Lèt Komité santral-la
« Zòt sé pé té ja ka ansénié » (Ébr. 5:12). Ou ka rann kòw kont : Jéova, pli gran Ansénian linivè, ka mandé nou ansénié pwochen-nou ki moun i yé ! Tout lokazion nou ni pou ansénié lavérité anlè Jéova (adan lafanmi, adan lasanblé oben adan ministè-a) sé an lonnè èstwòdinè é an rèskonsabilité ki ni anpil lenpòtans. Ki manniè nou pé rivé fè mision-tala bien ?
Répons-lan adan pawòl lapòt Pòl ékri ba Timoté : « Kontinié vini pli filé lè’w ka li an piblik, lè’w ka ankourajé, lè’w ka ansénié. » Pòl di anplis : « Si’w fè sa, ou kay pé sové ki wou, ki lé moun-an ka kouté’w la » (1 Tim. 4:13, 16). Mésaj-la ou ka pòté a ka sové lavi. Kidonk, sa vréman enpòtan ki nou chak la fè éfò pou vini pli filé lè nou ka li épi ansénié. Bwochi-tala fèt pou endé’w. Mi yonn-dé détay asou’y :
Anlè chak paj, i matjé an vèsé, sé an prensip Labib ki ni an rapò épi lison-an, oben an èkzanp ki ka apiyé lison-an.
Jéova sé « Gran Enstriktè-a » (Iza. 30:20). Menm si bwochi-tala ka endé’w vini pli filé pou ansénié épi li, pa janmen bliyé mésaj-la ka vini di Jéova é sé li ka atiré tout moun (Jan 6:44). Kidonk, priyé Bondié souvan pou mandé’y lèspri sen. Sèvi Pawòl-li anpil. Pa mété kòw douvan, men toujou mété Jéova douvan. Fè éfò pou endé sé moun-lan ki ka kouté’w la ni lanmou pou Jéova andidan tjè-yo.
Ou envité ansénié mésaj-la ki pli enpòtan pasé piès mésaj nonm ja risivwè. Nou asiré lè’w ka apiyé « anlè lafòs Bondié ka ba », ou kay réyisi mision-tala (1 Piè 4:11).
Lianné épi’w adan travay lansèyman-tala,
Komité santral sé Témwen Jéova-a