Koumanniè pou jéré lajan zòt

Nou tout bizwen lajan pou pran swen di fanmi nou (Pwovèb 30:8). Sa bien vré, « lajan sé an pwotèksion » (Éklézias 7:12). Palé di lajan sé pétèt an pwoblèm ba zòt, men pa lésé’y divizé zòt (Éfézien 4:32). Mari èk madanm pou fè kò yo konfians épi yo pou désidé ansanm manniè yo kay dépansé lajan yo.

1 FÈ AN BIDJÉ

SA LABIB-LA KA DI : « Si yonn di zòt lé konstwi an gwo batiman es i pé ké asiz avan pou katjilé pri-a épi pou wè si’y ni kont-lajan’y pou fini travay-la ? » (Lik 14:28). Mi an konsèy enpòwtan : prévwè ansanm manniè-a zòt kay dépansé lajan zòt (Amòs 3:3). Katjilé sa zòt bizwen épi konben lajan zòt kay sèvi pou sa (Pwovèb 31:16). Sé pa paskè zòt ni lajan pou péyé an bagay, pou zòt achté’y. Évité dwé. Dépansé sèlman lajan zòt ni (Pwovèb 21:5 ; 22:7).

SA ZÒT PÉ FÈ :

• Si zòt rété lajan lafen mwa-a, désidé ansanm sa zòt kay fè épi’y.

• Si zòt mantjé lajan, fè an manniè pou dépansé mwens. Kontèl, fè manjé zòt zòt menm, olié zòt manjé dèwò oben achté manjé ki ja toufèt.

2 PALÉ FRANCHMAN É WÈ BAGAY-LA KON I YÉ-A

SA LABIB-LA KA DI : « Nou ka pran pokosion pou nou fè tout bagay an manniè onnèt, ki an zié Jéova ki an zié lé-zòm » (2 Korentjen 8:21). Pa séré sa ou ka genyen é sa ou ka dépansé ba konjwen’w.

Toujou palé épi konjwen’w avan ou pran gwo désizion asou lajan (Pwovèb 13:10). Lè zòt ka bokanté bienkonmifo anlè sa, zòt kèy sa rété bien adan mariyaj zòt. Pa wè lajan ou ka genyen kon an lajan ki ta’w yonn, mé kon lajan lafanmi (1 Timoté 5:8).

SA ZÒT PÉ FÈ :

• Désidé konben lajan zòt chak-la pé dépansé san mandé lòt-la.

• Pa atann an pwoblèm rivé pou palé di lajan.