Matié

2 Mi non sé 12 apòt-la : pou koumansé Simon, tala yo ka kriyé Piè, épi frè’y André ; Jak yich Zébédé, épi frè’y Jan ; 3 Filip èk Bartélémi ; Toma épi Matié, ki té ka ranmasé lajan lenpo ; Jak yich Alfé, é Tadé ; 4 Simon Kananit-la ; épi Jida Iskariòt, ki trayi Jézi apré. 5 Jézi vréyé sé 12 nonm-tala pou an mision, i ba yo lòd-tala : « Pa alé pa koté moun dòt nasion, é pa antré adan piès vil Lasamari ; 6 men kontinié alé san rété pa koté sé brèbi nasion Izrayèl-la ki pèd chimen. 7 Lè zòt ka préché, anlè chimen-an zòt pou di : “Wayòm-lan ki an sièl toupré rivé.” 8 Djéri moun malad, résisité moun mò, djéri sé lépré-a, kouri dèyè sé démon-an. Yo ba zòt pou ayen, zòt pou ba pou ayen. 9 Pa pran piès lò, piès lajan, piès tjuiv, 10 piès sak-manjé pou vwéyaj-la, piès dòt rad, piès sandal, piès baton, pas an ouvriyé mérité sa i ka manjé-a. 11 « Lè zòt ké antré adan an gran vil oben an vilaj, chèché an moun ki lé kouté mésaj-la épi rété lakay-li jiktan zòt viré-pati. 12 Lè zòt ka antré adan an kay, di bonjou. 13 Si sé moun-lan ki an kay-la ka kouté, ki lapé-a zòt ka swété yo rété anlè yo. Men si yo pa lé kouté, ki lapé-zòt viré anlè zòt. 14 Lè, adan an kay oben adan an vil yo pé ké risivwè zòt, oben yo pé ké kouté zòt, lè zòt ka pati, soukwé lapousiè pié-zòt. 15 Pou vré man ka di zòt sa, lè jou Jijman-an ké rivé, sa ké pli fasil ba Sodòm épi Gomò ki ba vil-tala. 16 « Gadé ! Man ka vréyé zòt kon dé brèbi an mitan sé lou-a ; kidonk, fòk zòt pridan kon sèpan épi inosan kon kolonb. 17 Prangad sé moun-lan pas yo ké trennen zòt douvan tribinal épi yo ké fwété zòt adan sinagòg-yo. 18 Yo ké trennen zòt douvan gouvènè épi wa akòz di mwen. É sa ké sèvi témwayaj ba yo épi ba sé nasion-an. 19 Kidonk, lè yo kèy vréyé zòt douvan tribinal, pa entjété kòzòt parapòt a sa zòt kèy di, ni menm di manniè-a zòt ké di’y, pas zòt ké sav sa zòt pou di a moman-tala. 27 Sa man ka di zòt an fè-nwè a, di’y an limiè-a. Sa man ka di zòt an zorèy, préché’y tou wo pou tout moun tann. 29 Yo ka vann dé ti sisi pou an piès lanmonné san valè, pa vré ? Magré sa, yo piès la pa ka tonbé atè san Papa-zòt wè sa. 30 Men pou zòt, i ja konté chak ti chivé-zòt. 31 Kidonk, fòk pa zòt pè : zòt ni plis valè pasé anlo ti sisi. 32 « Si an moun ka di douvan lézòm i sé disip-mwen, mwen tou, man ké di douvan Papa-mwen ki an sièl i sé disip-mwen. 34 Fòk pa zòt kwè man vini pòté lapé anlè latè. Man pa vini pòté lapé, men ladjè. 35 Pas man vini mété chikann ant gason-an épi papa’y, ant tifi-a épi manman’y, é ant bèl-fi a épi bèl-mè’y. 36 Wi, lènmi an nonm sé ké moun pwòp kay-li. 37 Moun-lan ki enmen papa’y oben manman’y plis ki mwen, pa mérité vini disip-mwen, é moun-lan ki enmen ti bolonm-li oben tifi’y plis ki mwen, pa mérité vini disip-mwen. 40 « Moun-lan ki ka risivwè zòt, ka risivwè mwen tou, é moun-lan ki ka risivwè mwen, ka risivwè Moun-lan ki vwéyé mwen tou.