Women
18 Pas man sav andidan mwen, kivédi adan lachè-mwen, pa ni ayen ki bon. Sa vré, man lé fè sa ki bon, men man pa kapab fè’y. 19 Pas man pa ka fè bien an mwen lé fè, men sé sa ki mové a man pa lé, man ka fè. 20 Kidonk, si mwen ka fè sa man pa lé fè, sé pa mwen ki ka fè’y ankò, men sé péché-a ki andidan mwen. 21 Lè man bien gadé, sé anba lwa-tala man yé : lè man lé fè sa ki jis, sé sa ki mové ka pran douvan. 22 Sa vré, nonm-lan mwen yé andidan ka pran plézi adan lalwa Bondié, 23 men man ka wè adan kò-mwen, an lòt lwa ki ka fè ladjè épi lwa-a ki ka dirijé lèspri-mwen, é i ka mennen mwen kon an prizonnié ba lalwa péché-a ki adan kò-mwen. 24 Mi nonm mizérab man yé ! Ki moun ki ké libéré mwen anba kò-tala ki ka mennen mwen a lanmò ? 25 Man ka di Bondié mèsi gras a Jézikri Senyè-nou ! Kidonk, adan lèspri-mwen, mwen man sé èsklav lalwa Bondié, men adan lachè-mwen, man sé èsklav lalwa péché-a.