Matié

16 Sé farizien-an épi sé sadiséyen-an vini bò’y pou piéjé’y, é yo mandé’y fè yo wè an sin ki ka sòti an sièl-la. 2 I réponn yo : « Lè lannuit-la ka tonbé, zòt ka di : “Tan-an ké bèl, pas sièl-la wouj”, 3 é lè sé bonmaten, zòt ka di : “Jòdi-a ké fè frèt épi lapli ké tonbé, pas sièl-la wouj épi i kouvè.” Zòt ka rivé konprann sé sin-lan zòt ka wè an sièl-la, men zòt pa kapab konprann sé sin-lan ki ka montré lépòk-la nou ka viv la. 4 An jénérasion méchan épi adiltè pa ka las chèché an sin, men sèl sin-lan yo kèy ni sé sin pwofèt Jonas. » É i pati kité yo la. 16 Simon Piè réponn : « Ou sé Kris-la, Yich Bondié-a ki vivan. » 19 Man ké ba’w laklé wayòm sièl-la. Tousa ou ké maré anlè latè, ké ja maré adan sièl-la, é tousa ou ké démaré anlè latè, ké ja démaré adan sièl-la. » 22 Alò Piè pran’y apa épi i koumansé palé ba’y pou korijé’y. I di’y : « Senyè, poutji ou lé fè kòw ditò. Men non, ayen pé ké rivé’w. » 23 Men i viré do ba Piè é i réponn li : « Sòti douvan mwen, Satan ! Ou sé an bwa-koré ki lé fè mwen tonbé, pas ou ka wè bagay-la kon lézòm ka wè, men sé pa konsa Bondié ka wè. » 24 Alò Jézi di sé disip-li a : « Si an moun lé suiv mwen, fòk i arété viv ba kòy, é fòk i pran poto soufwans-li épi suiv mwen tout lè. 25 Pas moun-lan ki lé sové lavi’y kèy pèd li, men moun-lan ki ka pèd lavi’y akòz di mwen kéy sové’y. 26 A kisa sa ka sèvi genyen lèmonn antié si nou ka pèd lavi-nou ? Ouben kisa an nonm ké ba pou sové lavi’y ? 27 Pas Yich nonm-lan pou vini épi zanj-li adan laglwa Papa’y, épi i ké ba chak moun sa i mérité silon sa i fè.