LISON 10
Ki manniè nou pé rivé sav kiles ki vré rilijion-an ?
1. Es sé an sel vré rilijion ki ni toulbon ?
« Pwan gad sé fo pwofet-la » (MATIÉ 7:15).
Jézi anséyé sé disip li-a an sel rilijion, tala ki vré-a. I di yo i kon an chimen ki ka mennen a lavi étewnel épi « pa djè ni moun ka touvé’y » (Matié 7:14). Sel rilijion Bondié ka aksepté sé tala ki apiyé anlè Pawol li, li menm sé lavérité. Tout sé vré adoratè Bondié-a lianné adan an sel lafwa. — Li Jan 4:23, 24 ; 14:6 ; Éfézyien 4:4, 5.
Gadé vidéwo-a Es Bondié dakò épi tout rèlijion ?.
2. Kisa Jézi di asou sé fo krétjen-an ?
« Douvan tou moun yo ka di yo konnet Bondié, men yo ka viré do bay parapòt a sa yo ka fè » (TIT 1:16).
Jézi té vèti disip li kè an patjé fo krétjen té kay sali rilijion-an i té anséyé yo-a. Sé fo krétjen tala ka fè wol sanm sé vré adoratè Bondié-a. Épi Légliz yo ka di yo sé dé krétjen. Men nou pé rikonnet sé fo krétjen tala. Vré rilijion li yonn pé pwodui vré krétjen. Sé kalité yo épi aksion yo ki ka montré nou kisa ki an vré krétjen. — Li Matié 7:13-23.
3. Ki manniè ou pé rivé konnet sé vré adoratè Bondié-a ?
Mi senk bagay ki ka endé’w rikonnet yo :
Sé vré adoratè Bondié-a ka respekté Bibla. Pou yo, sé Pawol Bondié. Yo ka éséyé suiv sé prensip-la pou toulbon. Kidonk, vré rilijion-an pani ayen a wè épi sé rilijion-an ki ka suiv lidé nonm (Matié 15:7-9). Sé vré adoratè Bondié-a pa ka fè lèkontrè sa yo ka préché. — Li Jan 17:17 ; 2 Timoté 3:16, 17.
Sé vré disip Jézi-a ka gloriyé non Bondié, Jéova. Jézi gloriyé non Bondié lè i fè yo konnet li. I endé lé-zòm konnet Bondié épi i apwann yo prédié pou non Bondié sanktifié (Matié 6:9). La éti ou ka viv la, ki rilijion ka fè konnet non Bondié ? — Li Jan 17:26 ; Women 10:13, 14.
Sé vré adoratè-a ka préché wayom Bondié. Bondié vréyé Jézi asou latè pou préché bon nouvel Wayom-lan. Wayom tala sé sel espwa ba lé-zòm. Jézi palé di sa jik tan i mò (Lik 4:43 ; 8:1 ; 23:42, 43). I di kè sé disip li-a té kay préché wayom tala tou. Es an moun ja bodé’w pou palé’w di wayom Bondié-a ? Dapwé’w, adan ki rilijion i sé pé té yé ? — Li Matié 24:14.
Sé vré disip Jézi-a pa ka pwan pa adan monn mové tala. Ki manniè ou pé rikonnet yo ? Yo pa ka fè politik épi yo pa ka pwan pies bò adan konba sosial (Jan 17:16 ; 18:36). An plis, yo ka rijété manniè pansé épi mové mes sé moun monn-lan. — Li Jak 4:4.
Sé vré krétjen-an ni an lanmou estwòdinè yonn pou lòt. Pawol Bondié, ka apwann yo respekté moun tout péyi. Biensouvan, sé fo rilijion-an ka soutni ladjè anpil, men sé vré adoratè Bondié-a ka rifizé fè sa menm (Miché 4:1-3). Okontrè, yo ka fè sa épi tout tjè yo, tan yo épi bien yo pou endé épi ankourajé lézòt. — Li Jan 13:34, 35 ; 1 Jan 4:20.
4. Silon wou, vré rilijion sé kiles ?
Ki rilijion ka apiyé anseyman’y asou Pawol Bondié ? Ki rilijion ka gloriyé non Bondié ? Ki rilijion ka préché kè wayom Bondié sé sel espwa pou tout moun ? Manb kiles rilijion enmen kò yo fò yonn a lòt épi ki pa ka fè ladjè ? Kisa ou ka pansé ? — Li 1 Jan 3:10-12.