Lik

4 Zanmi-mwen, mi an lòt bagay man lé di zòt : pa pè moun ki pé tjwé zòt, pas sé sa sèlman yo pé fè zòt. 5 Man kèy di zòt ki moun zòt pou pè : zòt pou pè Moun-lan ki, lè i fini tjwé zòt, ni pouvwa jété zòt adan lajéyèn. Wi, man ka di zòt sa, moun-tala, sé li fòk zòt pè. 6 Yo ka vann senk ti sisi pou dé piès lanmonné san valè, pa vré ? Magré sa, Bondié pa ka bliyé piès adan yo. 7 Men pou zòt, i ja konté chak ti chivé-zòt. Kidonk fòk pa zòt pè : zòt ni plis valè pasé anlo ti sisi. 15 Apré sa i di yo : « Gadé zié-zòt ouvè : rijété tout kalté modèl vorasité, pas, menm lè an moun ni anlo bien, sé pa sa i ni ki ka ba’y lavi. » 16 Apré, i sèvi lègzanp-tala : « Tè an nonm rich té bien pòté. 17 Kidonk i koumansé katjilé épi i di kòy : “Ajtèlman man pa rété plas ankò, kisa man ké fè ? Koté man ké mété rékòlt-mwen ?” 18 Alò i di : “Mi sa man ké fè : Man ké krazé dépo man ni é man ké konstwi dòt ki pli gran, é man ké mété tout séréyal-mwen andidan yo épi tout bagay-mwen. 19 Épi man ké di kòmwen : ‘Ou ni anlo bon bagay asou koté pou an patjé lanné. Pozé kòw, manjé, bwè, pran plézi.’” 20 Men Bondié di’y : “Boug sòt ki ou yé ! Oswè-a menm ou ké pèd lavi’w. Épi kon sa yé la a, tout sé bagay-la ou anmasé a, ki moun ki ké ni yo ?” 21 Mi sé sa ka rivé an moun ki ka anmasé trézò ba kòy, men ki pa rich an zié Bondié. » 29 Kidonk, arété mandé kòzòt sa zòt kèy manjé, épi sa zòt kèy bwè, é sispann tèrbolizé lèspri-zòt. 30 Sé dèyè sé bagay-tala sé nasion-an ka kouri toulong, men Papa-zòt sav zòt bizwen sé bagay-tala. 31 Plivomié zòt chèché wayòm-li, épi zòt kèy trapé sé bagay-tala osi. 32 « Pa pran pè, piti twoupo, pas Papa-zòt wè sé an bon bagay ba zòt Wayòm-lan. 49 « Man vini limen an difé asou latè. Si’y ja limen, kisa man lé ankò ? 53 Yo ké divizé : papa kont ti-bolonm é ti-bolonm kont papa, manman kont tifi é tifi kont manman, bèl-mè kont bèl-fi é bèl-fi kont bèl-mè. »