Tout lavi-nou, gran Pwofésè-nou ansénié nou

LÈGZANP LÉ PARAN-MWEN

An 1957, lé paran-mwen kité Litali pou alé viv Kanada, lavil Kindèrslèy, pa koté Saskatchiwàn. Tibren plita, yo touvé lavérité. É sé sa ki té pli enpòtan adan lavi-nou. Man ka sonjé, lè mwen té tibolonm, mwen té ka fè bèl gwo jounen prédikasion épi lafanmi-mwen. Sé pou sa délè, mwen enmen di pou fè lafèt, mwen koumansé sèvis pionié òksiliè a uitan !

Lé paran-mwen ba nou an bèl lègzanp : magré yo té maléré, piès sakrifis pa té two piti pou yo fè ba Jéova. An 1963, yo vann yonn-dé bagay yo té ni, pou alé lasanblé entèwnasional Pasadéna, atè Kalifòwni. An 1972, nou déménajé 1 000 kilomèt di lakay-nou pou soutni an lasanblé italien lavil Trèl, adan dépatman Kolonbi-Britanik Kanada. É papa-mwen, ki té gadien, rifizé pliziè lokazion ni plis lajan pou mété sèvis Jéova-a douvan-douvan.

Man ka di lé paran-mwen mèsi pou bèl lègzanp-lan yo kité ba mwen épi sé frè é sè-mwen an. Prèmié bagay ki fòwmé mwen pou sèvi Jéova, sé lègzanp lé paran-mwen. Yo aprann mwen an lison man ritienn tout lavi-mwen : si man ka chèché Wayòm-lan an prèmié, Jéova ké otjipé di mwen (Mat. 6:33).

NOU KA KOUMANSÉ SÈVIS A PLEN TAN-AN

An 1980, man mayé épi Debbie. Sé té an bèl ti madanm ki té ka mété sèvis Jéova an prèmié adan lavi’y. Konm nou té lé sèvi Jéova a plen tan, Debbie pran sèvis pionié 3 mwa apré mariyaj-nou. Apré 1 lanné mariyaj, nou déménajé pou endé an ti lasanblé ki té bizwen an pal, é apré sa, man vini pionié tou.

Men apré an tan, nou vini dékourajé épi nou pran désizion di pati. Men avan nou pati, nou fè an ti palé épi rèsponsab siwkonskripsion-an. I palé ba nou épi lanmou, men osi épi fwanchiz. I rété di nou : « Sé tibren fòt-zòt si zòt dékourajé. Zòt ka yenki mété lèspri-zòt asou sa ki pa ka maché adan sitiyasion-zòt. Men si zòt ka chèché bagay pozitif, zòt ké touvé yo. » Sé sa nou té bizwen tann (Sòm 141:5). Nou suiv konsèy-tala. É lamenm, nou wè i té ni an patjé bèl bagay ka fèt la nou té yé a. Anlo adan sanblé-a té lé fè plis ba Jéova, kontèl sé jenn-lan, épi sè mari-yo pa té Témwen. Avrédi, sa sèvi nou lison. Nou aprann chèché sa ki bon, épi atann Jéova aji lè sitiyasion-an ka vini rèd (Mic. 7:7). Nou viré-touvé lajwa-nou, é tout zafè-nou ranjé.

Lè nou fè prèmié Lékòl pionié-nou, sé fòwmatè-a té sèvi Jéova adan péyi étranjé. Lè yo montré nou foto ministè-yo, épi lè yo palé nou di difikilté épi bénédision yo té viv, yo ba nou lanvi vini misionnè. Kifè, nou désidé ki an jou nou ké misionnè, nou osi.

Pou nou fè an prèmié vansé adan lòbjèktif-nou, an 1984, nou pati ay viv Kébèk, adan pati fwansé a. Sé té oliwon 4 000 kilomèt Lakolonbi-Britanik, éti nou té ka viv. É la, fòk nou té aprann viv an lòt manniè, pas sé té an lòt kilti épi an nouvo lang. Men sa pa té tout : souvan, pòch-nou té krévé. Pandan an tan, pou viv, fòk nou té ranmasé ponm-tè asou téren an agrikiltè. Debbie fè tousa i té pé pou fè manjé épi ponm-tè an tout sòs ! Magré tout sé difikilté-tala, nou fè tousa nou té pé pou kontinié vansé épi tjè-kontan. Anplis di sa, nou té ka bien wè manniè Jéova té ka otjipé di nou (Sòm 64:10).

An jou, nou risivwè an kout téléfòn nou pa té ka atann ! Yo envité nou sèvi Bétèl Kanada. Davwè nou té ranpli dimann pou fè Lékòl Galaad, nou té ant dé lidé. Men nou asèpté. Lè nou rivé, nou mandé frè Kenneth Little ki té adan Komité filial-la : « Kisa nou ké fè si yo envité nou fè Galaad ? » I réponn nou : « Lè lè-a rivé, nou ké wè. »

Kon di kon fèt : an simenn plita, yo envité Debbie épi mwen fè Galaad. Kidonk, nou té ni an désizion pou pran. Frè Little di nou : « Kisiswa chwa-a zòt ké fè, délè zòt ké di kòzòt, nou té pou chwézi lòt la pito. Pa ni an chwa ki méyè pasé lòt la. Jéova pé béni lé dé. » Nou asèpté fè Galaad, é lanné apré lanné, nou konstaté pliziè fwa ki frè Little té ni rézon. Souvan, nou té ka répété sé ti pawòl-tala ba frè èk sè ki té pou chwazi adan ki aktivité yo té ké sèvi Jéova.

NOU KA VINI MISIONNÈ

Nou té vréman kontan fè pati sé 24 zélèv-la ki té adan 83^ièm klas Galaad-la. Lékòl-nou an koumansé avril 1987, lavil Bwouklin, Nouyòk. Fòwmatè prensipal nou, sé té frè Ulysses Glass épi Jack Redford. Apré 5 mwa ki pasé bien vit, 6 sèptanm 1987, nou trapé diplòm-nou. Yo vréyé nou sèvi Ayiti, an menm tan ki an lòt koup, John é Marie Goode.

Dépi 1962, yo pa té jan vréyé misionnè Galaad Ayiti. Sé lanné-tala yo fè sé dènié misionnè-a kité péyi-a. Dépi sa, yo pa té jan vréyé dòt misionnè Ayiti. Twa simenn apré nou risivwè diplòm-nou, nou té ja rivé Ayiti adan an réjion plen montann, lwen tout bagay. Nou té adan an ti lasanblé ki té ni 35 pwoklamatè. Nou té jenn é nou pa té ni anlo èspérians, é anplis, nou touvé kònou tou sèl adan an mézon ba misionnè. Sé moun téritwè-a té adan lanmizè menm, é près yo tout pa té sa li. La nou té ka viv la, sé moun-lan vini violan akòz pwoblèm politik, é pliziè fwa, yo éséyé maté gouvènman-an. Té ni osi manifèstasion épi siklòn.

Men frè é sè Ayiti aprann nou anlo bagay. Yo té ni landirans épi tjè-kontan. Lavi-a pa té dous ba anlo adan yo, men yo té enmen Jéova é yo té enmen préché. An sè ajé ki pa té sa li, té konnèt oliwon 150 vèsé pa tjè ! Pwoblèm i té ni adan réjion-tala, té ka ba nou ankò plis lasirans ki Wayòm Bondié sé sèl solision pwoblèm lézòm. Kidonk, fòk nou té kontinié préché’y. Nou vréman kontan sav ki yonn-dé adan sé prèmié moun-lan ki étidié Labib épi nou, vini pionié pèwmanan, pionié èspésial ouben ansien.

Lè man té Ayiti, man diskité pliziè fwa asou Labib épi an jenn boug ki té mòwmon, yo té ka kriyé Trevor. Lanné plita, sa siwpwann mwen lè i ékri mwen an lèt. I di mwen : « Man ké pran batenm pwochen lasanblé-a ! Apré, man té ké enmen viré Ayiti, épi vini pionié èspésial adan réjion-an man té ka préché lè man té mòwmon. » É sé sa ki fèt. Li épi madanm-li té pionié èspésial adan réjion-tala pliziè lanné.

LÉWÒP, APRÉ DIRÈKSION LAFRIK

Davwè prédikasion-an té ka ouvè Slovéni, an péyi Léwòp, yo vréyé nou la. Kifè, lanné 1992, nou rivé Loubliana, toupré koté-a lé paran-mwen té ka viv, avan yo pati pou Litali. Adan yonn-dé réjion ki té ka fè pati Layougòslavi, ladjè té ka woulé toujou. An tan-an, sé té filial Otrich-la épi biwo Zagrèb, Lakwowasi, épi biwo Bèlgrad, Lasèrbi, ki té ka òwganizé prédikasion-an adan réjion-tala adan monn-lan. Men aprézan, chak répiblik té ké ni Bétèl-yo.

Ankò an fwa, nou té pou aprann an nouvo lang é an nouvo kilti. Souvan, moun péyi-a té ka di nou : « Aprann lang-tala, sé an mòn. » É sa vré, sé té an mòn ! Men, fidélité sé frè é sè-a touché nou, pas yo té paré asèpté tout chanjman lòwganizasion té ka fè, é nou wè manniè Jéova béni yo. La ankò, nou wè Jéova réglé pwoblèm épi lanmou, é bon moman-an. Nou aprann anlo lison lè nou té Slovéni. Men, an patjé lison nou aprann avan nou rivé la, endé nou adan sitiyasion difisil nou jwenn.

Men dòt chanjman té ka atann nou. An 2000, yo vréyé nou Kòtdivwa, an péyi Lwès Lafrik. Apré sa, an novanm 2002, palakòz ladjè an mitan lapopilasion, nou té oblijé pati Siéraléyòn, an péyi ki li menm té ka sòti anba 11 lanné ladjè. Sa pa té fasil ba nou kité Lakòtdivwa an manniè blip konsa. Men, sé tout sé lison-an nou aprann ki endé nou gadé lajwa-nou.

Parapòt a sa nou té ka viv, nou té ka rété anlè sa ki té pozitif : adan téritwè-nou, sé moun-lan té ka kouté nou. É menmsi, pandan lanné, frè é sè-nou té soufè palakòz ladjè-a, yonn té enmen lòt. Yo té maléré, men lanmen-yo té gran ouvè pou endé lézòt. An jou, an sè ofè Debbie yonn-dé lenj. Konm Debbie fè dèyè pou asèpté, sè-a ensisté épi i di’y : « Pandan ladjè-a, frè é sè dòt péyi ba nou an pal. Atjèlman, sé nou ki pou endé lézòt. » Nou fiksé kònou lòbjèktif-la, imité bèl lègzanp frè é sè-nou Siéraléyòn.

Anfinaldikont, nou viré Kòtdivwa, men péyi-a viré-ni pwoblèm politik ki mennen anpil violans. Sé poutji, an novanm 2004, yo fè nou pran élikòptè pou kité péyi-a. Nou chak la té ni an ti sak épi yonn-dé bagay andidan’y sèlman. Nou dòmi an lannuit kouché atè-a, adan an kan militè fwansé. Lè landèmen, nou pran avion pou rivé Lasuis. Lè nou rivé Bétèl-la, pa koté minui, sè frè Komité filial-la, épi sé fòwmatè-a pou Lékòl fòwmasion ministérièl la épi madanm-yo, pran nou an bra-yo. Yo ba nou an bon ti manjé bien cho épi chokola suis ! Manniè yo akéyi nou brennen tjè-nou.

Yo vréyé nou Gana pou an tan. Apré, nou viré ankò Kòtdivwa, lè sitiyasion-an vini pli kam. Sa vré, tout sé kouri-chapé tala épi tout sé mision-tala yo té ba nou pandan an tan, lévé èstrès anlè nou. Men nou rivé tjenbé, gras a jantiyès frè èk sè-nou. Sa nòwmal jwenn an lanmou konsa andidan lòwganizasion Jéova-a. Men Debbie épi mwen, nou pran désizion pa janmen pran lanmou-tala pou lajan kontan. Plita, nou konprann ki tout sé tribilasion-tala, sé té osi an bèl fòwmasion ba nou.

YO KA VRÉYÉ NOU MWAYENNORIAN

Lanné 2006, nou risivwè an lèt biwo mondial la. Yo té ka vréyé nou Mwayennorian ! Ankò an fwa, nou té ké viv nouvo lèspérians, jwenn nouvo difikilté, aprann nouvo lang, épi osi aprann nouvo kilti. Adan pati monn-tala, sé moun-lan pa té ka jwé épi ni lapolitik ni larèlijion. Adan sé lasanblé-a, sé frè é sè-a té ka sòti adan divès péyi, yo té ka palé tout kalté lang, é nou té enmen sa. Nou wè an dé zié-nou, linité-a ki ni lè nou ka suiv sa lòwganizasion Jéova ka di nou. É nou té fiè, lè nou té ka wè frè é sè-nou sipòté épi kouraj lopozision moun fanmi-yo, kanmarad lékòl-yo, kolèg-yo ouben vwazen-yo.

An 2012, nou asisté an lasanblé èspésial Tèlaviv, Izrayèl. Dépi Lapannkòt 33, sé té prèmié fwa adan pati monn-tala, tout moun adan pèp Jéova, té ka sanblé ansanm. Sé té an lévènman pèsonn pa té ké jen bliyé !

Nou té Mwayennorian toujou, lè yo vréyé nou adan an péyi éti aktivité-nou entèwdi, pou vizité sé frè é sè-a. Nou pòté piblikasion ba yo, nou préché épi yo, épi nou alé adan piti lasanblé siwkonskripsion. Toupatou, té ni sòlda awmé é sèktè éti sòlda ka kontwolé moun. Men nou té ka santi kònou an sékirité, pas nou té ka déplasé kònou épi pokosion épi yonn-dé pwoklamatè péyi-a.

NOU KA VIRÉ LAFRIK

An 2013, yo vréyé nou sèvi adan an aktivité ki té vréman diféran : yo envité nou sèvi Bétèl Kongo, Kinchasa. Péyi-a gran épi i bèl, men anlo ladjè malmennen’y, épi sé moun-lan adan an gran lanmizè. Lè nou rivé, nou rété di : « Sa pa ayen. Nou konnèt Lafrik ! » Men nou té ni anlo bagay pou aprann toujou, èspésialman lè nou té pou vwayajé koté ki pa té ni pon épi lawout. Nou rété la ka katjilé asou an patjé bagay pozitif. Kontèl, landirans épi lajwa frè èk sè-nou, lanmou-yo pou prédikasion-an, épi tout bèl éfò yo té ka fè pou ay an réyinion épi adan sé lasanblé-a, magré pwoblèm lajan. Nou konstaté ki sé aktivité-a ki lianné épi Wayòm-lan ka maché, pas Jéova ka béni. Sé lanné-a nou pasé Kongo kité ba nou anlo bèl souvni. É nou trapé zanmi ki vini an bèl fanmi ba nou.

Lafen 2017, nou rivé Lafrik li-Sid. Ében wi, an lòt koté ankò yo vréyé nou sèvi. Nou pa té janmen sèvi adan an gran Bétèl konsa, é sa yo té ka mandé nou fè, nou pa té janmen fè’y avan. Ankò an fwa, nou té ni anlo bagay pou aprann. Men sa nou viv, aprann nou yonn-dé lison ki té kèy itil ba nou apré. Sé pa ti enmen nou enmen tout sé frè é sè-a, ki ka tjenbé épi fidélité dépi dizenn lanné. É nou ka touvé sa èstwòdinè wè sé bétélit-la travay adan linité, alòs ki yo ni ras épi kilti diféran. É sa vré, lapé-a yo ni ant yo ka montré Jéova ka béni yo. É si Jéova ka ba yo lapé-tala, sé pas yo ka abiyé épi nouvo pèrsonalité-a, épi yo ka aplitjé sé prensip Labib-la.

Tout sé lanné-tala, Debbie épi mwen nou risivwè mision ki té èstwòdinè. Nou aprann pliziè kilti é pliziè lang. Sa pa té toujou fasil, men nou toujou risanti lanmou fidèl Jéova, lè i itilizé lòwganizasion’y épi sé frè é sè-a (Sòm. 144:2). Nou asiré sèten ki sèvis a plen tan-an fòwmé nou épi pèwmèt nou pwogrésé.

Man ka di lé paran-mwen an bèl mèsi pou lédikasion-an yo ba mwen. Man ka di madanm-mwen Debbie mèsi osi, davwè i soutienn mwen. É man ka di sé frè é sè-a man jwenn adan sé diféran péyi-a, mèsi pou bèl lègzanp-yo. Debbie épi mwen, nou bien désidé kité Jéova, gran Pwofésè-nou, kontinié ansénié nou.