Kwayans Témwen Jéova sé kisa ?

Témwen Jéova ka fè éfò pou suiv lanseyman Jézi ek sa sé apot li-a té ka pratitjé. Nou ké wè yonn dé lidé asou fondas kwayans nou.

1. Bondié. Nou ka adoré sel vré Bondié-a, I toupuisan, sé Kréyatè-a ; non’y sé Jéova (Sòm 83:18 ; Révélasion 4:11). Sé Bondié Abraram, Moyiz, ek Jézi (Ègzòd 3:6 ; 32:11 ; Jan 20:17).

2. Labib. Pou nou Bibla sé an mésaj ka vini di Bondié pou lé-zòm (Jan 17:17 ; 2 Timoté 3:16). Kwayans nou asiz anlè sé 66 liv Labib-la, ki yo adan « Ansien Testaman-an » oben « Nouvo Testaman-an ». An met konférans yo ka kriyé Jason BeDuhn, esplitjé sa bien, lè’y ékri Témwen Jéova ka apiyé « kwayans yo ek pratik yo asou fondas pawol Bondié, san lidé tou fet adan lespri yoa ».

   Nou dakò épi tou sa Labib ka di, mé nou pa fondamantalis (sé moun ka chèché esplitjé tout mo adan Bibla). Nou dakò pou di kè yonn dé mòso adan Bibla ékri an manniè difisil pou konprann é ki mérité esplikasion. Kidonk, fòk pa frennen asou chak mo (Révélasion 1:1).

3. Jézi. Nou ka suiv lanseyman é egzanp Jézikri, é nou ka onoré’y pas i sé Sovè nou ek Yich Bondié (Matié 20:28 ; Ak 5:31). Kidonk, nou sé dé krétjen (Ak 11:26). Lè nou étidié Bibla, nou aprann Jézikri sé pa li ki Bondié Toupuisan é kwayans Latrinité pa adan Bibla (Jan 14:28).

4. Wayom Bondié-a. Sé an vré gouvenman ka egzisté an siel pou toulbon, men sé pa an bagay kon yo ka di-a ki an fon tjè lé krétjen. I ké pran plas tout gouvenman lé-zòm mété épi fè tou sa Bondié prévwè ba latè (Dannièl 2:44 ; Matié 6:9, 10). Sé sa i ké fè adan an ti moman, pas pwofési ki an Bibla ka montré nou ka viv « sé dènié jou-a » (2 Timoté 3:1-5 ; Matié 24:3-14).

   Sé Jézi ki Wa wayom Bondié an siel-la. I koumansé gouvèné an 1914 (Révélasion 11:15).

5. Délivrans. Nou pé sòti anba lanmen péché é lanmò gras-a sakrifis Jézi, ki ka sèvi nou ranson (Matié 20:28 ; Ak 4:12). Tout moun ki lé trapé délivrans tala, dwet fè mannev pou montré kè yo ni lafwa an Jézi, men yo dwet ranjé lavi yo tou épi pran batenm (Matié 28:19, 20 ; Jan 3:16 ; Ak 3:19, 20). Manniè aji an moun ka montré lafwa’y djok (Jak 2:24, 26). Délivrans tala sé pa an bagay nou pé genyen konsa ; nou pé trapé’y selman épi « favè Bondié nou pa mérité » (Galat 2:16, 21).

6. Siel-la. Bondié Jéova, Jézikri épi sé zanj fidel-la ka rété an sielb (Sòm 103:19-21 ; Ak 7:55). Pa anpil moun, selman 144 000, kay résisité pou viv an siel-la pou dirijé Wayom-lan épi Jézi (Dannièl 7:27 ; 2 Timoté 2:12 ; Révélasion 5:9, 10 ; 14:1, 3).

7. 

   Latè. Bondié kréyé latè ba lé-zòm pou yo viv asou’y pou toujou (Sòm 104:5 ; 115:16 ; Éklézyias 1:4). Bondié kay ba moun ki ka obéyi an santé pawfé é lavi éternel adan an paradi asou latè (Sòm 37:11, 34).

8. Malè é soufwans. Tout bagay koumansé lè an zanj viré do ba Bondié (Jan 8:44). Dépi sa rivé, yo kriyé zanj tala « Satan » é « Djab ». I fè sé dé prèmié moun-lan Bondié mété asou latè-a suiv-li. Sé pa ti-malè ki tonbé asou désandans yo (Jenèz 3:1-6 ; Women 5:12). Pou réponn tout kèsion moral Satan lévé, Bondié kité malè é soufwans woulé, men sé pa pou lontan.

9. Lanmò. Moun ki ka mò pa ka egzisté ankò (Sòm 146:4 ; Éklézyias 9:5, 10). Yo pa ka brilé adan difé lanfè.

   Bondié kay sèvi larézireksion pou résisité milia moun (Ak 24:15). Men sa ki pé ké lé suiv larel Bondié apré yo résisité, kay pèdi lavi yo é disparet pou toujou (Révélasion 20:14, 15).

10. 

    Lafanmi. Nou ka respekté lalwa Bondié mété okoumansman pou mariaj-la : an sel nonm épi an sel fanm. Yo pé divòsé selman si yonn di yo fè an péché seksiel (Matié 19:4-9). Nou sèten prensip Labib ki saj ka endé tout fanmi ni lakontantman (Éfézyien 5:22–6:1).

11. Adorasion nou. Nou pa ka ajounou ni douvan lakwa ni douvan pies dòt zimaj oben estati (Détéwonòm 4:15-19 ; 1 Jan 5:21). Mi yonn dé bagay enpòtan ou ka jwenn adan adorasion nou :

    • Prédié Bondié (Filipyien 4:6).

    • Li épi étidié Bibla (Sòm 1:1-3).

    • Katjilé anpil asou sa nou ka aprann adan Bibla (Sòm 77:12).

    • Nou ka sanblé kò nou pou priyé, étidié Bibla, chanté, palé di lafwa nou, ankourajé frè ek sè espiritiel nou, san bliyé moun ki ka vini adoré épi nou (Kolosyien 3:16 ; Ébré 10:23-25).

    • Préché « bon nouvel wayom-lan » (Matié 24:14).

    • Endé moun ki bizwen soukou (Jak 2:14-17).

    • Konstwi épi otjipé di sé koté-a nou ka adoré Bondié (non yo sé Sal di Wayom) épi dòt koté nou ka sèvi pou òganizé anseyman Bibla asou tout latè (Sòm 127:1).

    • Nou ka pòté soukou ba moun ki sibi katastwof natirel (Ak 11:27-30).

    

12. Òganizasion nou-an. Nou òganizé an pliziè lasanblé fidel, yo chak la ni an ti konpanyi nonm espiritiel ki responsab yo. Sé nonm espiritiel tala pa chef adan sé lasanblé-a épi yo pa ka péyé yo pou sa yo ka fè (Matié 10:8 ; 23:8). Nou pa ka mandé moun lajan é pa jen ni latjet adan lasanblé nou (2 Korentyien 9:7). Tout lajan nou ka trapé ka fè aktivité nou vansé. Ki ou ba ki ou pa ba lajan, pèsonn pa ka chèché sav.

    Komité santral-la, an ponyen krétjen ofilaplon ki ka travay adan biwo mondial nou-an, ka ba sé Témwen Jéova-a an larel toupatou asou latè (Matié 24:45).

13. Liannaj nou. Toupatou asou latè, nou lianné adan menm kwayans-lan (1 Korentyien 1:10). Nou ka fè tou sa nou pé pou pa fè préférans pou an pep oben an ras (Ak 10:34, 35 ; Jak 2:4). Men linité tala pa ka anpéché nou fè pwop chwa nou. Chak Témwen ka pran désizion an akò épi pwop konsians-li ki édiké silon pawol Bondié (Women 14:1-4 ; Ébré 5:14).

14. Konduit nou. Adan tou sa nou ka fè, nou ka fè éfò pou ni an lanmou ki pa ka atann ayen dèyè (Jan 13:34, 35). Nou ka rijété tout bagay Bondié pa enmen, kon an mové manniè sèvi san-an ; lè nou ka pran’y oben ba an lòt moun-li (Ak 15:28, 29 ; Galat 5:19-21). Nou enmen lapé, nou pa ka fè ladjè (Matié 5:9 ; Ézayi 2:4). Nou ka respekté lotorité péyi-a koté-a nou ka viv-la, épi nou ka obéyi tout lwa péyi-a, dépi i pa kont lwa Bondié (Matié 22:21 ; Ak 5:29).

15. Rilasion nou épi moun ki pa Témwen Jéova. Jézi ba lòd tala : « Fòk ou enmen pwochen’w menm manniè ou enmen kò’w. » I di an plis, sé krétjen-an « pa ka mélé épi monn-lan » (Matié 22:39 ; Jan 17:16). Nou ka fè tou sa nou pé pou « fè tout moun di bien », men nou pa ka fè politik é nou pa ka pran pa épi dòt rèlijion (Galat 6:10 ; 2 Korentyien 6:14). Men ki politik, ki rèlijion nou ka respekté chwa tout moun (Women 14:12).

Si’w ni dòt kèsion asou kwayans Témwen Jéova, ou pé trapé plis enfòmasion anlè sit nou-an. Ou pé jwenn tou yonn di sé biwo nasional nou an, vini adan an lasanblé nou pa bò kay-ou oben palé épi an Témwen Jéova koté ou ka rété.