Koumanniè élivé tjanmay zòt

Lè Jéova kréyé lafanmi, I mété lé paran rèsponsab sé timanmay-la (Kolosien 3:20). Zòt sé paran-an, zòt dwèt aprann timanmay zòt enmen Jéova épi endé’y vini an moun ki mi (2 Timoté 1:5 ; 3:15). Zòt ni pou sav osi sa ki ni an tjè ti-gason zòt oben an tjè ti-fi zòt. Sonjé sé pa ti enpòwtan èkzanp zòt enpòwtan. Zòt kay rivé fè lansèyman Jéova bien rantré an tjè yich zòt, si zòt menm zòt ja fè’y désann an fon tjè zòt (Sòm 40:8).

1 BA TJANMAY ZÒT LANVI PALÉ BA ZÒT

SA LABIB-LA KA DI : « Fòk an nonm toujou paré pou kouté, pa cho palé » (Jak 1:19). Zòt lé tjanmay zòt santi i pé palé ba zòt tjè ouvè. Fòk li sav zòt paré kouté’y chak fwa i bizwen di zòt sa ki ni an fon tjè’y. Mété’y alèz-kò’y pou i pé sa palé fasilman (Jak 3:18). Si i ni lidé zòt kay montré kò zòt rèd épi’y, i pé kay vréman ouvè tjè’y. Fo pran pasians épi’y é fè’y sav toulong zòt enmen’y (Matié 3:17 ; 1 Korentjen 8:1).

SA ZÒT PÉ FÈ :

• Òwganizé kò zòt pou la, lè tjanmay zòt bizwen palé.

• Bokanté toulong épi’y é pa sèlman lè i ni pwoblèm.

2 ÉSÉYÉ KONPRANN KISA KI SÉRÉ DÈYÈ PAWÒL-LI

SA LABIB-LA KA DI : « Moun-lan ki sa bien konprann an pwoblèm kèy rivé » (Pwovèb 16:20). Délè zòt kay ni pou wè pli lwen ki sa tjanmay zòt ka di pou bien konprann santiman i ni pou toulbon. Sé jenn-lan ni an mès ka èkzajéré oben ka di dé bagay yo pa ka vréman pansé. Men « lè an moun ka pòté an jijman anlè an zafè san i sav sa ki fèt vréman, sa sòt é sé an wont ba’y » (Pwovèb 18:13). Donk pa lévé faché two vit (Pwovèb 19:11).

SA ZÒT PÉ FÈ :

• Fòk zòt bien désidé pa koupé pawòl tjanmay zòt é pa réaji an manniè èkzajéré kisiswa sa i ka di.

• Éséyé sonjé sa zòt té ka risanti lè zòt té ni laj-li é sa ki té enpòwtan ba zòt.

3 MONTRÉ TJANMAY-LA ZÒT KA FÈ YONN

SA LABIB-LA KA DI : « Yich mwen, kouté lè papa’w ka korijé’w é pa rijété lison manman’w » (Pwovèb 1:8). Ki papa-a ki manman-an, Jéova ba yo lotorité asou yich yo. Zòt dwèt aprann yich zòt rèspèkté zòt épi obéyi zòt (Éfézien 6:1-3). Lè lé paran’y pa « toutafètman lianné épi menm lèspri-a », tjanmay-la ka santi sa (1 Korentjen 1:10). Kidonk si zòt pa dakò, pa fè’y wè sa, sa pé fè zòt pèd rèspé i dwé zòt.

SA ZÒT PÉ FÈ :

• Mété kò zòt dakò asou manniè korijé yich zòt.

• Si zòt pa ka wè bagay la menm manniè-a pou sa ki élivé yich zòt, éséyé konprann kò zòt.

4 FÒK ZÒT NI AN PLAN

SA LABIB-LA KA DI : « Montré gason’w ki chimen pou i pran » (Pwovèb 22:6). An lédikasion ki réyisi sé pa an bagay ki ka fèt tou sèl. Fè an « plan fòwmasion » ki ni disiplin andidan’y (Sòm 127:4 ; Pwovèb 29:17). Disiplin sé kisa ? Pétèt sé pini tjanmay-la, mé sé pito fè’y konprann poutji i ni règ (Pwovèb 28:7). Ansénié’y enmen Pawòl Jéova é bien konprann sé prensip-la (Sòm 1:2). Sa kèy endé’y dévlopé an konsians ki dwèt (Ébré 5:14).

SA ZÒT PÉ FÈ :

• Endé tjanmay zòt wè Bondié kon an Moun réyèl i pé fè konfians.

• Aprann-li rikonnèt é évité danjé adan domenn moral, kontèl, sa ou ka jwenn asou Entèwnèt é anlè rézo sosial. Aprann-li pwotéjé kò’y kont prédatè sèksièl.