LISON 14

Mété douvan lidé ki enpòtan

Ébré 8:1

KISA POU FÈ : Endé moun ki ka kouté’w bien suiv diskou’w la, épi montré ki manniè chak lidé mèt lianné épi sa’w lé fè yo konprann èk tèm-ou an.

Ba diskou’w la an dirèksion. Désidé si diskou’w la dwé enfòmé, konvenk oben pousé moun aji, épi travay pou sa. Fè tou sa’w pé pou sé lidé prensipal-la alé an sans-lan ou chwazi a.

Mandé kòw : « Ki kèsion oben ki rimak sé moun-lan pé ni asou sijé-a ? Koumanniè sé kèsion-an é sé rimak-la ké vini an tèt-yo ? » Épi sèvi sé enfòmasion-tala pou òganizé diskou’w la. Sa ké endé sé moun-lan suiv, konprann é asèpté sa’w ka di.
Apiyé asou tèm diskou-a. Pou endé sé moun-lan sonjé tèm-lan, toupandan ou ka fè diskou-a, ou pé répété lé mo-a ki enpòtan adan tèm-lan oben itilizé dòt mo ki ni menm sans-lan.
Prézanté sé lidé mèt-la an manniè klè épi senp. Pran yenki lidé mèt ki lianné épi tèm-lan, kon sa ou kèy sa ansénié an manniè éfikas adan tan-an yo ba’w la. Pa palé twòp asou diféran lidé. Èsplitjé chak lidé-a pou yo konprann. Fè an ti pòz apré chak lidé, é pran tan’w pou pasé di an lidé a an lòt épi dousè.

Ou pé di tout sé lidé mèt-la adan prèmié pawòl-ou pou endé sé moun-lan suiv diskou’w la. Oben, répété tout sé lidé mèt-la adan konklizion’w pou yo ritjenn sa’w té di.