Lik

5 An jou, Jézi té bò lak Jénézarèt-la é an foul té ka kouté’y ansénié pawòl Bondié. Yo pa té ka ba’y an pa. 2 I wè dé bato bò lak-la ; sé péchè-a té désann atè épi yo té ka nétwayé filèt-yo. 3 I monté adan yonn di sé bato-a ki té ta Simon, é i mandé’y alé tibren pli lwen an dlo-a. Apré i asiz adan bato-a, é i koumansé ansénié foul-la. 4 Lè i fini palé, i di Simon : « Alé la dlo-a fon, épi ladjé filèt-zòt pou péché. » 5 Simon réponn li : « Ansénian, nou bat rèd tout lannuit san pran ayen. Men pas ou ka mandé mwen’y, man ké ladjé sé filèt-la. » 6 Alò, lè yo fè sa, yo trapé an patjé pwason. Pou vré, filèt-yo té ka déchiré. 7 Kidonk yo fè jès lanmen pou di kolèg-yo ki té adan lòt bato-a vini endé yo. Yo vini, é sé dé bato-a té sitèlman bakfoul ki yo té ka koumansé koulé. 8 Lè i wè sa, Simon Piè mété jounou’y atè douvan Jézi épi i di’y : « Pa rété bò mwen, Senyè, pas man sé an nonm ki plen péché. » 9 Pas li épi tout sé moun-lan ki té épi’y té èstébékwé davwè yo té pran tousa pwason ; 10 Jak épi Jan, yich Zébédé, ki té ka travay épi Simon té adan menm léta-a. Men Jézi di Simon : « Pa pè. Aprézan, sé moun ou ké trapé. » 11 Alò yo viré mennen sé bato-a atè a, yo ladjé tout bagay épi yo suiv li. 29 Apré sa, Lévi òwganizé an gran-penteng lakay-li ba Jézi. I té ni an patjé moun ka ranmasé lajan lenpo épi dòt moun ki té ka manjé épi yo. 32 Man pa vini mandé moun ki jis ripanti kòyo, men man vini mandé moun ki ka péché ripanti kòyo. »