Alò, Djab-la mennen’y adan vil sen an, i mété’y anlè gran masonn Tanp-lan 6 épi i di’y : « Si ou sé an yich Bondié, jété kòw pa anba. Pas mi sa ki matjé : “I ké ba zanj-li an lòd an favè’w” é “Yo ké pòté’w anlè lanmen-yo pou pié’w pa bité anlè piès wòch.” » 7 Jézi di’y : « Sa osi sa matjé : “Ou pa pou tèsté Jéova Bondié’w.” » 8 Djab-la mennen’y apré anlè an montann ki wo toubonnman épi i montré’y tout sé wayòm-lan ki anlè latè épi laglwa-yo, 9 épi i di’y : « Man kèy ba’w tout sé bagay-tala si’w ka mété kòw ajounou douvan mwen épi si’w ka adoré mwen an sèl fwa. » 10 Jézi réponn li : « Sòti douvan mwen Satan ! Pas mi sa ki matjé : “Sé Jéova Bondié’w ou pou adoré, é sé li yonn ou pou ba an sèvis sakré.” » 11 Alò Djab-la kité’y, épi yonn-dé zanj vini é yo koumansé sèvi’y. 13 Apré, i pati kité Nazarèt pou abité Kafarnawòm, bò lanmè-a, adan téritwè Zabilon épi Nèftali. 14 Sé té pou sa pwofèt Izayi té anonsé akonpli : 15 « O Galilé sé nasion-an, péyi Zabilon épi péyi Nèftali, zòt ki obò lawout-la ki ka mennen bò lanmè-a, lòt koté Jouden-an ! 16 Pèp-la ki asiz adan fè-nwè wè an gran limiè, é limiè-a kléré tout moun ki asiz adan an réjion oti lonbraj lanmò ka dominé. » 17 A lè-tala, Jézi koumansé préché épi di : « Ripanti kòzòt, pas wayòm-lan ki an sièl toupré rivé. » 18 Lé i té ka maché bò lanmè Lagalilé, i wè dé frè : Simon, yo ka kriyé Piè, épi frè’y André, yo té la ka vréyé filèt-yo an dlo, pas sé té dé maren-péchè. 19 I di yo : « Vini épi mwen, man ké fè zòt péché moun. » 20 Lamenm yo ladjé filèt-yo épi yo suiv li. 23 Alòs i koumansé alé vini adan tout Lagalilé : i té ka ansénié adan sé sinagòg-la, i té ka préché bon nouvèl Wayòm-lan, é i té ka djéri tout kalté maladi épi tout enpiòkté.