« Kriyé sé ansien lasanblé-a pou yo vini wè’w »

1. Koumanniè Jéova ka montré nou ni anpil valè ba’y ?

NOU ki ka sèvi Jéova, nou ni anpil valè an zié’y. I achté nou épi san Jézi é i mandé sé ansien-an adan sé lasanblé-a otjipé di nou (Akt 20:28). Bondié mété Jézi chèf anlè sé lasanblé-a. Jéova épi Jézi ka atann sé ansien-an otjipé di nou épi anpil jantiyès. Sé ansien-an ka suiv larèl-la Jézi ka ba yo, lè yo ka ankourajé sé frè é sè-a, épi lè yo ka endé yo rété fidèl a Jéova (Iza. 32:1, 2).

2. Jéova ka sousié kòy di ki moun èspésialman ? (Ézékièl 34:15, 16).

² Jéova ka sousié kòy anpil di tout sèvitè’y, men i vréman anvi endé yo lè yo ka fébli. I ni ki fébli pas yo péché, é Jéova ka sèvi sé ansien-an pou endé yo (li Ézékièl 34:15, 16). Men i lé nou fè pa ta nou épi chèché soukou lè nou bizwen. Sé pou sa, i ka mandé nou priyé pou i endé nou. É osi, ay wè sé ansien lasanblé-a pou yo ba nou pal-la nou bizwen (Éfé. 4:11, 12).

3. Di kisa nou kèy palé adan awtik-tala, é kisa sa ké pòté ba nou ?

³ Adan awtik-tala, nou kèy aprann plis asou manniè Jéova ka sèvi sé ansien-an pou endé sé frè é sè-a ki koumansé pèd lanmitié-yo épi’y. Pou sa, nou ké réponn sé kèsion-tala : A ki moman fòk nou mandé sé ansien-an endé nou ? Poutji fòk nou fè sa ? Épi ki manniè sé ansien-an ka endé nou ? Pétèt jòdi-a, nou ni an bon rilasion épi Jéova, é nou pa ka santi nou bizwen sé ansien-an endé nou. Men awtik-tala kèy endé nou aprésié kado-tala Jéova fè nou, épi i kèy pèwmèt nou sav sa pou fè, lè nou kèy bizwen yo.

A KI MOMAN FÒK NOU « KRIYÉ SÉ ANSIEN-AN » ?

4. Jak 5:14-16, 19, 20 ka palé di moun ki bizwen ranfòsé rilasion-yo épi Jéova. Kisa ka fè nou di sa ? (gadé sé zimaj-la osi).

⁴ Apòt Jak èsplitjé koumanniè Jéova ka sèvi sé ansien-an pou endé nou. Jak ékri : « Ès yonn adan zòt malad ? Fòk i kriyé sé ansien lasanblé-a pou yo vini wè’y » (li Jak 5:14-16, 19, 20). Jak ka palé di moun ki bizwen ranfòsé rilasion-yo épi Jéova. Sé pou sa i konséyé yo kriyé, non pa an dòktè, men sé ansien-an. Anplis di sa, Jak èsplitjé ki an moun ki malad ka djéri, pas Bondié ka padonnen péché’y. Pou an moun ki malad djéri, fòk i ay wè an dòktè, èsplitjé’y sa ki pa ka alé, épi suiv sa dòktè-a ké mandé’y fè pou i djéri. Menm manniè-a, si nou bizwen an pal pou ranfòsé rilasion-nou épi Jéova, fòk nou palé ba sé ansien-an, èsplitjé yo ki pwoblèm nou ka jwenn, épi suiv konsèy biblik yo ka ba nou.

5. Koumanniè nou sav rilasion-nou épi Jéova ka fébli ?

⁵ Adan chapit 5-lan, Jak ka ankourajé nou alé wè sé ansien-an, lè nou ka wè an bagay pa ka alé adan rilasion-nou épi Jéova. Sa enpòwtan alé wè sé ansien-an avan konpòwtasion-nou ni mové lenfliyans asou rilasion-nou épi Jéova ! Fòk nou onnèt épi kònou. Labib ka di nou fè atansion pou pa kouyonnen pwòp kònou (Jak 1:22). Sé sa ki rivé krétjen sanblé Sard. Jézi di yo, yo pa té ka fè Jéova plézi ankò (Rév. 3:1, 2). Koumanniè nou sav nou ni an bon rilasion épi Jéova ? An manniè pou sav sa, sé konparé sa nou té ka risanti lè nou pran batenm, épi sa nou ka risanti atjèlman ba Jéova (Rév. 2:4, 5). Annou mandé kònou : « Ès man toujou ka pran plézi li Labib, médité asou’y ? Ès man ka alé réyinion tou li tan, ès man ka bien préparé sé réyinion-an ? Ès man ni mwens balan pou préché ? Ès anmizman, lajan, plis an tèt-mwen ki avan, ès man ka pasé plis tan adan sé bagay-tala ki avan ? » Si nou ka réponn wi adan an sèl di sé kèsion-tala, pétèt sa lé di ki rilasion-nou épi Jéova fébli. É féblès-tala pé vini pli enpòwtan si nou pa ka fè ayen. Men si nou pa ka rivé sòti adan zatrap-tala tou sèl, ouben si nou ja fè an péché ki grav, fòk nou alé wè sé ansien-an.

6. Lè an moun fè an péché ki grav, kisa fòk i fè ?

⁶ Si an moun fè an péché ki grav, fòk i alé wè an ansien, pas akòz péché-tala, yo pé tiré’y adan lasanblé-a (1 Kor. 5:11-13). Moun-tala bizwen yo endé’y pou ranfòsé lanmitié’y épi Jéova. Pou Jéova padonnen’y gras a ranson-an, fòk i fè ‘aksion ki ka montré i ka ripanti kòy’ (Akt 26:20). Yonn adan sé aksion-tala, sé alé wè sé ansien-an.

7. Ès sé sèlman moun ki fè an péché grav ki bizwen sé ansien-an endé yo ?

⁷ Sé pa sèlman moun ki fè péché ki grav sé ansien-an ka endé. Yo ka endé osi moun ki ka santi rilasion-yo épi Jéova an danjé (Akt 20:35). Pétèt ou ka goumen kont vié lidé, é ou ka santi ou kèy pèd konba’w. Konba-a pé ankò pli rèd si, avan ou konnèt lavérité, ou té ka pran ladwòg, ou té ka gadé bagay pòwno, ouben ou té ni an konduit sèksièl ki pa pwòp. Men ou pa oblijé goumen tou sèl. Ou pé désidé palé ba an ansien. I kèy bien kouté’w, kèy ba’w konsèy ki itil, é i kèy fè’w sonjé ki’w pé fè Jéova plézi si’w ka rifizé suiv sé vié lidé-tala ou ni (Ékl. 4:12). Lè’w ka santi ou dékourajé, sé ansien-an pé fè’w sonjé sé laprèv lanmitié’w épi Jéova ni anpil lenpòwtans ba’w. É sé laprèv osi ou pa ka pansé ayen pé pa rivé’w (1 Kor. 10:12).

8. Pou ki kalté péché nou pa bizwen ay wè lé zansien ?

⁸ Nou pa bizwen ay wè sé ansien-an pou chak lérè nou ka fè. Imajinen ou ka di an bagay ka blésé an sè ouben an frè, ouben ou ka lévé mouch-wouj kont yonn di yo. Olié ou alé wè an ansien pou di sa ki pasé, ou pé suiv konsèy Jézi ki ka di fè lapé épi frè’w ouben sè’w (Mat. 5:23, 24). Ou pé étidié osi piblikasion-nou pou aprann vini pli dous, pli pasian, é métrizé kòw plis. Sa vré, si’w pa ka rivé réglé pwoblèm-lan tou sèl, ou pé mandé an ansien endé’w. Lè Évodi épi Sentich pa rivé réglé pwoblèm-yo, Pòl mandé an frè adan lasanblé-a endé yo. Menm manniè-a, an ansien adan lasanblé-a, pé endé’w tou (Fil. 4:2, 3).

POUTJI FÒK NOU « KRIYÉ SÉ ANSIEN-AN » ?

9. Poutji fòk pa nou kité lawont anpéché nou kriyé sé ansien-an ? (Pwovèb 28:13).

⁹ Lè nou fè an péché ki grav, ouben nou ni lenprésion nou kèy ladjé konba-a kont an féblès nou ni, fòk ni anpil lafwa èk kouraj pou mandé an pal. Men fòk pa nou kité lawont anpéché nou kriyé sé ansien-an. Poutji ? Pas Jéova ba nou sé ansien-an pou endé nou kontinié ni an bon rilasion épi’y. Alò, lè nou ka kriyé sé ansien-an, nou ka montré nou ka fè Jéova konfians, épi nou ka obéyi Pawòl-li. Sa ka montré osi nou ka rikonnèt nou bizwen Jéova pou kontinié fè sa ki bien (Sòm 94:18). É nou pé ni lasirans Jéova kèy padonnen nou si nou ka di sé ansien-an sa nou fè, épi si nou ka arété fè sa ki mal (li Pwovèb 28:13).

10. Kisa ka pasé si nou ka éséyé séré péché-nou ?

¹⁰ Nou pé trapé an patjé bénéfis si nou ka mandé sé ansien-an endé nou lè nou bizwen. Men si nou ka séré péché-nou, sitiyasion-nou kèy vini plizanpli grav. Wa David, pandan an tan, séré péché’y. Akòz di sa, i té déprimé, i té ka soufè, pas i té sav rilasion’y épi Jéova té pran plon (Sòm 32:3-5). Lè nou ni an maladi, pli nou atann pou otjipé di sa, sé plis nou kèy soufè épi maladi-tala. Menm manniè-a, si nou fè an péché ki grav, pli nou atann pou mandé sé ansien-an endé nou, sé plis nou kèy soufè. Jéova sav sa bien. Sé poutji i ka envité nou ‘viré-mété tout bagay an lòd épi’y’ (Iza. 1:5, 6, 18). Tout bagay kèy ranjé ant nou épi Jéova, si nou ka alé wè sé ansien-an, pou yo endé nou viré-vini zanmi’y.

11. Si nou ka séré an péché ki grav, ki konsékans sa pé ni asou lézòt ?

¹¹ Si nou pa ka di sé ansien-an an péché grav nou fè, dòt moun pé soufè. Nou pé anpéché lèspri sen Jéova aji adan tout lasanblé-a, épi ba frè é sè-nou pwoblèm (Éfé. 4:30). Menm manniè-a, si nou sav an moun adan lasanblé-a fè an péché ki grav, nou pou ankourajé’y alé wè sé ansien-ana. Si nou pa ka fè sa, nou kèy koupab tou (Lév. 5:1). É si i pa alé wè sé ansien-an, lanmou-a nou ni ba Jéova pou pousé nou fè’y alaplas-li. Si nou fè sa, nou kèy pwotéjé sé frè é sè-a adan lasanblé-a, é nou kèy endé moun-lan ki péché ritouvé bon rilasion épi Jéova.

KOUMANNIÈ SÉ ANSIEN-AN KA ENDÉ NOU ?

12. Ki manniè sé ansien-an ka endé an krétjen ki bizwen ranfòsé rilasion’y épi Jéova ?

¹² Labib-la ka mandé sé ansien-an, endé sé moun-lan ki bizwen ranfòsé rilasion-yo épi Jéova (1 Tés. 5:14). Si’w fè an péché, sé ansien-an kèy bizwen pozé’w kèsion pou konprann sa’w ka pansé épi sa ki an fon tjè’w (Pwo. 20:5). Pétèt ou ka touvé sa rèd palé ba lé zansien pas ou timid, ouben ou wont rakonté sa ki pasé. Men si ou ka rakonté yo ki pwoblèm ou ka jwenn, sa pé endé yo konprann. Fòk pa ou pè di an bagay ki pa bon (Jòb 6:3). Sé ansien-an pa présé jijé’w. Okontrè, avan yo ba’w konsèy ki sòti adan Bib-la, yo ké pran tan kouté’w, pou konprann tousa ki pasé (Pwo. 18:13). Sé ansien-an sav bien, sa ka pran tan pou endé an moun. Kidonk, sa ké nésésè yo palé épi’w pliziè fwa pou ba’w sa ou ni bizwen.

13. Lè sé ansien-an ka priyé ba nou é ka ba nou konsèy ki sòti an Bib-la, ki manniè sa pé endé nou ? (gadé sé zimaj-la osi).

¹³ Òbjèktif sé ansien-an, sé pa di fè’w santi kòw pli mal ankò. Okontrè, yo ké priyé ba’w. É Jéova ké kouté lapriyè-yo ki ni « anpil fòs ». Ou pé pa imajinen manniè sa ké konsolé’w ! Yo kèy fè osi an lòt bagay ba’w : yo ké ‘mété luil anlè’w an non Jéova’ (Jak 5:14-16). Luil-tala, sé sé vérité-a ki adan Pawòl Bondié. Gras a vèsé yo chwézi èspésialman ba’w, sé ansien-an ké konsolé’w é endé’w ritouvé an bèl lanmitié épi Jéova (Iza. 57:18). Konsèy yo kèy ba’w ki sòti adan Bib-la, kèy riba’w fòs ou bizwen pou kontinié fè sa Jéova ka mandé’w. Yo kèy endé’w tann vwa Jéova ka di’w : « Sé la chimen-an yé. Suiv li » (Iza. 30:21).

14. Silon Galat 6:1, ki manniè sé ansien-an ka endé an krétjen ki fè « chimen-kochi » ? (gadé sé zimaj-la osi).

¹⁴ (Li Galat 6:1.) Lè an krétjen ka fè « chimen-kochi », i ka dézobéyi Jéova. Pétèt i pran an désizion ki mantjé bonsans, ouben i fè an péché ki grav. Lanmou sé ansien-an ni ba’y ké fè yo chèché an manniè pou ‘viré-mété moun-lan dwèt épi dousè’. An dòktè ki filé kèy fè tousa i pé pou mété dwèt, an zo ki kasé san fè moun-lan soufè twòp. Menm manniè-a, lòbjèktif sé ansien-an sé endé moun-lan viré-ni bon rilasion épi Jéova san fè’y soufè plis. Okontrè, yo ka fè tousa yo pé pou konséyé frè-yo épi jantiyès. Labib-la ka di sé ansien-an « prangad ». Lè yo ka endé an krétjen ki fè chimen-kochi, yo ka sonjé yo tou, yo pa pawfé, é yo pé fè chimen-kochi osi. Alò, yo ka fè atansion pou pa santi kòyo pli bon pasé moun-lan yo ka endé. Yo ké pito aji épi moun-tala épi limilité é konpasion (1 Piè 3:8).

15. Si nou ni an pwoblèm, kisa fòk nou fè ?

¹⁵ Nou pé fè sé ansien-an konfians. Jéova aprann yo tjenbé bouch-yo épi pa rakonté zafè moun. Anplis, yo aprann apiyé konsèy yo ka ba asou Labib-la, olié apiyé asou pwòp lidé-yo. Yo aprann tou, fòk yo fè tousa yo pé pou kontinié endé an moun ki ni pwoblèm (Pwo. 11:13 ; Gal. 6:2). Chak ansien ni kalité ki diféran, é i ni ki ansien dépi pli lontan ki dòt. Men nou pé palé ba nenpòt ki ansien. Asiré, nou pé ké alé mandé tout sé ansien-an, yonn apré lòt, sa yo ka pansé jiktan nou jwenn yonn ka di nou sa nou anvi tann. Si nou fè sa, nou ké kon moun ki lé tann sèlman sa yo anvi tann, olié nou kouté sa Jéova ka ansénié adan Pawòl-li. (2 Tim. 4:3). Pétèt ansien-an nou kèy alé wè, ké mandé nou si nou ja palé ba dòt ansien di pwoblèm-nou, épi osi, ki konsèy yo ba nou. Sé ansien-an sav yo ni limit, sé pou sa i ké pétèt osi alé mandé an lòt ansien an konsèy (Pwo. 13:10).

RÈSPONSABLITÉ NOU CHAK LA

16. Ki rèsponsabilité nou chak la ni ?

¹⁶ Sé ansien-an ka ba nou konsèy pou endé nou lè nou ni pwoblèm. Men, yo pé ké di nou ki désizion pou pran. Nou chak la, nou ni pou montré Jéova, adan sa nou ka di épi sa nou ka fè adan lavi-nou touléjou, ki nou enmen’y, é nou lé fè’y plézi. Si nou fè sa, i ké endé nou pran désizion ki plen sajès épi rété fidèl (Wom. 14:12). Sé poutji sé ansien-an pa ka anni di nou sa fòk nou fè. Men yo ka plito montré nou sa Jéova ka di adan Pawòl-li. Si nou ka suiv sé konsèy Labib-la yo ka ba nou, nou kèy pran labitid ‘sèvi kapasité nou ni pou konprann’, é nou kèy pran désizion ki plen sajès (Ébré 5:14).

17. Kisa Jéova ka mandé nou fè ?

¹⁷ Mi bèl lonnè nou ni, di ni an bèl rilasion épi Jéova ! Jéova vréyé Jézi asou latè, « bon bèrjé-a », pou péyé ranson-an ba nou, é pou nou pé sa ni lavi étèrnèl (Jan 10:11). É gras a sé ansien-an i ba nou adan sé lasanblé-a, Jéova ka réyalizé pwonmès-tala : « Man ké ba zòt bèrjé ki ka aji silon volonté-mwen, yo ké nouri zòt épi konésans èk entélijans » (Jér. 3:15). Kidonk, lè nou ka santi lafwa-nou ka fébli, ouben lè nou lé ritouvé an bon rilasion épi Jéova, fòk nou pa pè kriyé sé ansien-an pou yo endé nou. Alò nou ké wè manniè Jéova ka itilizé yo pou endé nou !