Sé pa ti bèl sa bèl lè nou ka vini pli pwòch yonn di lòt !

1-2. Kisa ki vréman enpòwtan ba Jéova, é kisa i ka mandé nou fè ?

BA JÉOVA, manniè nou ka fè épi lézòt ni kont lenpòwtans-li. É Jézi li menm èsplitjé, ki fòk nou enmen pwochen-nou kon nou menm (Mat. 22:37-39). Sa lé di, fòk nou ni bonté, menm ba moun ki pa ka sèvi Jéova. Lè nou ka fè sa, nou ka imité Jéova ki « ka fè solèy-li lévé asou sé moun-lan, ki yo mové ki yo bon, é [ki] ka fè lapli tonbé anlè ki jis ki enjis » (Mat. 5:45).

² Menmsi Jéova enmen tout moun, i ni an lanmou èspésial ba moun ki ka obéyi’y (Jan 14:21). É i lé nou imité’y. Sé poutji i ka mandé nou ni « an lanmou ki fò menm » ba frè é sè-nou, épi ba yo « anlo afèksion » (1 Piè 4:8 ; Wom. 12:10). Modèl lanmou épi afèksion-tala, ka sanm gwo lanmou-a nou ni ba fanmi-nou ouben an bon zanmi.

3. Kisa lanmou bizwen pou i grandi ?

³ Lè ou ni an ti plant anba véranda’w, fòk ou otjipé di’y pou i pousé. Menm manniè-a, fòk ou kontinié travay lanmou-a ou ni ba lézòt pou i grandi. Sé pousa lapòt Pòl ankourajé sé krétjen-an : « Fòk zòt kontinié montré lanmou ant frè èk sè » (Ébré 13:1). Jéova lé nou kontinié travay pou enmen lézòt toujou plis. Adan awtik-tala, nou ké wè poutji fòk nou vini pli pwòch di frè èk sè-nou, é koumanniè nou pé kontinié fè sa.

POUTJI FÒK NOU VINI PLI PWÒCH YONN DI LÒT

4. Sòm 133:1 ka palé di an bèl linité adan lasanblé-a. Ki manniè nou pé kontinié aprésié an bèl linité konsa ? (gadé sé zimaj-la osi).

⁴ (Li Sòm 133:1.) Nou dakò épi matjè sòm-lan ki ékri « sé pa ti bèl sa bèl épi agréyab » lè nou zanmi épi moun ki enmen Jéova. Afòs pasé douvan an piébwa touléjou, nou pé bliyé manniè i bèl. Menm manniè-a, nou pé bliyé manniè linité épi frè èk sè-nou bèl. Nou ka wè frè èk sè-nou souvan, pétèt pliziè fwa adan simenn-lan. Ki manniè nou pé kontinié aprésié rilasion-nou épi yo ? Lanmou-nou ba yo kèy grandi, si nou ka pran tan katjilé asou tousa yo chak la ka pòté, kisiswa ba lasanblé-a épi ba nou.

5. Lè yonn-dé moun ka wè lanmou-a nou ni yonn ba lòt, koumanniè sa ka aji anlè yo ?

⁵ I ni yonn-dé moun, lè yo ka vini pou prèmié fwa adan réyinion-nou, sa ka matjé yo lè yo ka wè lanmou-a nou ni yonn ba lòt. É délè, lè yo ka wè lanmou-tala, yo ka réyalizé ki yo touvé lavérité. É pou vré Jézi di : « Konsa tout moun kay sav zòt sé disip-mwen : si zòt ni lanmou yonn pou lòt » (Jan 13:35). Annou palé di Chaithra, ki té linivèsité épi ki té ka étidié Labib épi sé Témwen Jéova-a. I asèpté an envitasion pou vini adan an lasanblé réjionnal. Alafen prèmié jounen-an, i di sè-a ki té ka fè létid-la ba’y : « Lé paran-mwen pa janmen pran mwen an bra-yo. Men adan lasanblé-zòt la, adan an sèl jounen, 52 moun pran mwen an bra-yo ! Man ni lenprésion Jéova té lé fè mwen sav i enmen mwen, é i sèvi fanmi èspiritièl li pou fè sa. Mwen lé rantré adan fanmi-tala ! » Chaithra kontinié pwogrésé é i pran batenm an 2024. Lè sé moun-lan ki vini pou prèmié fwa ka wè manniè nou ka aji bien yonn épi lòt, épi lanmou nou ni ant nou, souvan sa ka ba yo anvi sèvi Jéova (Mat. 5:16).

6. Poutji nou pé di, lè nou pwòch frè èk sè-nou, sa pé pwotéjé nou ?

⁶ Lè nou pwòch frè èk sè-nou, sa pé pwotéjé nou. Pòl ba sé krétjen-an konsèy-tala : « Kontinié ankourajé kòzòt yonn lòt chak jou […] pou tjè-zòt piès pa vini rèd palakòz péché-a. Pas péché-a ni pouvwa kouyonnen moun » (Ébré 3:13). Sa pé rivé palakòz dékourajman, nou mantjé fè chimen-kochi épi kité chimen lajistis. A moman-tala, Jéova pé fè an frè ouben an sè rimatjé sa, épi ba nou fòs-la nou bizwen an (Sòm 73:2, 17, 23). Asiré, sa bon ba nou risivwè modèl ankourajman konsa !

7. Ki rapò i ni ant lanmou épi linité ? (Kolosien 3:13, 14).

⁷ Nou ka fòwmé an gwoup éti chak moun ka fè éfò pou montré vré lanmou-a. Gras a sa, nou ka risivwè anpil bénédision (1 Jan 4:11). Pa ègzanp, lanmou ka endé nou ‘pa sispann sipòté kònou’. Sa ka endé nou rété ini épi frè èk sè-nou (li Kolosien 3:13, 14 ; Éfé. 4:2-6). Kidonk, adan réyinion-nou, i ni an bèl lanbians ki agréyab, é nou pa ka touvé sa piès dòt koté asou latè.

ANNOU BA YONN A LÒT LONNÈ

8. Koumanniè Jéova ka rann linité-nou posib ?

⁸ Linité pèp Bondié-a asou tout latè sé an vré mirak. Menmsi nou pa pawfé, Jéova ka rann linité-tala posib (1 Kor. 12:25). É sé Labib Jéova ka sèvi pou ‘ansénié nou ni lanmou yonn pou lòt’ (1 Tés. 4:9). É pou vré, sé adan Labib Jéova ka di nou sa pou nou fè èkzaktiman, pou nou pli pré yonn di lòt. Nou ké kité ‘Bondié ansénié nou’, si nou ka pran tan-nou pou analizé lansèyman’y épi aplitjé’y (Ébré 4:12 ; Jak 1:25). É sé Témwen Jéova-a ka fè tousa yo pé pou fè sa.

9. Si nou lé ba yonn a lòt lonnè, kisa nou pou fè dapré Women 12:9-13 ?

⁹ Kisa Pawòl Bondié ka ansénié nou pou vini pli pwòch yonn di lòt ? Annou wè sa Pòl ékri parapòt a sa adan Women 12:9-13 (li). Mi sa Pòl ka di : « Fo zòt toujou pran douvan pou ba yonn a lòt lonnè. » Kisa sa lé di ? Ki fòk nou pran douvan pou ba lézòt « anlo afèksion ». Pa ègzanp, lè nou ka padonnen yo, lè nou ka pran plézi envité yo épi montré kònou donan (Éfé. 4:32). Pa atann ki sé frè èk sè’w la fè prèmié pa-a. Ou pé désidé « pran douvan ». Ou ké konstaté ki sé pawòl-tala Jézi di a vré : « An moun ka jwenn plis bonè lè i ka ba, pasé lè i ka risivwè » (Akt 20:35).

10. Koumanniè nou pé « travay » pou yonn ba lòt lonnè ? (gadé zimaj-la osi).

¹⁰ Nou ka rimatjé ki lamenm apré Pòl ankourajé sé krétjen-an pran douvan pou ba yonn a lòt lonnè, i ajouté : « Travay rèd, pa fè fenyan. » An moun ki ka travay rèd, sé an moun ki ka fè sa i ni pou fè san tadé épi ki ni kouraj. Lè i ni an bagay pou fè, i ka fè’y épi sérié. Nou ka touvé konsèy-tala adan Pwovèb 3:27, 28 : « Pa rifizé fè moun dibien lè yo ni bizwen, si ou kapab endé yo. » Sé pou sa, lè nou ka wè an moun bizwen nou endé’y, nou ka fè tousa nou pé pou ba’y pal-la. Nou pa ka lanbinen, é nou pa ka pansé ki an lòt moun ké endé moun-tala alaplas nou (1 Jan 3:17, 18).

11. Kisa ki ké endé nou vini pli pwòch lézòt ?

¹¹ An lòt manniè nou pé onoré lézòt, sé lè nou ka padonnen san pèd tan lè yo ka ofansé nou. Éfézien 4:26 ka di : « Pa rété faché jiktan solèy kouché. » Poutji fòk pa nou rété faché ? Pou ‘pa kité Djab-la ni pouvwa anlè nou’, dapré vèsé 27-la. Adan Pawòl-li, Jéova ka mandé nou toulong padonnen nou yonn lòt. Kolosien 3:13, pa ègzanp, ka ankourajé nou ‘pa sispann padonnen kònou bon tjè’. Pou vini pli pwòch di lézòt, pa ni bagay ki pli éfikas ki pasé asou ofans-yo épi lérè-yo. Lè nou ka fè sa, nou ka ‘kontinié fè gwo éfò pou nou viv adan lapé, pas lèspri sen an lianné nou’ (Éfé. 4:3). Poutoudi, padonnen, sé chimen linité épi lapé.

12. Ki manniè Jéova ka endé nou padonnen ?

¹² Sa vré, délè, sa rèd pou padonnen an moun ki blésé nou. Men sa posib di padonnen épi fòs lèspri sen Bondié. Apré Pòl mandé nou « ni anlo afèksion yonn ba lòt » épi « travay rèd », i mandé osi : « Apiyé asou lèspri Bondié pou ni anpil balan. » Lè an moun ka « apiyé asou lèspri Bondié », tout moun ka wè i ni anpil balan adan tousa i ka fè (gadé adan Bib-la ki fèt pou étidié an fwansé, nòt létid-la adan Women 12:11). Kidonk, lèspri Bondié pé endé nou ba lézòt anpil afèksion épi padonnen yo épi tout tjè-nou. Alò, annou pa bliyé sipliyé Jéova épi sensérité pou i endé nou fè sa (Lik 11:13).

« FÒK PA NI PIÈS DIVIZION ANT NOU »

13. Kisa ki sé pé mété divizion an mitan nou ?

¹³ Adan lasanblé-a, ou ka touvé « tout kalté moun », sa lé di moun ki ni diféran kilti épi ka sòti pliziè koté (1 Tim. 2:3, 4). Kifè, nou pa ka fè sé menm chwa-a parapòt a manniè nou ka abiyé, manniè nou ka penyen, santé-nou épi manniè nou ka anmizé kònou. Si nou pa véyatif, sé diférans-tala pé mété divizion an mitan nou (Wom. 14:4 ; 1 Kor. 1:10). Men davwè Bondié ka ansénié nou ni lanmou yonn pou lòt, nou kèy prangad pou nou pa di a tout fòs, ki sé chwa-nou ki pli bon pasé ta lézòt (Fil. 2:3).

14. Ki éfò nou pou toujou chèché fè adan manniè nou ka aji épi lézòt, é poutji ?

¹⁴ Nou kèy prangad pou pa kréyé divizion adan lasanblé-a si nou ka fè éfò pou toujou ankourajé lézòt (1 Tés. 5:11). Dépi yonn-dé tan, moun ki inaktif ka viré-vini réyinion, é anlo moun yo té tiré adan lasanblé-a ka rivini a Jéova. Nou lé akéyi yo épi chalè ! (2 Kor. 2:8). Annou wè sa ki rivé an sè ki viré-vini lasal di Wayòm, alòs ki pandan dizan i té inaktif. I rakonté : « Yo di mwen bonjou épi dé bèl souri asou fidji-yo, é yo séré lanmen-mwen épi tout tjè-yo » (Akt 3:19). Ki éfé sé ti jès bonté-tala té ni anlè’y ? I di : « Sé konsi Jéova té ka pran mwen pa lanmen, pou viré-mennen mwen asou chimen vré bonè-a. » Si nou ka pran labitid fè éfò pou ankourajé tout moun, Jézi kèy pé itilizé nou pou ankourajé moun « ki bien las, é ki ka pòté chaj ki lou » (Mat. 11:28, 29).

15. Kisa nou pé fè ankò, pou i ni an pli bèl linité ant nou ? (gadé zimaj-la osi).

¹⁵ Kisa nou pé fè ankò pou i ni an pli bèl linité ant nou ? Fòk nou véyatif parapòt a sa nou ka di. Jòb 12:11 ka di nou : « Ès zorèy-la pa ka ègzaminé sé pawòl-la, menm manniè lang-lan ka pran gou manjé-a ? » Toukon an bon tjuizinié ka toujou gouté sa i ka fè pou i asiré sé tété-dwèt avan i ba an moun manjé’y, nou ka pran tan-nou pou bien réfléchi a sa nou ké di avan nou palé (Sòm 141:3). Nou toujou lé asiré kònou ki sa nou kèy di kèy bati lézòt épi ankourajé yo, é ki pawòl-nou kèy ‘fè moun ki ka tann yo dibien’ (Éfé. 4:29).

16. Ki moun èspésialman ki pou ni pawòl ka ankourajé ?

¹⁶ Sé mari-a épi sé paran-an pou fè an éfò èspésial pou ni pawòl ka ankourajé (Kol. 3:19, 21 ; Tit 2:4). Sé ansien-an tou, pou fè éfò pou konsolé épi ankourajé lézòt, pas sé yo Jéova chwézi pou véyé asou twoupo-a (Iza. 32:1, 2 ; Gal. 6:1). An pwovèb nou ka touvé an Bib-la ka fè nou sonjé : « An pawòl yo di bon lè-a, sé pa ti dous i dous ! » (Pwo. 15:23).

ENMEN « ÉPI AKSION ÈK SENSÉRITÉ »

17. Sa nou pé fè pou ni an lanmou sensè ba frè é sè-nou ?

¹⁷ Lapòt Jan ka ankourajé nou « enmen, pa sèlman épi pawòl an bouch oben bèl diskou, men épi aksion èk sensérité » (1 Jan 3:18). Nou lé ni an lanmou ki sensè ba frè é sè-nou. Koumanniè nou pé montré an lanmou konsa ? Pli nou ké pasé tan épi frè é sè-nou, sé plis nou ké pwòch di yo é lanmou-a nou ni ba yo kèy vini pli fò. Alò, annou chèché pasé tan épi yo, kontèl lè nou ka alé réyinion ouben lè nou ka préché. Annou pran an tan osi pou alé wè yo. Si nou ka fè tousa, nou ké montré ‘sé Bondié ka ansénié nou pou nou ni lanmou yonn pou lòt’ (1 Tés. 4:9). É nou chak la kèy pé kontinié wè épi dé zié-nou : « Sé pa ti bèl sa bèl épi agréyab lè nou ansanm-ansanm épi frè-nou ! » (Sòm 133:1).